اقتباس المشاركة الأصلية كتبت بواسطة dede_dodo88 مشاهدة المشاركة
خلينا نتفق على حاجة, البنك ده مش هو الخزنة الصغيرة أو البلاطة اللي الناس بتحط تحتيها الفلوس في البيت,
البنك ده هو مؤسسة مالية تخضع للبنك المركزي اللي هو الجهة المسؤولة عن وضع السياسات المالية و الرقابة على تطبيقها في أي بلد..
إذاً فالبنوك ليها دور رئيسي في الرقابة على الحركة الأقتصادية في البلد, صحيح هما مش جهة قضائية لكن ليهم صلاحيات لتطبيق الرقابة المالية..
عايز أقولك شوية أمثلة لبعض البنوك خارج مصر اللي تساهلت في الموضوع ده و تسبب عنه جرائم مالية من ضمنها عمليات غسيل أموال, و بسببها أتفرض على البنوك دي عقوبات بمليارات الدولارات, و من ضمن البنوك دي hsbc و standard chartered..
كون أن مصر متأخرة شوية في تطبيق موضوع الرقابة ده فدي مشكلة كبيرة في حد ذاتها, و الناس زي حضرتك مش متقبلة الموضوع لأنه موضوع جديد بالنسبالهم و لسة مش مدركين أبعاده بصورة كافية..
بس عموماً, على حد علمي يعني ان أي بنك بيفتح حساب لعميل جديد بيكون مخلي العميل ماضي على إقرار يلزم العميل بتقديم أي اوراق أو مستندات يطلبها البنك..
من ضمن واجبات البنك المركزي مراقبة السوق و مكافحة التضخم. البنك المركزي جزء من الحكومة عندنا و مش جهة رقابية ولا حاجة. و حركة الصرافة الأخيرة بينت بوضوح ان البنك المركزي ملوش اي قيمة في مصر. مجرد اسم و خلاص. فحكاية ان البنك بيراقب و ينظم دا مش صحيح. البنك زيه زي اي جهة اخرى في مصر, بتخضع للاهواء السياسية و مزاج الدولة العام. ومش بيصدر تقارير بشفافية واضحة عن المشاكل الحقيقية للسوق المصرفي, و مش بيصدر تقارير حقيقية عن سوء قرارات الحكومة و تبعاتها على الاقتصاد.

غسيل الأموال و الفساد المالي معروف مين اللي متسبب فيه, الناس دي بتخرج من قاعة كبار الزوار و بيتصوروا مع رموز الدولة. لو حضرتك مش عارف الموضوع دا يبقى عمرنا ما هنتفق. ولما تيجي تعمل قوانين طبقها على الحرامية الكبار الأول. مش على ناس زينا اخرهم بيكسبوا كام ألف في الشهر بعد لما يطلع عينهم.

النقطة الأهم ان موضوع كل دول العالم دا. انت في اي دولة ببطاقة هوية تقدر تفتح حساب في البنك بدون مشاكل. ممكن الرخصة او البطاقة الشخصية. و بتمضي على اقرار و خلاص. في مصر الاجراءات بقت معقدة اكتر بكتير. و المشكلة ان بتخلي موظف بنك يشتغل وكيل نيابة دا مش شغله. انا معنديش اي مشكلة في ا لرقابة. عندي مشكلة في كيفية تنفيذ الرقابة دي(؟). و هل هي رقابة حقيقية ولا مظاهر للرقابة بدون مردود حقيقي على الدولة و اقتصادها و أمنها ؟

انا مدرك تماما أهمية الرقابة لكن حضرتك اللي مش متخيل ان ممكن ان واحد زيي يكون فاهم اكتر من اللي بيحطوا السياسات النقدية وعارف ازاي اخلق مناخ جاذب للاستثمار مش طارد, لكن المشكلة ان في بلدنا كل حاجة ماشية بالعكس, و ان كل واحد في منصب أعلى وصله بالواسطة و الفساد فاكر نفسه نصف اله لا يأتيه الباطل من بين يديه و بيشرّع و يحط قوانين و هو مش مدرك تماما عواقبها.