الموضوع: هااااام فين الردوووووود -- تغيير كاوتش التو

المشاركة الأصلية كتبت بواسطة swimmer25

متهيألي موجود 155/65 r13 وده مناسب لسيارتك بس مش متأكد هتلاقيه متوفر أو لا

زي ما حضرتك قلت الجوديير بيعمل عالي وواطي وبيموت بسرعة جدا دا غير انه بيبوظ بسرعة ومش بيمسك مع الأسفلت كويس
متهيألك إنك لو نزلت الإستبن وتغير معاه 3 فرد هينفع
بمجرد نزول الاستبن علي الأرض وممكن خلال أول 5 الاف كم هيكون باظ وعمل عالي وواطي هو كمان

غير 4 فرد أفضل لنوع أحسن وخلي الإستبن زي ما هو...الكاوتش أهم ما في السيارة فلا تتنازل عن الأمان

جزيل الشكر اخي الفاضل
كل ما قلته حضرتك تمام و لكن بالنسبة للتماسك مع الاسفلت -- الجود يير جيد جدا بصراحة معايا في الحتة دي - بس الصوت و التحمل مش حلو
عايز بس اسال حضرتك -- مقاس السيارة 145/70 13
عايز طبعا اخليه 155 -- فهل كده مش ضرر باي شكل من الاشكال و يكون افضل
وهل زي ما حضرتك قولت --- اخلي ال 70 ل 65 يبقي فعلا مقاسها في الارتفاع -- يعني مخليهوش زي ما هو 70....
عايز ابتدي ادور علي المقاس
مع العلم اني تقريبا لاقيت هانكوك و عامل حوالي 340 الفردة من المقاس اللي حضرتك قولته ده
اسف جدا -- انا جديد في موضوع الكاوتش ده تماما -- ركبت سيارات كتير -- بس اول مرة اغير كاوتشات.

المشاركة الأصلية كتبت بواسطة swimmer25

فعلا 155/65 المقاس المظبوط وأفضل من 145 ومش هيعمل أي مشاكل ولكن هيحسن الثبات والفرامل وهتقدر تحتفظ بالإستبن لأنه هيكون نفس القطر
لكن لو 155/70 هيفرق كتير هيكون عالي وهيخلف على عداد السرعة وال كم

موديل الهانكونك إيه؟ وهل بصيت علي بيريللي او gt

شكرا اخي الفاضل
بالنسبة للهانكوك -- استبعدته تمااااااما -- لانه صاحبي وراهولي في عربيته و عامل بلالين -- والبلالين دي اكتر حاجة بتغيظني في اي كاوتش --ازاي يحصل من شركة نضيفة
بالنسبة ل بيريللي -- نفس الكلام و واحد صاحبي تاني ركبها في شاهين -- و شاف الويل وباظت طبعا معاه
عايز اقول لحضرتك ان اي بضاعة نظيفة عالميا ليست بالضرورة هي التي تاتي مصر
و كمان نضع في اعتبارنا مسئلة النصيب -- ممكن يكون ده حصل معاهم بشكل خاص و ليس الامر عام
بس عامة اميل اكثرل هانكوك - - ده لو مضطر يعني
الجي تي مش عارف اسئل مين - - يمكن لسة سائل محل و قالي ان المقاس ال 13 منه بيكون فوق
ال 165 و ليس 145 او 155
انا بدلت العجل ---- جبت الي قدام ورا و اللي وار قدام --- و عملت حسابي ان شاء الله ان يكون وقت قدامي كافي ادور براحتي -- و اعتقد ان شاء الله ان الكاوتشات ممكن تعمل معايا حوالي 10 الف مش 5 زي ما التوكيل بيقول -- لحد ما اجيب جديد اربع فرد -- خاصة اني مش عايز اغير فردتين فردتين

المشاركة الأصلية كتبت بواسطة d . A .\ ayman

أنا ركبت مرة فولدا ألماني من أرابكوم في مدينة نصر .. واللى بعدها ركبت كومهو سولوس ... ولكنه لم يكمل أكثر من 40 ألف

الفولدا عمل بالونة واتخلع منها جايب آخره تماما بكل ما في الكلمة من معاني ... بس اتحمل كتير برضه طرق سفر وعلى سرعات عالية 90 % من عمره .. وحتى البالونة دي طلعت بسبب مطب غبي لأبعد الحدود وفضلت ماشي عليها شوية لغاية ما غيرته كله

الكومهو اتباعت بيه ومعرفش عمل إيه في آخر عمره

وفي النهاية أي حاجة هاتركبها هاتكون أهدأ في الصوت من الجوديير اللى كان فيها ... واستحالة تلاقي النقشة اللى كانت فيها بتتباع في السوق المحلي ... لأن النقشات اللى بتنزل فابريكا في العربيات بتكون معمولة من شركات الكاوتش مخصوص لشركات العربيات وبتكون خطوط تجميع مخصوصة ومش بيبيعوا إنتاجها في الأسواق الخارجية (ده في الأغلب)

جرب تبص في توكيل فيت أند فيكس ... توكيل بريدجستون .. وفايرستون .. وستارماكس ... ستارماكس دي ماركة تركي نازلة جديدة في السوق وفي ناس بتقول كويسة جدا

جزيل الشكر اخي الفاضل -- دائما موجود عند الحاجة
بس للعلم انا اتصلت ب توكيل بريدجستون قاللي مبينزلوش مقاس 13 خالص
ملحوظة بالنسبة للكومهو -- دائما بيلم زلط و ده حاجة غبية جدا فيه
بالنسبة للجود يير مرة اخري -- هو فعلا صوته عالي جدا -- بس بصراحة عايز اقول ان الفردة دي تحملت الكثير - انا نادرا ما بقل في سرعة السواقة عن ال 120 -- و ده لان معظم سواقتي علي الدائري --- و العربية دي ما شاء الله عليها ثابتة جدا معاه -- جبت بيها قبل كده 155 علي مصر اسماعيلية الصحراوي --

اخي الفاضل -- ما رايك ايضا في تغيير المقاس الي 155/65

و انا ان شاء الله هادور في كل التوكيلات تقريبا الكويسة علي المقاس ده او مقاس السيارة اللي جاي فيها -- و ربنا يسهل والاقي ان شاء الله