أنا فعلاً سوقت العربيه دي من خالي هو لسه جايبها اعلى فئه وطلعت جربتها معاه
بصراحه أنا انطباعي عنها رائع بعد التجربه مكنتش متوقع منها كده
- بصراحه كنت متخيل اني هلاقي نفسي راكب سلحفه لكن الصراحه لقيت الاداء في التجميع جيد بشكل كبير
- وفعلاً لفت نظري قطر الدوران اللي بيخلي العربيه تلف في المساحات الضيقه بشكل اسهل
- موضوع صوت الماتور العالي مش قادر احكم عليه اوي يمكن عشان مكنتش مركز فيه وكنا بنتكلم فمأخدتش بالي منه
- ارتفاع العربيه عن الارض كويس فعلاً
- التكييف بصراحه مجربتهوش ومش عارف تاثيره على السحب ايه وقوته أيه ؟؟
- نقلات الفتيس ناعمه ومتحسش بالنقلات
- العفشه كنت حاسسها ناعمه بس برضوا مش متاكد اوي عشان كنت ماشي في شوارع نضيفه لحد كبير ومفهاش نقر وحفر كتير
- ومن الحاجات اللي عجبتني وممكن تلفت نظر اي حد راكب كوري اني مسمعتش اي صوت تخبيط او تزيق جوه الكابينه لا من التابلوه ولا من الابواب (معلش بقى اصلي معقد من الموضوع ده فباخد بالي من حاجات عجيبه )
- الثبات بقى على السرعات العاليه هسيبها بقى للي معاهم العربيه يقولوا رايهم عشان أنا مجريتش بالعربيه جامد عشان اقدر أقيم الثبات
- الباور ناعم وخفيف كنت متوقع تكون اتقل من كده بكتير بس فاجئتني (بالمقارنه بالماتريكس والريو اللي معايا هي أنعم واخف من الماتريكس كتيييير لكن اتقل من الريو شويه)

بصراحه بعد ما جربتها حسيت للحظات اني غلط لما جبت الريو بدل اللانسر الشارك وجه في دماغي ان لما الاتراج الـ 1200 سي سي ادائها كده يبقى اللانسر كانت هتبقى عامله ازاي بقى
بس الاحساس ده راح لما افتكرت فرق اسعار قطع الغيار الرهيب بين الريو واللانسر
بس بصراحه برافو متسوبيشي