الآباء والأمهات وعدم الخوف على أولادهم أثناء القياده.

**itsonlyme** · 27-10-2008 08:03 PM

حاجه تغيظ. قمة الإستهتار والإهمال إنك تسيب ولادك الصغيريين مطلعين إديهم وراسهم من شباك العربيه وأنت سايق.
النهارده وأنا ماشي على رجلي لقيت أم سايقه وسايبه ولادها الإثنين ورا فاتحين الإزاز يدوبك بحيث يطلعوا راسهم ومطلعين راسهم كلها بحيث رقبتهم على حرف الإزاز! الولاد عمّاله تطّلع راسها وتِدَخلها.

رحت جريت ورا العربيه.
قلت للست وأنا محموق "يا فندم ولاد حضرتك مطَّلعين راسهم من الشباك و الإزاز على رقبتهم ممكن يتعورو لو حضرتك فرملتي".

ردت عليا "أنا كل ما أقفل الشباك هما يفتحوا"
قلتلها "أنا قلتلك ودول ولادك وأنت حره" ومشيت.

الله يرحمه والدي كان عمره ما يسمحلنا نقف في العربيه. ممنوع نطلع ادينا من العربيه. الراس دي طبعاً مفهاش كلام!

الآباء والأمهات دلوقتي قمه في التخلف والامبالاه. الأم من دول سايبه ابنها واقف قدام ولازق وشه في الإزاز القداماني. لو لمست الفرامل الواد دماغه حتخبط في الإزاز والأب من دول حاطط بنته على حجره وهوا سايق.

أنا شاب لسه ماتجوزتش بس شايف الحاجات دي من البديهيات. الأباء اللي بيعملوا كده مايستحقوش يبقوا آباء.

ايه رأيكم؟

**MoToRiZeR** · 27-10-2008 08:32 PM

من سنتين شفت منظر عالمحور عمري ما هنساه
و الله العظيم بجد .. واحدة واخدة الشمال ماشية 50 - 60 أيام ما كان المحور في عزه و الناس بتشد عليه .. و بترضع إبنها و هي سايقة !!!

**ahmad--ezzat** · 27-10-2008 08:39 PM

موضوع ممتاز
لما بيحصل اى ضرر للعيال نرجع نقول ياريت اللى جرا ماكان وياريت وياريت
لازم يا ماعة ناخد بالنا من الحجات دى كويس

**AHMEDCAR** · 27-10-2008 11:56 PM

انا عندى جارتى عندها 3 عيال عفارييت بمعنى الكلمه بس المشكله انها غالبا عفريته زيهم كل يوم العيال يا يكونوا فى شنطه العربيه او كل واحد فيهم قاعد على شباك و طبعا الكاسيت على اخره و المشكله مش بتفوت فرض الا و بتصليه فى الجامع حاجه غريبه

**sab3aawy** · 28-10-2008 12:40 AM

والأدهى والأمر والكارثة الكبرى هى من يضع المحروس الصغير على حجره وهو سايق، معلش الواد بيعيط ....الواد رزل لاعبوه ، دلع ماسخ ونتائجه وخيمة، يعنى اللى مستغنى عن روحه هو حر لكن ابنه مالوش ذنب انه يتطبق بين ابوه وبين الديريكسيون مع اى فرملة جامدة والناس اللى فى الشارع مالهاش ذنب تتحمل دلع المحروس الصغير على الديريكسيون

**M.Osman** · 28-10-2008 01:11 AM

المشاركة الأصلية كتبت بواسطة MoToRiZeR

من سنتين شفت منظر عالمحور عمري ما هنساه
و الله العظيم بجد .. واحدة واخدة الشمال ماشية 50 - 60 أيام ما كان المحور في عزه و الناس بتشد عليه .. و بترضع إبنها و هي سايقة !!!

دى جامدة جداً ...ههههههههه

**Casio2000** · 28-10-2008 02:04 AM

المشاركة الأصلية كتبت بواسطة sab3aawy

والأدهى والأمر والكارثة الكبرى هى من يضع المحروس الصغير على حجره وهو سايق، معلش الواد بيعيط ....الواد رزل لاعبوه ، دلع ماسخ ونتائجه وخيمة، يعنى اللى مستغنى عن روحه هو حر لكن ابنه مالوش ذنب انه يتطبق بين ابوه وبين الديريكسيون مع اى فرملة جامدة والناس اللى فى الشارع مالهاش ذنب تتحمل دلع المحروس الصغير على الديريكسيون

طب تقول ايه في اللي مش بس بيحط ابنه على حجره و هو سايق - كمان بيخليه يمسك هجلة القيادة شوية عشان اصل الواد بيحب يسوق

**moshax** · 28-10-2008 05:13 AM

اكيد الامهات والابهات دى خايفة على عيالها برضوا بس هما مش حاسين بالحكاية دى وللاسف هيحسوا بيها بعد فوات الاوان....

**mrghost** · 28-10-2008 05:50 AM

المشاركة الأصلية كتبت بواسطة moshax

اكيد الامهات والابهات دى خايفة على عيالها برضوا بس هما مش حاسين بالحكاية دى وللاسف هيحسوا بيها بعد فوات الاوان....

بصراحه ماعتقدش لان فيه ناس كل اللى بيعملوا انهم يخلفوا عيال ويرموهم يعنى العيال طول النهار فى الشارع وماحدش يعرف عنهم حاجه فى المدرسه كل اللى بيعملوه انهم يأكلوهم بس واللى يضايقنى اكتر لما اشوف واحد او واحده متعلمه يعنى مفروض يكون عارف خطر ترك الاولاد فى الشوارع ومكبرين دماغهم على الاخر ..... انا كل ماجى ادخلا الشارع بالعربيه الاقى عيال صغيره بتمسك فى العربيه من ورا والله اهلها بتبقى شايفاهم ومابتقولهمش حاجه ... لما ببقى مخنوق بقف مره واحده واللى يحصل يحصل

**Bossy_Fadl** · 28-10-2008 06:12 AM

المشاركة الأصلية كتبت بواسطة Casio2000

طب تقول ايه في اللي مش بس بيحط ابنه على حجره و هو سايق - كمان بيخليه يمسك هجلة القيادة شوية عشان اصل الواد بيحب يسوق

+10000000000000000

كنت لسه داخله اقولها

و بيفتخرو اوي و يقولوللك خلي العيال تفرح هعهعهعهعهعهع

مش عارفه الناس اللي زي دي الواحد يعمل معاهم ايه

اساسا لا يصطلح تسميتهم اباء او امهات

و يوم ما طفل فيهم يجراله حاجة نفسي يوروني هما و لا العيال هيفرحو ازاي

الموضوع: الآباء والأمهات وعدم الخوف على أولادهم أثناء القياده.

LinkBack

أدوات الموضوع

عرض

-

-

-

-

-

-

المواضيع المتشابهه

مين بيعمل الوضع ده أثناء القياده ؟

من فاطمة العوا إلى أبيها من جيل الوسط إلى جيل الآباء

المخاطر الصحيه أثناء القياده.

هكذا يعلمون أولادهم في المدارس بأن حدود اسرائيل من النيل للفرات

المصريون يقتلون أولادهم خشية إملاق !!

الكلمات الدلالية لهذا الموضوع

المفضلات

المفضلات

ضوابط المشاركة