حيرة السنين .. يرجى الأفادة

**tamtam201033** · 14-10-2014 11:32 AM

دى أول مشاركة ليا
انا محتارة اجيب بى واى دى اتوماتيك قسط
المميزات
عربية عائلية
اعتمادية
منتشرة
متجربة
معمولة تاكسى يعنى مش محتاجة كلام كتير

عيوبها بالنسبالى
ضخمة اوى
التابلوه شكله مش عاجبنى بالخشب البنى اللى فيه
قسط عالى شوية
التوكيل معرفش عنه حاجة مش ضمناه يعني

العربية التانية اللى كنت بفكر اجيبها
الجيلى الباندينو
الناس اللى استخدموها قالولى كويسة اوى
مميزاتها بالنسبالى
مواصفاتها عاماً 1500 سى سى وفيها كل الاوبشن
مش ملطشة وهتخدمنى فالطريق لصغر حجمها عن بى واى دى
قسطها مناسب
توكيل غبور وكويس مجرباه مع الهيونداى
عيبها
انى لسه عندى حتة القلق من الصينى حتى مع بى واى دى بس الفرق ان البى واى متجربة كتير ومهروسة فالشارع

مش عائلية يعنى لو سفر او حاجة تناسبنى لوحدى او حد بس معايا مش الاسرة فالبيت يعني

معرفش هتتحمل معايا اكتر من 5 سنين ولا لا

اللى مخوفنى فالمجمل
انى اجيب عربية اخاف اندم لان هقسط 5 سنين ودول مش قليلين
كمان دى عربية العمر زى ما بيقولوا فلو هدفع ادفع بالمرة

ناس هتقولى ليه متجبيش بيكانتو ولا I10 هقول حرام ادفع المبلغ ده كله فى عربيتين بالحجم والمواصفات دى حتى لو اسم كبير

ومقتنعة ان الاسم الكبير كان صغير برضوا فى يوم من الايام
والصينى دلوقت مش زى من 3 او 4 سنين
وحتة التوكيل دى ممكن تهدى الواحد شوية ان اكيد مش هيضيع أسمه فى حاجة مش ضامنها

حابة أسمع نصايح بس ناس عن تجربة مش كلام نظرى
لأن لفيت فالنت وشوفت كلام ناس بتفتى وناس بتتكلم وخلاص وفى ناس عاقلة وبتحط نفسها مكان الواحد
وشكراً ليكم

**hardmind_doc** · 14-10-2014 12:42 PM

مبدئيا فى بى واى دى l3 نزلت ومفيش منها اوتوماتيك
يعنى حضرتك لو عايزة اوتوماتيك هتضطرى تجيبى ال f3 بس انا شايف انها ضخمة رغم انى مقتنع بيها
الباندينو سمعت انها بتحك فى المطبات بس انا معرفهاش الصراحة
لو مش فارق الاوتوماتيك اوى
بصى على اللوجان والبريليانس اف ار فى عربيات محترمة

**mody112** · 14-10-2014 12:52 PM

طبعا بى واى دى وبالنسبة للحجم الكبير مع الوقت هتاخدى عليه عادى جدا

**tamtam201033** · 14-10-2014 02:15 PM

ماهو لو مش فارق الاتوماتيك هجيب عربية تانية خالص وبنفس الاسعار
لكن بلدنا مافيهاش سيولة مرورية ولا شوارع يتمشى فيها عدل
وجنيه منه للأرض
معرفش هنروح فين تاني

**عبده غريب** · 14-10-2014 02:56 PM

بصراحة يا جماعة انا كنت متحمس للbyd وكنت بفكر اشتريها والحماس سببه بعض الاخوة الموجدين فى القسم هنا بالرغم من معارضة كل اقاربى واصدقائى لها فقررت اروح اشوف العربية على الطبيعة عند سمير ريان وجدت عنده l3الجديدة واتفرجت عليها وكان معايه واحد صاحبى متخصص فى العربيات وبصراحة اتصدمت من العربية تقفيل وخامات اسوء ما يكون من الداخل ومن الطبلوه ومن الدهان ومن الشكل العام لحوض الموتور وبصراحة لسه بدرى ياجماعة على الصينى وخاصة المجمع فى مصر وده رايى حتى لو اختلف معه الاخرون

**tamtam201033** · 14-10-2014 05:33 PM

الباندينو مستورة بالكامل وتقفيل صيني

**Moe Khodairy** · 14-10-2014 10:26 PM

المشاركة الأصلية كتبت بواسطة عبده غريب

بصراحة يا جماعة انا كنت متحمس للbyd وكنت بفكر اشتريها والحماس سببه بعض الاخوة الموجدين فى القسم هنا بالرغم من معارضة كل اقاربى واصدقائى لها فقررت اروح اشوف العربية على الطبيعة عند سمير ريان وجدت عنده l3الجديدة واتفرجت عليها وكان معايه واحد صاحبى متخصص فى العربيات وبصراحة اتصدمت من العربية تقفيل وخامات اسوء ما يكون من الداخل ومن الطبلوه ومن الدهان ومن الشكل العام لحوض الموتور وبصراحة لسه بدرى ياجماعة على الصينى وخاصة المجمع فى مصر وده رايى حتى لو اختلف معه الاخرون

كلام غريب جدا! هي طبعا وجهة نظرك و تحترم... بس انا مش عارف ايه اللي سئ في التقفيل و الدهان؟! حضرتك اول واحد يقول كده! الا لو حضرتك بتقارنها بالمرسيدس او البي ام دبليو مثلا.

بالنسبة لل l3 ففي منها اوتوماتيك و موجود من فترة و في موضوع كامل في القسم هنا لزميل بيحكي فيه تجربته، على عكس كلام الزميل اللي بيقول مفيش منها اوتوماتيك

و ده موضوع الزميل
http://www.nilemotors.net/Nile/443423-l3-250-a.html

و ده موضوعي انا و تجربتي في قيادة و شراء السيارة http://www.nilemotors.net/Nile/440716-l3.html