السلام عليكم و رحمة الله و بركاته
بصراحة عنوان يخلي الواحد ريقه يجري .. طلاما فيه طحينة يبقا فيه فطير
اصدقائي و احبائي في الله
[justify] [/justify][justify][/justify][justify][/justify][justify]
النهارده جاي و معايا عطل جديد من الاعطال اللي اللولبية اللي بشوفها باستمرار و اللي اللي بعد كدا هتبقا سلسله اعطال هعملها تباعا باذن الله تعالى..
المشكلة اللي حصلت معايا و اللي بتكرر كتير مع الناس سواء في عربية اروبيه او اسيوية او امريكية او (الالمانية) و انا في الحقيقة بعتبر ان المانية كوم و العالم كله كوم تاني .
دي ناس عندها فكر و عندها سكه لوحدها ماشية فيها و معندهمش استعداد يلتفتوا لاي حد اساسا لان صناعتهم كفاية الصراحة .. كفاية علينا اللي بيصنعهولنا
بحب ديما اي عطل يحصل معايا في عربيتي اصورة و و اعمله موضوع لنقل الفائدة
الحقيقة ان فيه اعطال كتيرة بتظهر لبعض الناس اللي بيصين لهم بنفسي بس للاسف مبقدرش اصورها و ده لان مافيش مجال اصلح و اصور في نفس الوقت لان الشخص اللي بيكون محتاج يصلح ماعندوش وقت يصبر فا بحاول بقدر الامان يا اعمل الموضوع متضمن صور من ع النت و بمساعدة برنامج ELSAwin او لو عاوز الصور حية بصور بنفسي من واقع الحدث
عطل النهارده ده موجه للناس اللي عندهمauto gearbox سواء (للجيرات الاوتو العادية) او ال (DSG)
الحقيقة الجير الاوتو العادي في النظام القديم 4 سرعات متتالية ، اما في الجديد اللي بعد 2006 نزل منه اصدار DSG اللي بيكون 6 سرعات/7سرعات متتالية .
مع الوضع في الاعتبار ان مثلا الليون نزل من الشكل القديم منها جير النظام القديم فيروح في برنامج workshop وانت داخل تجيب diagram اصلاح اعطال المبرد مثلا يروح مديلك خيارين
1- 1M-6-000-001 (ليون الشكل القديم)
2- 1P-6-000-001 (ليون الشكل الجديد)
ما ننساش ان في الجيرات ال DSG فيه فلتر زيت و دي الحاجه الزيادة اللي نازلة في الجير الجديد بالاضافة الى ان الجير DSG السوفتنج بارت+solenoid valve اللي بسموه بالبلدي كدا (مخ الجير او عقل الجير) الجزئين دول مع بعض في وحدهportable يعني منفصله متصله (يعني اقدر افكها لوحدها دون الحاجه لاسقاط الجير بالكامل في حالة اصلاحه) ده للتوضيح فقط ..لكن الجير (سواء الاوتو العادي / DSG ) لو فيه مشكله او لو عاوزين نصلحه لازم يطلع بره العربية خالص .. لازم .
نبعد بقا عن تكوين نوعين الجيرات و نتكلم في المضمون كل الجيرات الاوتو ليها مبرد و كلهم يتفقو نسبيا في الشكل و الهيئة و الخامة الالومنيوم
دي صورة توضيحية لشكل المبرد
[/justify]

و زي ما احنا عارفين ان الالومنيوم بيفقط الحرارة بسرعة و ده يعكسلنا ان اي نوع مبرد لازم يكون داخلة جزىء الالومنيوم ، لكن بيختلفو طبعا في بنائهم على الجير ،بمعنى ان في مبرد راكب بالعرض على الجير بالورب او بالطول المهم انه راكب زي ماهو راكب لكن بيتفقوا اننا ممكن نفكه بشكل منفصل عن طريق COOLANT BOLTS الخاصة بربطهم و دي بتكون مسامير ربط بطبيعه خاصة حيث انها مجوفة و مثقبه من داخلها بتنقل الزيت من و الى المبرد .

