ممكن مقارنه فى أسعار قطع الغيار خارج التوكيل بين الشارك وسيراتو كوبيه ياشباب؟
عاوز اشتري كوبيه 2011 او شارك 2008 ومحتار فى موضوع قطع الغيار.
و"خارج التوكيل" لأن الميزانية مش هتسمح بأسعار التوكيل بعد شراء السيارة.
عرض للطباعة
ممكن مقارنه فى أسعار قطع الغيار خارج التوكيل بين الشارك وسيراتو كوبيه ياشباب؟
عاوز اشتري كوبيه 2011 او شارك 2008 ومحتار فى موضوع قطع الغيار.
و"خارج التوكيل" لأن الميزانية مش هتسمح بأسعار التوكيل بعد شراء السيارة.
انا عن نفسى ارشحلك السيراتو الكوبية أفضل بكتير من الشأرك كستعمال وشكل وكل حاجه وأقل ف قطع الغيار كمان وعربيه محترمه ف الموديل دة بصراحه وسحبها احله من سيراتو 2015 وعن تجربه مبروك مقدما أبعد بس عن الشأرك نصيحه
بلاش شارك ٢٠٠٨ فيها مشاكل
خليك يا اخى فى سيراتو احسن وابعد كل البعد عن شارك
اسال في قسم لانسر عليها
سيراتو كوبيه وانت مغمض
انا شخصيا بحس ان الشارك قليله علي الطريق مش بشوفها كتير والنضيف منها قليل وفعلا سمعتها مش حلوه بس معرفش ليه وللامانه انا ولا ركبتها ولا سقتها بس ال اسمعه عنها مش حلو
سيراتو كوبيه
طيب ايه مشكلة الشارك؟.. فى قسم لانسر ماحدش بيرد خالص
وليه كلكم فضلتم الكوبيه؟
انا بالنسبة ليا الفيصل هو اسعار قطع الغيار فلو امكن مقارنة الاسعار خارج التوكيل اكون شاكر
انا فضلت الكوبيه علشان الشكل والاداء
وتقريبا قطع الغيار ارخص فى الكوبيه
بس مشاكل فى الشارك مسمعتش عنها
طيب مفيش اي رابط لاسعار قطع غيار الشارك خارج التوكيل؟ والكوبيه برضو لو امكن ولو ان عندي بعض المعلومات عنها
وهل عفشة الكوبية انشف من عفشة الاسبرانزا 516 اللى معايا دلوقت؟ لان الطريق مكسر شويه انا ممكن ارضى بعربية انشف سنة بس مش لدرجة كبيره تبهدلني
نصيحه ليك لو انتا بتاع جري وغرز وثبات الاتنين مش هيعجبوك انا معايا كيا سيراتو كوبيه 2011 وهيا مش رياضيه خالص والا ثبات والا نيله ودا لاني نزلت من عفشه الماني لعفشه كورى لكن انتا لو ماركبتش الماني قبل كده يبقي خليك في السيراتو
عامتا قطع الغيار
فانوس خلفي رفرف ب 550 جديد من عند الجندي وكيل
الاكصدام الخلفي بيعمل 1300 استيراد كامل
الاكصدام امامي كامل بالفوجات 2000 جنيه استيراد
ازاز مرايه ب120 الواحد اصلي .تقليد ب 60 جنيه
زجاج امامي ب 490 من عند جريش العاشر من رمضان
حاجاتها معقوله يعني من غاليه اوى والا رخيصه
السيراتو الكوبيه من انشف العفشات اللى ركبتها ف حياتى ,, بتحسسك بكل تفاصيل الاسفلت
عموما السيراتو اشيك و تصميمها جميل جدا من بره و من جوه و بالذات من جوه
اشيك من الشارك بكتيييييير و كمان فيها اوبشنز اكتر من الشارك لكن الشارك ارتفاعها اعلى
و عفشتها انعم و اثبت من السيراتو ,, بالنسبة لقطع الغيار ماعنديش فكرة اوى
شوف الانسب بالنسبالك ياباشا و بالتوفيق :)
سيراتو طبعا
بس ماينفعش تقارن بين كوبيه و سيدان !!
