عموما رأي حضرتك في سواقتي مش هايتعرف من انفعالي بسبب الكلام اللي بيتقال ده، ومش معنى اني مهتمة بالموضوع اني تنطبق علي القاعدة دي.اقتباس:
ما لو احنا فى دوله محترمة زى السعودية مكنتيش حضرتك اهتميتى بالسواقه او منتديات السيارات اساسا !!!!
يعني حضرتك شايف مصر دولة مش محترمة وشايف ان السعودية فعلا دولة محترمة بس عشان منعت السيدات من السواقة ده على اساس ان سواقة العربيات دي شئ مخجل وذنب ميصحش ان الستات ترتكبه؟
عموما الاهتمامات دي حاجة ترجع للشخص نفسه ومفيش دولة في الدنيا تمنع شخص من اهتمامته ومحدش في الدنيا يقدر يفرض عليا اهتم بإيه او مهتمش بإيه وايه هي المنتديات اللي المفروض ادخل عليها وايه المنتديات اللي محظور عليا الدخول فيها.
واعتقد ان مش من ضمن قوانين المنتدي اللي قريتها وانا بسجل عضويتي هنا انهم قالوا ممنوع دخول البنات والسيدات في المنتدي ده او كتبوا عليه ررجال فقط وصدقني لو كنت لاقيت كده ولا كنت فكرت ادخل هنا اساسا.
بس انا داخلة اتعلم واستفيد واعرف اراء الناس في كل شئ سواء خاص بالسيارات او غيره ( وراجع حضرتك المنتدي الاجتماعي ومنتدي الاخبار المنقولة) اعتقد انه مش خاص بالسيارات فقط.
انا لو مكانه اول حاجه هعملها هطلع القرار ده ..
(واللى عايزة تجيب عربيه تشوف لها سواق او تركب تاكسي) مش فيزياء هى !!
طيب وتضمن منين ان السواق ده هياحافظ عليها فعلا ومش هايتعرضلها بأي اذىمن اي نوع حتى ولو معاكسة وطبعا كلنا سمعنا عن حوادث من النوع ده؟
بالنسبة للتاكسيات انا فضلت اكتر سنة ونص بركب تاكسيات بصفة يومية ووالله والله شوفت الويل وكنت بعيط كل يوم من اللي بشوفه من اول انهم اصلا مبيرضوش يروحوا المشوار اللي بطلبه لانه يإما قريب اوي فمش هايتدفع فيه فلوس كتير يإما بعيد اوي فهو مش طالبة معاه يطلع بره المنطقة النهاردة يإما شكل اللي موقفاه مش عاجبه ماهو فاكر نفسه ملاكي مش تاكسي.
واللي ربنا بيهديه ويوافق يوديني مشواري يإما يقعد يرغي طول الطريق عن مشاكله وهمومه مع الحياة عشان يستعطف اللي راكبة معاه فتزودله الاجرة شوية يإما يكون شاب وشايف نفسه وعايز يتعرف ويروش مع الزبونة اللي راكبة معاه وكده
ولو مطلعش حد من دول خالص يإما بيرفض انه يدخلني لحد باب الشركة بتاعتي عشان ده شارع جانبي وهو مبيحبش يدخل في شوارع جانبية :2: (مع العلم انه شارع واسع ويساع عربيتينواخره برده بيرجعه على الطريق الرئيسي تاني) يإما بيطلب ضعف الاجرة أو اجرة مبالغ فيها رغم انه مشوار يومي والمفروض اني عارفة اجرته كام ولو مديتلوش اللي هو عايزة هايقل ادبه ويسمعني كلام يحرق الدم على الصبح.
دي التاكسيات اللي المفروض انها اغلي من مثيلاتها من المواصلات التانية واللي المفروض اننا نركبها لو بنحترم نفسنا وبنخاف علي نفسنا فمابالك بقي بباقي المواصلات بيحصل فيها ايه؟
تخيلى نفسك من اسرة فقيرة ولا تملكى حق شراء سيارة جديدة
كنتى هتقولى كده او كنتى هترضي ان حد يقول عليكى كده !!!!!!!!!!!!
وكمان الناس دى لو معاها اموال كانت جابت سيارات هى كمان....!
ومين قال لحضرتك اني من اسرة غنية ولا بتكلم كده كنوع من التعالي علي الناس لا سمح الله.
الغني هو الله ومش معنى اني قدرت اجيب عربية يبقي انا من الاثرياء.
والعربية دلوقتي مبقتش من وسائل الرفاهية دي بقت من الضروريات واي بني ادم عايز يفضل محتفظ بأدميته فهو مجبر انه يشتري عربية وانا عن نفسي جبتها مجبرة عشان اروح شغلي ومشاويري واقضي بيها مشاوير عيلتي عشان والدتي لما كانت مريضة مكنتش بتستحمل ركوب المواصلات ولا الوقفة في الشارع عشان تستني تاكسيات وكانت ليها زيارات طبية بصورة مستمرة.
وانا مش بقول الكلام ده على الناس الغلبانة الطيبة اللي بتركب مواصلات بس عشان تروح مصالحها وقاعدين في حالهم، انا بتكلم على منعدمي الضمير والاخلاق اللي بيركبوا المواصلات لأهداف تانية خالص بعيدة عن الاحترام ولا تمت لسلوك البني ادم بصلة واللي بيركب وهدفه انه يحاول يتحرش بأي بنت راكبة جنبيه لمجرد انها انثى وخلاص.
وكمان كمية الشتايم القذرة اللي الواحد بيسمعها من سواقين الميكروباص واللي بيقولوها عادي جدا في هزارهم مع بعض ده غير الاغاني الزبالة اللي بيشغلوها ويعلو الكاسيت بطريقة مستفزة واللي ينطق ويقولهم وطوا شوية عشان معايا تليفون ولا عشان مصدع يقوله مش عاجبك انزل بمنتهي السفالة وقلة الادب.
ده غير انه هينزلك في اي مكان ان شاء الله في نص الشارع وينزلك ووميقفش يستني لحد ماتنزل لا يجبرك انك تنط من الميكروباص عشان خاطرسيادته مستعجل وعايز يمشي ومش مهم بقي اللي ينزل ده ينزل يتقلب على وشه ولا ينزل قدام عربية تاني تشيله وتموته مش مشكلته هو خلاص عمل اللي عليه ومشي مالوش دعوة بقي بالباقي.
وكمان الناس اللى قالت رايها دى مش بتكذب يعنى ولا بتهاجم حد
دى ناس بتقول رايها وخلاص
واللى بتعرف تسوق ومحترفه ومبتعملش 1000 مشكله فى اليوم وتخلى فى كل شارع واحد يقولها حاجه ... متهتمش بالموضوع اصلا..!!
والحمد لله انا مبعملش 1000 مشكلة في اليوم ولا حاجة بس شايفة انكوا اديتو الموضوع اكبر من حجمه وحسستونا ان البنات دول هما سبب كل المصايب اللي بتحصل في الشوارع كل يوم ومش عارفة ليه الهجوم الفظيع ده وكمان الاسلوب ده عبارة عن نقد هدام بدون ابداء اي حلول تساعدنا اننا نسوق بطريقة صح كلنا من غير مانضايق حد عشان فعلا يتحول لنقد بناء بجد وله فايدة.