الموضوع: دقت ساعة الحجز ، دقت ساعة الإستلام ( كيا ريو سيدان )

ألف مبروك يا باشا ، تفكير سليم ، ربنا يوفق ، وقلنا ايه الاخبار بعد التجربة ،

بجد الف مبروك وربنا يديك خيرها ويبعد عنك شرها وشر الطريق
ماتنساش تتطلع صدقة عنها لله وتقرأ المعوذتين
عند الاستلام المفروض تستلم شهادة بيانات وصورة من الافراج الجمركى وعقد بيع من الوكيل للمعرض والمفروض فاتورة بالمبلغ وطبعا بص على العربية كويس قبل ماتستلم وان شاء الله يوفقك للخير

المشاركة الأصلية كتبت بواسطة ahmedz310

في البداية احب أتوجه بخالص الشكر والتقدير والعرفان لجميع اعضاء منتدي نايل موتورز الكرام بوجه عام ولقسم كيا بوجه خاص ، قد ايه استفدت منكم وربنا يجازيكم خير ، مش عايز اذكر اسماء عشان مانساش حد :) ،
الحمد لله الذي بنعمته تتم الصالحات ، ربنا وفقني وحجزت كيا ريو سيدان وكيل dab&abs
بصراحة ياجماعة قرار شراء سيارة صعب جداً والأصعب اختيار السيارة وعشان اخوكم مابيحبش يحتار كتير فكرة بشكل عملي وقولت يا واد يا ابوحميد هات ورقة وقلم واكتب احتياجاتك من العربية وميزانيتك وكتبت مايلي :-
- الميزانية : من 130000 : 140000
- الاحتياجات : سهولة صيانة ، انتشار قطع الغيار مع مراعاة ان سعرها يكون مناسب ، ثبات الي حد ما يكون معقول (انا مش غاوي جري) ، يكون ليها مركز صيانة معتمد في جنوب سيناء او حتي السويس لأني مقيم اقامة دائمة في جنوب سيناء فمش معقول كل اما احب اعمل صيانة هضرب مشوار لحد القاهرة :( أخيرا ودي اهم حاجة وبما ان اخوكم اخصائي سلامة وجودة بشركة طيران فكان اهم حاجة عندي ان العربية يكون فيها وسائل آمان abs & ebd& immobilizer
اتفرجت علي عربيات كتير ولقيت كل اللي انا محتاجه في الكيا ريو ،
-دخلت علي الحيرة الثانية (اجيبها هاتشباك وله سيدان) روحت نازل متفرج عالاتنين وحسمت القرار لما شوفت شنطة الهاتشباك ولقيتها صغيرة جداً وتكاد تكون مش موجودة
- دخلت علي الحيرة الثالثة (اجيبها وكيل له خليجي) ، بصراحة كنت ميال للخليجي بس مالقتهاش اصلاً غير فئة اولي مافيهاش abs وفئة تانية فوق ال 140000 ولسه هاشتريلها ضمان فخرجت بره الميزانية قولت خلاص خلينا في الوكيل سعرها الرسمي 141500 وممكن تخلص علي 140000 قولت طب ياربي ماينزلش عليها عرض وترخص شوية دا كانت السنة اللي فاتت ب 135000 بس كانت متنفضة مافيهاش اي كماليات وله حتي جنوط تقريبا ، المهم بفتح جريدة الاهرام لقيت عليها خصم 4000 جنيه وسبحان الله الخصم عالسيدان بس :) قولت مابدهاش بقي ونزلت لفيت علي كام معرض وحجزت من سمير ريان اللون الموكا والسعر كام بقي 137000 فرق 2000 جنيه عن موديل 2014 بس زيادة ايه بقي ياسيدي ( جنوط اسبور 15 - فوجات - طارة مالتي ) يابلاش ههههههه :)
إن شاء الله هستلم بكرة او بعد بكرة بالكتير دعواتكم بقي واي نصائح ماتبخلوش بيها علي اخوكم ونصيحة لأي حد محتار بين كذا عربية حدد اولا ميزانيتك ثم احتياجاتك وصلي استخارة وهتلاقي العربية هي اللي بتناديك ههههههههههه بالتوفيق للجميع

مبروك مقدما
ربنا يبارك لك فيها و يصرف عنك و عنها الحقد و الحسد و التخريب
حساباتك منطقية جدا و أظن الريو بالفعل أفضل إختيار ليك
أنا كنت في حيرتك بس ضعف الميزانية كانت هتجيب ريو فاضية خالص
بس هي فعلا عربية محترمة و منافس قوي في فئتها