واضح ان حضراتكم ملاك كوبيه.. وحضراتكم اتفقتم على ان ثباتها مش حلو.. انا راكب عربية اسبرانزا صيني ومع ذلك ثباتها ممتاز لحد 150 كيلو ( اقصى سرعه مشيت عليها ).... معقول يكون ثبات السيراتو أقل؟؟؟ ولا تقصدوا ان ثباتها وحش لكن على سرعات اكتر من 140 او 150؟
أصل حتى الامجراند جربتها فوق 140 كليو ثابته جدا! معقول السيراتو مش ثابته رغم النشوفيه دي ؟ ولا انا فاهم غلط؟
بص حضرتك انا معايا النترا 2010 وبجيب 200 بس خطر طبعا عاوزه واحد متحكم جدا ومش بيخاف
لو من النوع اللي بتخاف هتمشي بالكوبيه 180 او 170 مع اني شايف السرعه دي قليله اوي
اصل لما بمشي 170 بالالنترا مش بحس بعومان يعني لو ركبت الكوبيه اكيد همشي 200 مرتاح
هما يمكن قصدهم في الغرز و الكلام ده
ولاحظ عفشه الالنترا 2010 نعمه جدا جدا وكمان العربيه عندي جنوط 15 يعني الكوبيه اكيد احسن منها بمراحل لانها عفشه خشنه رياضيه و جنوط 17
اشتري الكوبيه وانت مطمن متخفش
Koup طبعا
انا مش مالك للسيراتو ,, بس بتكلم عن تجربة ( بنفسى ) لسيراتو عادية و كوبيه بتوع اصحابى
السيراتو ثباتها متواضع و مش مبهر يعنى نقول ثباتها كويس لحد 120 او 140 بالكتير اوى و
متاخدش ملف صعب بيها بنفس سرعتك ,, اكتر من كدا يبقى انت مسئول عن نفسك و بتخاطر بعمرك
و العفشة ف السيراتو بالجنط ال 17 ,, ناشفة جدا اما الشارك طبعا اثبت من السيراتو و انعم ف العفشة
الاسبرانزا ال A516 كنا سافرنا بيها من اسيوط للقاهرة من فترة كبيرة و الصراحة مايتمشيش بيها ع 150
و خلى بالك ان موضوع الثبات دا نسبى ,, يعنى لما تجرب عربية اثبت من عربيتك و تجرى بيها
بسرعه انت كنت فاكر ان عربيتك ثابته فيها ,, هتكتشف ان عربيتك مش ثابته و لا حاجة
و خلى بالك ان الثبات مش مجرد احساس و مش بيتقاس بالجرى ف خطوط مستقيمة
الفيرنا ممكن توصل 200 ,, لكنها مش ثابته و تخاف تاخد ملف بيها على 100
و اصلا احنا ف مصر مش محتاجين السرعات العالية و اصلا مفيش عربية تحت ال 200 الف
هتحققلك الثبات و الامان - زى ما الكتاب بيقول - على السرعات العاليه و لو جربت انك تركب الفئة
ال 5 ser او ال E مثلا هتكتشف ان اللى الناس بتعمله بعربياتها دا انتحار اصلا
بص انا هاقول حاجه لحضرتك عن موضوع الثبات انا مشكلتي اني كنت راكب بريليانس frv كانت عفشه الجولف ٤ بالكامل وكان فيها زاويه ميل العجل زى المرسيدس وكل الالماني فكان في ثبات رائع في الطرق الوعره والملفات الشديده لكن الكوبيه عفشه عاديه وعادي العربيه ممكن اجيب بيها سرعات عاليه هيا انا بتكلم لو حاجه طارئه قابلتك في الطريق واخدت غرزه مفاجأه اجمل ميزه في الالماني عدم احساسك بالسرعه يعني انتا لو مش مركز علي العداد هتلاقي نفسك معدي ال ١٤٠ وانتا مش حاسس بالسرعه بعكس الكوبيه
هيا من الاخر عربيه بتدلعك من جوا وشكل رياضي بس لكن مش اداء رياضي
شكرا لردودكم.
عندي فى الاسبرانزا 516 الثبات فعلا ممتاز لحد 140 او 150 وكنت بعمل غرز على سرعات حتى 130 بثبات... وده مع تجربة انواع أخرى على سرعات متقاربه سواء سيارات اخواتى او اصدقائي. زي الصنى والاسبرانزا m11 والكرولا واللانسر بوما.. البوما كانت أحسن واحده وبعديها عربيتي. يمكن عندي الثبات كويس لانى مغير العفشه كلها لعفشة بوما أصلية. والكاوتش ياباني برضو.
فخليني اسأل السؤال بشكل تاني.. هل البوما أثبت من سيراتو كوبيه؟؟؟ لو كده يبقى هجيب شارك وش او حتى أتراج زيرو وهبعد ع7ن السيراتو..
