الموضوع: تقييمى للأوبل استرا 2004 ومقارنة بينها وبين النيو أكسنت

السلام عليكم ورحمة الله وبركاته

اولاً وقبل اي حاجه انا بحيى وبشكر ناس كتير أوى فى القسم هنا على مساعداتهم وعلى انهم فعلاً مبيبخلوش على اي حد بأى معلومة عندهم وبيحاولوا يساعدوا الناس الى مش فاهمة او الناس الجديدة بأى طريقة .. ربنا يكرمكم بجد وانا على كلامكم إتحديت أهلى والناس كلهم وبيعت النيو اكسنت 2006 وجيبت اوبل استرا 2004
العربية اهى معايا بقالها شهر تقريباً .. سافرت بيها اسكندرية وكان معايا حمل فى العربية وماشى على 160 ~ 180 كنت قافل الإزاز و الفكرة انى مكنتش حاسس بالسرعة اصلاً انا ببص مرة واحدة على العداد لقيتنى معدى الـ 160 !! بس المشكلة ان الازاز مبيعزلش الحرارة كويس بس ده حله بسيط .. فاميه والموضوع خلص.
.. مرة تانية كنت رايح مشوار للشيخ زايد و لما خدت وصلة أكتوبر من الدائرى الى بيمشى فى الطريق ده اكيد عارف الملفات الى فيه .. انا ماشى فى امان الله على 130 ~ 140 لقيت عربية لانسر جنبى وبيسبقنى .. محطتش فى دماغى الصراحة بس جيت عند الملف لقيته بيهدى وانا داخل بسرعتى عادى جداً باخد الملف حسيت بإنتصار فظيع منغير ما احرق بنزين
مشكلة العربية ان سحبها ضعيف شوية فى الأول فعلاً بس اول ما بتطلع على الطريق مبتبقاش قادر توقفها, وبرضه فى الآخر كله حسب سواقتك ..
بالنسبة للنيو أكسنت كنت اول ما بوصل 140 بحس ان العربية بتتشقلب بيا !

التقييم : الاكسنت :-
التسارع 9/10
افصى سرعة 8/10
ثبات 6.5/10
عزل الكابينه 7/10

الاسترا :-
التسارع 8/10
اقصى سرعة 8.5/10
ثبات 9/10
عزل الكابينه 9/10



بالنسبة لشغل الميكانيكا .. واسعار قطع الغيار
الصنايعيه بصراحه بيكرهوا الأسترا بسبب تقفيلها :D .. لدرجة انى لما جيت اغير زيت روحت بنزينه قالى انت عندك مصفحة تحت قلتله اه قالى لأ مبنغيرش هنا لعربيات استرا :D .. فرق التقفيل واضح جداً جداً بين الالمانى والكورى .. لدرجة ان فى الاكسنت ساعات انا الى كنت بشتغل فيها بنفسى مع انى مش خبير يعنى فى شغل الميكانيكا او الكهربا .. بس انا قعدت نص ساعه عند العفشجى عشان نفك مساعد الاسترا ! .. بس الحق يتقال الاكسنت مكانش فيها عيوب تقفيل قاتله يعنى .. او يمكن مكانش فيها عيوب اصلاً بس فرق التقفيل يبهرك فعلاً على الرغم من انها تقفيل برازيلى مش ألمانى.
بالنسبة لقطع الغيار .. هيا جملة واحدة بس " انا ممكن اجيب عفشة امامى كاملة للأكسنت لو فاصلت مع الراجل شوية بتمن جوز مساعدين الأسترا "
اسعار قطع غيار الاسترا غالية جداً مقارنةً بالأكسنت .. خصوصاً مع فكرة ان حاجتها الى فى السوق كلها تركى وصعب اوى تلاقي حاجه المانى غير فى مقار مثلاً ولو لقيتها هتلاقيها غالية أوفر
بس فى النهاية الى بيشترى العربية عارف انه بيشترى عربية قطع غيارها غالية يعنى ده مش حاجه تعيبها ..

التقييم : الاكسنت :-
التقفيل : 7/10
اسعار ومدى توافر قطع الغيار : 9/10

الاسترا :-
التقفيل : 9/10
اسعار ومدى توافر قطع الغيار : 7/10



نيجى بقى لبطن العربية .. الى هو وسع العربية ووسع الشنطة انا بسميهم بطن العربية :D
الاسترا واسعة بسم الله ماشاء الله يمكن زى الاكسنت بالظبط او اكتر بس مشكلتها ان لو واحد طويل قعد ورا مش هيعرف يريح رجليه بسبب الكراسى الى قدامه وهيبقى مزنوق .. الشنطة واسعة جداً انا دخلت نمت جواها الحقيقة :D
الاكسنت بقى مفيش كلام عن وسعها انا كنت بركب معايا 8 تنفار .. والشنطة برضه كويسه إلى حدٍ ما بس مش بوسع الأسترا..



التقييم النهائى :
الاكسنت عربية إعتمادية زى ما بيقولوا .. لو عاوز قطع غيار رخيصة وشغل سهل تعمله عند اي حد يعنى من الآخر عربية لو اكصدامها وقع هتروح تجيب غيره بـ 250 جنيه ولا هتفرق معاك .. يبقى إتجه للأكسنت

أما لو عاوز عربية راحة وفخامة وثبات وأوبشنز .. عربية من الآخر لو لبست بيها بلاعة وانت بتجرى متحسش انك لبستها اصلاً .. الأسترا احسن بكتير .. بس تعمل حسابك إنك كل يوم هتنزل من بيتك قلبك على العربية لحسن تنزل تلاقيها مخبوطة لا قدر الله ولا عيل ابن حلال كاتبلك عليها إسمه بمسمار ولا مفتاح .. لإن تمن إكصدامين العربية دى بمرتب أسره كاملة :D


انا طولت عليكم معلش .. بس فيه ناس كتير كانت زيى ومكانتش عارفه تعمل ايه وطبعاً الله يكرمهم الناس مبتبطلش كلام وفتاوى ويقولك دى وحشة ودى مش عارف مالها ولكن رغم كده انا فى الآخر كبرت دماغى واشتريتها الحمد لله ..

المشاركة الأصلية كتبت بواسطة haisam ali

الف مبروك ياريس وتقرير محترم بجد يوضح الفرق ال اجمالى لتقييم العربيه عشان اللى بيقارن ... ربنا يحفظهالك ويديك خيرها ويكفيك شرها

الله يبارك فيك يا باشا .. ونورتنى

المشاركة الأصلية كتبت بواسطة kar!m

ألف مبروك .. أنا عكسك بأه .. بعت الكورسا و الفيكترا و جبت نيو أكسنت و كلامك صحيح الى حد كبير.

الله يبارك فيك يا فندم .. وربنا يحفظهالك ويباركلك فيها إن شاء الله