طيب انا ليه جبت سيرة شكل وضعية المبرد على الجير سواء بالطول بالعرض بالورب مثلا ... يهمني و انت بتفك ما فوقه من مكونات للمحرك علشان تقدر توصله و تفكه هو نفسه انك ما تفكش كتير و تفك اي حاجه في وشك علشان توسع لنفسك .. عاوز توسع لنفسك مكان.. (فك المهم فقط) .. انا مش هدفي انك تتعلم تصلح بس اهم حاجه عندي كمان انك تعرف ترجع الحاجه زي ما كانت بالملي زي ما المصنع بتعها ركبها.. ما تفكليش مسمار و يضيع منك تروح تجيب بديل (لا – لا – لا) ضاع منك تروح تجيب اخوه استيراد او جديد من التوكيل .. ما تتصرفش في مسمار و خلاص
جمبك علبه بلاستك مقسمة الى اقسام و مرقمه و بتتباع في كل مكان ، لازم يكون عندك واحده لو انت راجل بتعمل صيانه بنفسك .
نرجع لموضوعنا .
من حكمة فولكس انها تخلي المبرد منفصل تماما و تعتبره انه قطعه تخرب و تتبدل عادي زيها زي بوجيهات او خراطيم ... الخ من قطع الغيار ، فيه تكلفة فعلا زادت لكن امان على الجير في نفس الوقت لما يسبب مشكلة يديني فرصه اعرف اتصرف و اغيرة هو فقط – المبرد يعني - في 5 دقايق او اقل من ذلك .
في بعض شركات تصنيع السيارات بتعمل المبرد ده داخل (المشع) او الراديتر ، مع ان معظم الشركات دلوقتي بتصنع المبردات منفصلة ، لكن بعتبر فكرة (المبرد داخل المشع) دي غتاتة او رخامة سميها زي ما تسميها لانه بكدا بيخليك مضطر تغير (المشع) بالكامل ، فبتكون عايز تصلح حاجه تروح مغير جمبها حاجه كمان . فيه ناس بتفك الفبرة الخاصة بالمشع و تلحم المبرد من الداخل ، لكن هيرجع يخرب تاني في اسرع وقت ممكن .
طيب ... ايه اللي حصل معايا شخصيا !!
انا من ايام قليله كنت منزل موضوع فحص التسريب ، في عيد الاضحى المبارك حبيت اخرج انا و اولادي يلعبوا و ينبسطوا ... مشيت بعيد بعيد و يارتني ما مشيت هههه اغنية حلوة ها .
المهم رجعت ركنت العربية و تاني يوم بليل جالى مشوار مهم ، طيب ... اخد بقا ازازة مليانه ميه لان زي ما انتو عارفين (انا عندي تهريب ميه من الاول) فا عيني ديما على التزويد ، افتح يا عم الغطا افتح القربة انا واقف تحت عمود نور سبحان الله حسيت من الفبر بتاع القربة انه في حاجه جوه غلط ، ابص في القربة مش شايف حاجه رحت حاطط صوابعي جوة و كانت المفاجأه زيت و عامل طحينة بالمنظر اللي في الصورة الجاية
انا قفلت القربة و ما رحتش المشاور والصورة دي طبعا متصورة صباحا .

ركز بقا معايا يا كوتش منك له و ما تسرحش ... انا ما بحكيش حكاية ابلة فضيلة
لان هنا الموضوع يبتدي .. تخيل كدا نزلت و فتحت القربة لقيت المنظر ده هتعمل ايه ؟؟ ركز في الخطوات الجاية دي حلوه و هتعجبك
1- امد ايدي اشد مقياس الزيت علشان اتطمئن على الموتور من جوة عمل طحينة ولا لا و في نفس الوقت اقطع الشك بالقين ان المسألة مسألة مبرد فقط لا غير ؟؟ يعني هل العيب هيكون جوان وش سلندر ولا مبرد ؟؟؟
2- طلع ان مافيش خلط زيت على ميه في الماكينة .. اعمل ايه ؟؟
3- كدا يبقا مافيش غير سكتين ( يا مبرد الجير – يا مبرد ماكينة)
طيب انا عاوز ابقا راجل محترف اول ما ابص في القربة اعرف ده زيت ماكينة ولا زيت جير ؟؟
لازم تعرف ان مافيش فهلوة في شغل الميكانيكة .. لكن فعلا فيه شواهد تعرفك بمجرد النظر ، ازاي ؟؟؟
اولا لو لون الطحينة فاتح اوي يبقا زيت جير مع وجود ريحة زيت قوية ، لكن زيت الماكينة غامق (بني غامق) لكن مالوش ريحه قوية ، طيب ما الصورة فيها (لون بني غامق متكتل) و لون (شبه لون الحليب) ،
انا اقولك بقا الطحينة دي كانت يادوب لسه حصله فا عبال ما الزيت اخد اللون بتاعه اللي يدلني ماكنش قدر يتحول في تركيبه و خواصه لكن طلاما انا شفت اللون الفاتح اوي ده يعني اديت 90% لزيت الجير طبعا .. لان انا لو المفروض ماخدتش بالي و مشيت بالعربية كمان شوية التكتل البني ده هيسيح مع بعضه و يفتح لونه جدا و هتحس انه فيه لبن معكر اتدلق جوه القربه .
لكن زيت الماكينة اسود لون الطحينة هيبقا (بني غامق و ليس اللون الكريمي الفاتح)
لكن في النهاية ما نقدرش نعتمد على الكلام ده خالص مع انه صحيح بنسبة كبيرة ، خلينا نقول انه نوع من انواع مبينات الاعطال او الشواهد المبدئية
لازم نفحص الفحص الصح
مبرد جير و عرفناه و صورته شفناها فوق
طيب ايه مبرد ماكينة ده ؟؟ هو فيه مبرد زيت الماكينة .. أه فيه و ادي شكله للناس اللي بتتعلم و للناس اللي ماتعرفش .