وانا بكل حال من الأحوال مش بعدي 160 . وسرعتى فى معظم الوقت بتكون 120 الى 130
احنا كان عندنا بومه 2008 1300cc خليجي مفهاش عمود اتزان وثباتها مش حلو ولا يقارن بالالنترا حتي
بص انا عندي الالنترا وخد غرز بيها 130 و140 و نفس الشئ ملفات ويمكن اكتر حسب احساسك بالسواقه
الالنترا لو مشت 200 كم/س طوالي معقول بس عاوزة واحد بيسوق كويس مش بغشوميه عشان لو حبيت تفادي ده وده
السيراتو شكل وفخامه و رياضيه و بتجذب نظر الناس وشايف ثباتها جيدا جدا لحد 170-180 كم/س ولله انا لو مكانك سيراتو بدون تردد
انا نفسي افهم مالكها بيشتكو من ثباتها امال الناس اللي بشوفهم في الصحرواي اللي معاهم العربيه دي طياره ليه!!! وبشوفهم بيخدو غرز غير عاديه و صعبه اصلا
مره شديت مع واحد وكان هو راكب سيراتو كوب و عداني واخد غرزه قدامي ملهاش حل و قعد يتنطط من حاره لحاره ومشفتش العربيه بتعوم
البومة ثباتها كويس لكنه مش اسطورى رغم انها مالتى لنك لانها ف الاخر تكنولوجيا قديمة حوالى 10 سنين
و برضه مش كل المالتى لنك ممتاز و عندك الالنترا ال hd اكبر مثال على كدا لانها رغم ان
عفشتها مالتى لنك الا ان ثباتها متواضع اوى و اقل من البومة ف الثبات و دى فروق بين الشركات
المهم ان السيراتو و البومة ثباتهم مش بعيد اوى عن بعض و ان كنت برتاح اكتر ف البومة لانها ماللتى لنك
عكس السيراتو اللى عفشتها تورشن بيم و بالتالى شنطتها بتلعب
الخلاصه ان الشارك ثباتها اعلى من البومة و من السيراتو
اشترى سيراتو لو عايز شكل مميز و اوبشنز كتييييييييييييييييييير ,, اشترى شارك لو عايز ثبات اعلى
مع احترامي ليك بس انت مجربتش السيراتوا اللي فيها esp و traction control لو كنت جربتها كنت غيرت رأيك
وهزاود علي اسعار قطع الغيار
فانوس خلفي شنطه 450
فانوس امامي هاي لاين ماتور لرفع النور في الطرق الضلمه 1200
فانوس امامي عادي 700
تيش ميزان 130
الفلاتر و البوجيهات اسعار الكوري عادي
الاسعار من الجندي في شارع دمشق
والله يا جدعان انا معايا سيراتو كوبيه وساكن في الشروق وشغلي في شيراتون فا كل يوم طريق السويس والحمدالله معايا لغاية ال 170 غرز وملفات انا بتكلم اللي فيها ال esp و traction control لان بيبقي في 5 سنسور في العربيه 4 علي العجل وواحد في الدركسيون فمثلا وانا ماشي وبلف يمين هو بيضبط سرعه كل عجله علي حسب لفه الدركسيون ده كلام الكتالوج وكمان وانا داخل اي ملف زي نزلت كوبري الاهلي لطريق السويس لو نزلت بسرعه بلاقي العربيه esp اشتغل والعبيه عدلت ونور اللمبه بتاعتوا في الطبلوه وكمان لو علي رمله وكبست بنزين العربيه ما بتنقلش للتاني وال ار بي ام بيعلي والعربيه ما بتنقلش للتاني
من الاخر عشان تعرف فرق ال esp و traction cntrol
جابوا عربيتين سيراتة كوبيه علي برنامج في اليوتيوب واحده فيها وواحده مفهاش ومشهوم علي طريق نصوا اسفلت ونصوا رمله وهما الاتنين داسوا فرامل واحده وقفت في خط مستقيم وواحده طلعت بره الحط خالاص
انصك لو هتشتري دور علي اللي فيهم esp و traction control
م\ شريف محمود
شكرا...
