هو دة الطبيعى فى المستشفيات الحكومية ؟؟
خالى من أسبوع جاله مرض الحمرة فى رجله و اتنفخت وبقت تجيب مية وهو مريض بالسكر بس مهمل فى العلاج جدا ومش بياخد الانسولين
وديناه مستشفى الدمرداش لأنه ميقدرش على مصاريف العلاج الخاص للأسف و لأنه مش متزوج فمفيش مرافق قاعد معاه ... كل يوم نروح نلاقى الدوا عالكومدينو ومش بياخده ومحدش بيغير على الجرح و الدكتور قال احنا مش بنعمل حاجة المرافق هو اللى يديه الدوا و يغيرله عالجرح ولو ملقيتهلوش مرافق هنمشيه من المستشفى ... حاولنا ندى فلوس للمرضة عشان تهتم بيه قالت انا مسؤولة فى شيفت 8 ساعات عن 100 حالة لو كل واحد خد عشر دقايق مش هخلص و بردو معملتلوش حاجة .. و اضطرينا نخرجه و نوديه البيت
المصيبة بقا مش كل دة .... التحاليل اللى خدناها من الدمرداش رحنا بيها هى هى لدكتور تانى برة قال لنا نسبة البولينا مرتفعة جدا عنده ازاى هناك مقالولكوش الكلام دة ؟؟
انا بجد مصدوم و بدعى ربنا انى لو كتب عليا المرض فى يوم من الأيام انه يقبضنى من غير بهدلة لأن واضح ان اللى معهوش مصاريف العلاج الخاص (اللى هو أذل و أسوأ بردو و بيستغلوه تجارة) يبقى يرتاح الراحة الأبدية أحسن