طيب مكانه فين يا عم صلاح ؟؟؟ مكانه قبل فلتر الزيت على طول ، يعني فلتر الزيت بيركب عليه و هو بيعدي من جواه مية و في نفس الوقت الزيت بيمر عليه علشان يبرد .
انت هتوهنا ليه يا عم صلاح ؟؟؟ يعني مهو ممكن يكون الخلط في مبرد الزيت الخاص بالماكينة و يمكن يكون مبرد جير !! هنعمل ايه و هنتصرف ازاي ؟؟ نروح لميكانيكي و ينصب علينا و يعمل علينا شغل يعني ؟؟؟
عايز تروح لميكانيكي روح عادي على اساس انك مش مجهز نفسك بالعدد و ادوات تفك و تركب بس قبل ما تروح لازم تكون عارف العيب منين .. لازم تبقا راجل فاهم .
نرجع تاني
قبل ما امد ايدي في اي حاجه ، هجيب مفتاح النكيه و انزل تحت العربية و معايا طبق لونه غامق و افتح طبه زيت الفتيس (الخرج) و يادوب انزل (اقل من ربع كيلو زيت) في الطبق الغامق ده ، اشوف فيه طحينة في الزيت اللي جوة الجير ولا الزيت نازل سليم ، لو انت اخدت بالك بسرعة من موضوع الطحينة ده و مامشتش كتير (ان شاء الله تعالى) و بنسبة كبيرة الخلط هيكون بس في المبرد من جوة (في البداية فقط) بعد فترة قليله لو سهينا عليه المية هتدخل جوة الجير كمان و سعتها بقا هنتكلف مصاريف شوية اللي هي غسيل الجير من الداخل ، و الغسيل ده بيكون بزيت جير بردوا نحط زيت و نمشي حبه و نرجع نفضي و بعد كدا نملا و هاكذا لغاية ما الطحينة تختفي .
لتجنب مشكلة دخول ميه في الجير ، مافيش مانع انك تبصلك في القربة كل يومين يا سيدي .. عادي يعني مش صعب
الوقاية خير من العلاج ، دايما نخلي عنينا على العربية من جميع الجوانب علشان نكون في امان من ناحية الاعطال الكبيرة بس طبعا اولا و اخيرا .. الامان من عند الله سبحانه و تعالى .
نرجع للاختبار : جه معاد الكشف على المبرد و لازم نختبره علشان نتاكد منه ولا من مبرد المكينة
اختبار بسيط و جميل و سهل اوي و بيتنفذ على جميع المبردات سواء (جير/ماكينة)

- هنركب خرطوم في فتحة من فتحات الخاصة بمية التبريد
- هنجيب طبق ميه عميق و نملى الطبق ميه و نشيل مسامير الربط نحطهم في مكان امين ملفوفين في قطعه قماش نظيفة تماما و نسقط المبرد في الطبق
- هنقفل مدخل واحد من مداخل المية في المبرد و ليكن بايدينا كما في الصورة


ننفخ في الخرطوم باستمرار و ياسلام يكون بمنفاخ يدوي او كمبريسور و نلاحظ فيه فقعات هواء بتخرج من (داخل) فتحتات الربط من الداخل ولا لا .