لا ياباشا ,, انا اقصد البومة ال 1600 موديلات قبل 2010 (الفتيس ال CVT مش الستيب)
انا ركبت ال 2 و فعلا البومة ثباتها احسن الالنترا ال HD
ال esp مانزلش الا ف مصر ف عربيات قليلة جدا خليجى و مانزلش ف موديلات الوكيل
اعتقد موديلات السيراتو الكوبيه السعودى هى اشهر حاجة كانت بتنزل ب esp
فا احنا بنتكلم عن السيراتو من غير esp و دا حال اكتر من 99% من السيراتو اللى ف السوق
و مفيش كلام طبعا عن اهميه ال esp ف الثبات و عن الفرق الواضح مابين ثبات عربيه فيها esp
و عربية تانية مافهاش
عشان مفتيش انا مركبتش 1600 cc بس كان عندنا بومه 2008 1300cc خليجي وكانت وحشه اوي بالاخص في الفرامل و الثبات..... وناس كتير اجمعت ان 1600 اثبت من 1300
الالنترا اللي ركبتها كانت جنوط ولا طاسات؟ العربيه عندي كويس وعمرها ما عامت مني مع اني متهور جدا .... ع فكره موضوع ان الدريكسيون خفيف و واحد مش متعود عليه بيخلي العربيه تعوم منك اوي
اخويا عنده اوكتافيا a4 و لما ساق الالنترا عامت منه في ملف تافه بسبب انه مش متعود علي الدريكسيون الخفيف ولما اخد علي عربيتي بقي بياخد نفس الملف بس بسرعه اعلي بدون اي عومان
بالمناسبه انا كان عندي مشكله في الباور الكهربا بتاعت الدريكسيون ولما الراجل صلحه الدريكسيون بقي اتقل شويه و بقيت مرتاح اوي لاني واخد علي دريكسيونات الالماني ( جيتا- اوكتافيا- جولف)
ولله اول ما اشتريت العربيه كانت العربيه مش بتعرف ثبت مني في طريق مستقيم لانه خفيف اوي ...، لما تقل بقيت عارف اتحكم عليه اوي والعربيه بحس بثباتها وبعدي 200
الالنترا اللى ركبتها طاسات ياباشا ,, و فعلا الباور بتاعها ناعم اوى و عايز تعود كويس اوى
و لو حد متعود على باور زيت او active steering ,, هيتعب مع الالنترا
و للاسف مسوقتش اللانسر ال 1300 بنفسى عشان احكم بس اسمع ان عفشتها مختلفة و مافهاش ميزان
الجيتا و الاوكتافيا فعلا الباور بتاعهم جميل اوى و بيدى تحكم ممتاز
ما حضرتك محستش بثبات بسبب ان العربيه طاسات و مش واخد علي الدريكسيون بتاعها خالص
لا جرب سوق لانسر 1300 وهتيجي تقولي الالنترا بتاعتك اسطوره ثبات D:
فعلا العفشه مختلفه ومفهاش ميزان.. حضرتك والدي كان بيسوقها وكانت بيشتكي منها امال لو شاب بتاع غرز و سرعات وكده هيقول ايه .. العربيه الوحيده اللي خفت اعمل بيها غرز هي لانسر ....
اوكتافيا تحكمها حلو بس اصلا موتور ميت
الجيتا عندنا قويه عشان فيها فتيس dsg فالواحد بيتمتع بقوتها بس برضو ضعيفه بالنسبه لالنترا
أنا ركبت اللانسر الـ 1300 و الـ 1600 ومفيش مقارنة.. الـ 1600 كانت اثبت بكتير جدا.. وانا ماعرفش ايه السبب التقنى عشان مافتيش.
وعندي فعلا الثبات جيد جدا فى الاسبرانزا وانا مركبلها عفشة لانسر بالكامل.
واللى فهمته من مجمل مناقشات حضراتكم ان الكوبيه أشيك شكلا من جوه وبره وانا متفقع معاكم طبعا.. وثباتها هيكون احسن من عربيتي الحالية لكنه هيكون اقل من الشارك.
والسحب فى مصلحة الكوبيه عن الشارك لكن الفرق مش كبير.. لو ضربنا الآراء دى كلها فى الخلاط وطلعنا بالخلاصة يبقى الشارك ان شاء الله :)
مع الاحتفاظ بنظرة الإعجاب والدعاء لصاحبها بالبركة كل ماشوف سيراتو كوبيه معديه :)
فعلا 1600 اثبت بكتير من 1300
بجد يا استاذ احمد هتندم لو انت اشتريت الشارك وانت معجب جدا بالسيراتو ولله هتكره الشارك خالص
بتفكرني بنفسي لما كان نفسي اشتري اكسنت rb و قومت شاري النترا hd ولحد الان لما بشوف الاكسنت بندم اني مجبتهاش عشان شكلها حلو جدا مع ان الاتنين نفس المكنه و الفتيس بس شكل rb احلي
تحياتي راجع كلامي كويس و جيب اللي انت نفسك فيه و لله ثبات السيراتو الكوبيه هيكون حلو و اكيد احسن من عربيتي الالنترا hd بمراحل
صدقني 180-190 في السيراتو الكوبيه هتبقي كويسه ولو فيها esp هتعيش
متنساش الشارك شكل قديم وبقاله فتره زي الالنترا hd
عكس الكوبيه شكلها مبقلهوش فتره وكمان شكلها جذاب اوي