تجرة قيادة الرائعة 406 ومقارنتها بتجاربي السابقة
بسم الله الرحمن الرحيم
السلام عليكم ورحمة الله وبركاته
أخواني الأعزاء في قسم بيجو
تحية طيبة،
النهاردة كانت اول مرة اسوق البيجو 406 رغم عشقي الشديد ليها منذ اوائل ظهورها في 95 وطبعا زاد عشقي لها بعد طرح النسخة المحسنة منها في سنة 2000
بداية الحكاية ان اخويا اشتري البيجو النهاردة موديل 2002 قراءة العداد 225,000 فتيس أوتوماتيك وهي تقريباً نفس اللون دة
من اول لما تركب العربية وتقعد علي كرسي السواق وتمسك عجلة القيادة تحس فيها بالفخامة
انا كنت ركبت واحدة مع حد زميلي موديل 96 (الشكل القديم) وحسيت بردو نفس الأحساس وانا قاعد جمبه
يالا نبدأ في تجربة القيادة
بعد استلام السيارة من صاحبها ، اخويا راح ركب الفوج لايت الشمال عشان كان مكسور وبعدها اتصل بيا وقابلته وهنا اداني المفتاح وقالي خد سوق انت (كنا رايحين مشوار) لأنه بيحب يخليني انا اسوقله عربيته وطبعا عشان اقوله تقييمي ليها واباركله عليها
المشوار كان فيصل ودخلنا حتة اسمها نزلة السمان في نهاية الهرم
أول ملاحظة علي العفشة
الله اكبر العفشة بتاعتها بجد مريحة جداً جداً جداً ولا احساس نهائياً بالمطبات او الحفر او الشقوق او او او وشاكك والله اعلم انها تكون مالتي لينك (برجاء الأفادة)
غير طبعاً ان ارتفاعها عن الأرض معقول جداً وماحكتش مني في ولا مطب ولله الحمد
ثاني ملاحظة صوت المحرك
مسموع إلي حد كبير خصوصاً في الطلعة
خلصنا مشوارنا وبعدها قولتله لازم تعزمني علي العشاء حلاوة العربية الجديدة واقترحت عليه مطعم سوري بحب اكل دايماً عنده في 6 أكتوبر
روحنا كان هو اللي سايق بمتوسط سرعة من 90 إلي 110
خلصنا العشاء وقولتله هات انا اللي هسوق :3mla:
أنطلقت بيها وطلعت علي طريق الواحات ودة لأني حافظه عن ظهر قلب وعارف فين مطباته وفين اجري وامتي أهدي
ثالث ملاحظة علي التسارع
بطئ شوية لو طالع زي البني أدمين واتوقع منها المزيد لو تقلت رجلي شوية علي دواسة البنزين ولكنها بتستجيب لما بضغط شوية بعد الطلعة البطيئة بتاعتها
تسارعها بيتم بشكل smooth وتحسها راسية اوي في جريها وكان متوسط سرعتي 110 - 150
لاحظت اني لما بكبس لها انها بتبدأ في تغيير نمط القيادة ابتداء من اللحظة اللي بتكبس فيها وبدل ما كانت بتنقل علي مثلا 2 RPM انها بدأت تأخر شوية وتنقل علي 3 و مرات بتوصل لحد 4 RPM ومن غير ماتعمل كيك داون وشغل العباطة بتاع النوبيرا
كمان لاحظت ان ليها اكتر من نمط قيادة وليس نمطين فقط (قياسي و رياضي) بمعني
ان لكل مستوي ضغط علي دواسة البنزين نمط قيادة لأنها مع الضغط الخفيف بتنقل علي 2 RPM ومع الضغط الأزيد شوية تنقل علي 2.5 RPM تضغط اكتر تنقل علي 3 تضغط اكتر تنقل علي 4 RPM
رابع ملاحظة علي ناقل الحركة
اللهم صلي علي النبي - الله اكبر ماتحسش نهائي بنقلات الفتيس غير بس من عداد الRPM لما تلاقيه نزل ورجع يطلع تاني فتعرف انها نقلت علي الغيار الأعلي ولحد دلوقتي انا مش عارف هي كام غيار (اعتقد 4)
خامس ملاحظة علي العزل
الله اكبر لما بتقفل الزجاج بتاع الأبواب ماتسمعش خالص لا صوت طريق ولا صوت محرك
طبعاً معروف عن طريق الواحات انه فيه مطبات كتير ابتداء من وادي دجلة وحتي دريم
وهنا كانت تجربة الفرامل
سادس ملاحظة علي الفرامل
الله اكبر الفرامل بتاعتها حلوة واعتقد تسعفك كويس اوي في الفرامل الفجائية
لأني لاحظت كمان عليها ان الفتيس بيسقط غيارات ويساعد معاك بـ Engine Break
وهنا اخويا قالي مصطلح عجيب جداً كان سمعه من احد ملاكها وهو ان فتيسها بيسموه فتيس شفط :cry:
سابع ملاحظة علي الثبات
اقدر اقولك انها أشبه ما تكون بالأوبل فيكترا في ثباتها والمناورة بيها لأني أخدت بيها كام غرزة علي سرعات 110 و 130 والله اكبر ثابتة وبتوجها زي مانت عايز في الأتجاه اللي انت عاوزه وقت ما تحب
طب اسمحولي بعد سرد تجربة قيادتي للبيجو 406 اني اقارنها بشوية عربيات تانية كان ليا معاهم تجارب قيادة منهم تجارب سعيد بيهم ومنهم تجارب مستعر منها :Zb_sor1[1]:
اولا هقارنها بعربيتي العزيزة سيات ابيزا 99
طبعا كحجم : البيجو
كاستجابة وموتور حامي : الأبيزا (يمكن اكون غير منصف لأني مكنتش بفتري في الطلعة بالبيجو 406)
فرامل : بيجو
عزل : البيجو اعلي شوية
عفشة ونعومة في المطبات : بيجو
ثبات : البيجو اعلي شويتين
ثانيا هقارنها بالأوبل فيكترا 96 (الفراشة)
الحجم متقارب جداً
استجابة موتور وتسارع : الأوبل - بصراحة الأوبل بالمحرك ال2.0 الأيكوتيك علي الفتيس الأوتو بتاعها تطلع من البيجو بفارق كبير اوي
فرامل : متقاربة جداً
عزل : البيجو أعلي شوية
عفشة ونعومة : البيجو انعم كتير
ثبات : متقارب جداً رغم ارتفاع البيجو عن الأرض بمسافة اكبر من الأوبل اللي كانت لازقة في الأرض وبتحك في اهيف مطب
ثالثا هقارنها بالدايو نوبيرا (لمجرد ان في تقارب في السعر والموديل)
الحجم : متقارب كصالون وشنطة
استجابة الموتور والتسارع : الدايو تحسها عيلة هبلة فاتحة بوقها وبتجري :bump1:
فرامل : مانصحكش تقارن بينهم لأن الدايو فراملها هي اسرع طريق للجحيم
عزل : الدايو فاتح الشباك زي قافله كصوت وهوا داخلك من كل اتجاه حتي وانت قافل الشباك ومتغطي
عفشة ونعومة : الدايو نوبيرا لو حابب تفك الجبس لواحد متجبس ركبه في الكنبة الخلفية
ثبات : اسهل طريقة للأنتحار
اتمني الموضوع يكون عجبكم واكون وفقت في تقييم البيجو 406 وحابب جداً اسمع تعليقاتكم ونصايحكم
تحياتي للجميع
اخوكم من قسم سيات
م/ محمد سيد