لقينا فعلا فقاعات خرجت و السبب ان فيه ثقب داخل المرشح انظر الصورة المرشح

طيب لو طلع انه سليم تماما ؟؟ اذا العيب في مبرد زيت الماكينة و لا بد من استبداله لكن مش قبل الفحص .. لازم تفحصه بردوا بنفس الطريقة.
نرجع تاني بقا للعطل و طلع ان مبرد الجير هو السبب انا عرفت من لون الزيت لكن بردوا فحصت ، يعني مافيش نقاش ، و علشان اكون واحد بروفيشنال ميكانيكا لازم الفحص و التدقيق (سيبك انت من المصريين بيعملوا كل حاجه دي) و ده شعاري .
هنروح بقا نشتري المبرد الاصلي طبعا ، او الاستيراد يا سيدي ماتزعلش انا عارف انه علبه صفيح لكن ذات قيمة و سعرها حراق بس هنعمل ايه .. ما باليد حيلة
المبرد الاستيراد هنجيبة نعمله نفس الاختبار بالظبط هنغطس الللي تحت pips بتاعته و ننفخ و ياريت النفخ بمنفاخ احسن او عند حد بيصلح عجل و نتأكد انه سليم ، اتأكدنا نركبه و نوصل وصلاته و بعد كدا نيجي بقا للمهم !!!
ازاي هنضف دورة المية ؟؟؟
لازم تحط في بالك ان التظيف كله هيكون من قربة المية .. اولاً هنعبي المية طبعا اللي اتصفت لما فكينا و نقفل القربة تمام و نطلع مشوار كدا تلف و ترجع تركن عربيتك بعد ساعة اول حاجه تفكها (خرطوم الرايح) اللي تحت القربة - وغطا القربة مقفول طبعا - و بعد ما تفكه اكتم مكانه بايدك لاني محتاج المية اللي جوة دي باللي فيها، تفك الخرطوم الصغير للداخل اللي فوق و طلع القربة برة و بردوا تفضل كاتم ، على فكرة المية اللي جوة هتلاقيها سخنة بردوا مع انك واقف ساعه قبلها بس انا بأمن علي سلامتك تفك و الميه جوة بتغلي و في نفس الوقت انا عاوز الميه جوة سخنة .
زي ما احنا كدا كتمين مخرج المية اللي تحت تفتح الغطا و نحط شوية صابون اللي هو بتاع غسالات الاتوماتك و نقفل الغطا و نبتدي نرج جامد ، بعد كدا نفتح و نفضي و نغسل بميه و نرجع ، بعد كدا تجيب رمل نضيف و تحط شوية جوه القربة بدون ميه و تحطل علية شوية صابون غسالات و بؤ مية بالظبط و رج جامد .. عايزها بتبرق
نضفت .. رجع كل حاجه زي ما كانت و عبي مية
العملية دى هتتعمل بعد كل مشوار تطلعه ترجع تركن ساعه و تنزل تعمل السابق ذكره و تركب تاني و تعبي ميه و هاكذا لغايه ما انت تلاحظ ان الزيت اختفى .
زي ما احنا عارفين ان الزيت اخف من المية ، اكلف نفسي ليه و اروح اعمل تنظيف بالضغط (اللي هو اساسا غلط) او اروح اخلى بتاع رادياتيرات يقلبني في قرشين على الفاضي و انا اقدر اعمل حاجه تافهه زي دي بدون مصاريف ؟؟
مهو كدا كدا الزيت هيمشي في الدورة و في الاخر هيتعلق في اخر المكان اللي ضغطه منخفض اللي هو القربة ، و بدون عناء هقدر اني اعزله بعيد عن دورة التبريد .
و دي النتيجة بعد 5 او 6 ايام من التظيف المستمر بالطريقة السابق ذكرها
قربة المية في اليوم 9 بعد التنظيف التام يعني تقريبا 3 ايام بعد عملية التنظيف مافيش زيت تاني ظهر


بعد ايام قليله رحت اشتريت ميه مقطره ، و اشتريت (hose) الميه اللي كان فيه المشكله في موضوع تسريب الميه السابق عمله و كمان اشتريت ميه G12 و كله اصلي بفضل الله و سيتم تركيبهم في اقرب فرصه .
اسف على الاطالة لكن انا بعتبر ده احد المواضيع المهمة اللي لازم اتكلم فيها .

ملاحظة : قبل ما اقفل الموضوع يا شباب ، لما افك مبرد الزيت و اخرجه بره لازم اعمل حجتين .
1- بين الجير و بين المبرد على الفتحتين الربط بيكون فيه (اويسيلين) يا نشلهم في مكان امي لحد ما نخلص و نرجع نركبهم وقت الربط يا نتاكد انهم في مكانهم مظبوط و نتمم عليهم.
2- لما اشيل المبرد و اطلعه بره اسد الفتحتين اللي تحتهم (بقطعتين قماش ابيض نضيف) و بلاش تحط اي حاجه تانية غير القماش.. ورق و كراتين و الكلام ده او تجيب مسمار على قده و تقفله (( عارف انا شغل بتاع اي حاجه في رغيف )) و ده منعا ان اي حاجه تدخل جوة تتلف اجزاء الجير من الداخل .
لازم اكون محترف في شغلي

***مع خالص تحياتي***