طيب بسم الله الرحمن الرحيم...
الكمبيوتر فالشغل ما بيكتبش عربى و من يوم ما شوفت الرد بتاع الأستاذ هوجان و انا بضحك و نفسي اشكره، بس خلينا نرد على صاحب الموضوع الاول.

استاذي العزيز...حيرتك في ناس كتيره محتاره فيها فعلاً و انا هاتكلم عن تجربة العربيتيين.

اللوجان عربيه مش وحشه تماماً..بس حكاية انها فرنساوي و تكنولوچيا و الكلام ده كله مع احترامي لشخص كل واحد و معلوماته..بس راح عليه خلاص.... اللوجان من الشكل القديم للشكل الجديد يا إما روماني او مغربي او بيقولو عليها اسباني مغربي.. بس هيا مغربي بس او برازيلي... الشكل الجديد و القديم نازلين بنفس الموتور و الفيتيس و العفشه..الزياده ان في عامود اتزان بينزل فالشكل الجديد عشان الشكل القديم كان فيه مشكله فالثبات عالسرعات فوق الـ ١١٠ و دلوقتي اتعالجت شويه فالشكل الجديد بقت المشكله عالسرعات فوق الـ ١٣٠ فقط ان وصلتلها و المشاكل فالمنحنيات قلت بشكل ملحوظ، استهلاك البنزين هو هو...عربيه ١٦٠٠ سي سي بتعمل فالصفيحه حوالي ١٦٠ لـ ١٨٠ كيلو.... العفشه مش سيئه قوي بس ناشفه حبتين ...و قطع الغيار غاليه غاليه غاليه غاليه...الحمد لله العربيه كانت مع اختي الصغيره في مصر الشكل القديم و هنا معايا واحده من عربيات الشغل الشكل الجديد...فالشكل اكيد الشكل الجديد يكسب و الشنطه اوسع حاجه بسيطه.العربيه مش بتاعت جري ولا شد ولا الكلام ده،عربيه عائلية صغيره و حتي عوامل الأمان و التقفيل الداخلي رغم انهم فقراء جداً بس نقدر نقول مقبول بيحاول يبقي جيد، ملحوظه..العربيه ما كانتش مريحه اختي و باعتها بعد ٣ سنين بسبب غلو اسعار قطع الغيار و المانيوال و الفيتيس ماكانوش مريحينها و طبعاً هي بنت فا شكل العربيه ما كانش عاجبها.


نيجي نتكلم عن العربيه الصيني الــ FRV و الــ FRV Cross ..الحمد لله انا جبت العربيه في ٢٠١١ و سافرت دراسه وعمل و لما رجعت تاني جبتها ٢٠١٣... العربيه لما كانت بــ ٨٨ الف كانت بتتفوق على عربيات كتيره في فئات اعلى منها..العربيه بتنزل بموتور مايفك ١٥٠٠ و فيتيس مانيوال ميتسوبيشي و ده في الموديلات بتاعت دلوقتي.. عفشة العربيه تصميم بورش بس تصنيع الصين...العربيه كلها على بعضها صيني.. الحمد لله العربيه ما كانش فيها مشاكل على السرعات ولا الملفات...حتى سرعة ١٩٠...اما بعد الـ ١٩٠ بتحس ان العربيه بقت خفيفه جداً لدرجة ساعات كنت بحس اني طاير فعلاً ...العفشه ناشفه شويه و مش مريحه على السرعات على الطرق الوعره..بس ما بتدبش قوي...انما عالطرق العاديه احساسها جميل..كماليات و تقفيل فوق الممتاز..تسارع و فرامل و عوامل امان الحمد لله لحقتني و انقذتني كتير جداً...كانت بتعمل من ١٨٠ لـ٢١٠ كيلو فالصفيحه.. و بصراحه كانت صفقه رهيبه لدرجة ان اختي التانيه خدت الـ ٢٠١٣ مشيت بيها شويه قبل البيع.. ده غير ان في ٤ اصدقائي مقربين جابوها بعد تجربتها معايا و عن اقتناع... مشاكل العربيه انا قطع غيارها اغلى من الكوري بس ارخص كتير قوي من اللوجان. و كان مره حصل مشكله في علبة الشكمان و اتغيرت فالتوكيل.


توكيلات العربيتيين تمام... مع ان من وجهة نظري البافارية افضل توكيل اتعاملت معاه.

الخلاصه...كعربيه ركوبه و توفير بنزين و قطع غيار و كده من وجهة نظري المتواضعه مافيش وجه مقارنه مابين عربيه صيني ممتازه من كل المقاييس و عربيه مغربي و قطع غيارها كلها صيني و نقدر نديها تقييم مقبول او جيد.

سعر اعادة البيع لو حد هايتكلم عليه اكيد اللوجان هاتكسب بس الفرق مش كبير تماماً و الكلام ده كله عن تجربه و خبرة عمليه شخصيه.
شوف التوكيلا فين و قطع الغيار فين... و استخارة كده للرب و للقلب وإتوكلوا على الله و الف مبروك مقدماً

تعالو بقي نتكلم مع الأستاذ إللي جملة "بلاش صيني" عنده shortcut فالـ keyboard.

انا هاتكلم من وجهة نظري الخاصه المتواضعه جداً و اكيد اختلافنا في وجهات النظر عمره ما بيكون حاجه تعيب للشخص الأخر انما هى اسدال لتجارب و خبرات شخصية... و خد بالك من تجارب و خبرات دي.

يا سيدي انا سافرت كتير و ركبت كتير بواقع عملي كمهندس و كده. ركبت عربيات لم امتلكها كتير جداً بس كانت عربيات اصدقاء او حد من العيله او خاصه بالعمل و التجارب كانت اديتني وقت كافي اني احكم عالعربيات.

بإختصار شديد.. معاك كام و عايز ايه من العربيه.

سامحني...بس مش هايبقي معايا ١٥٠ الف و اركب عربية مستعمله او اركب كيا ريو حتى و انا قدامي SUV مافيش شكاوي كتير منها مع اني شايف ان الموتور صغير و برضه العربيه نزلت في ابو ظبي و بنفس الموتور بتاع مصر و اتباعت و محدش إشتكي منها...و هى صيني و الريو كوري ..الناس اشتكت ان موتور الريو بياكل بنزين مع انه ١٤٠٠ و اشتكت من عفشتها و اشتكو ان قطع الغيار اسعارها غريبه بره التوكيل. خلينا نعقلها...كل واحد و ليه دماغه و ليه توجهاته...و مش معنى انك عندك اصدقاء عانوا مع عربياتهم يبقي كل الناس بتعاني...و إلا ما بقتش الـ BYD F3 اكتسحت الشوارع تاكسي... و ما بقيتش ال EC7 باعت كل المبيعات دي.

و يا سيدي سيبك من انا ركبت ايه و الكلام ده.. انا نفسي دلوقتي اركب A200 بس ماعيش اجيبها... و من رأيي الشخصي شايف ان افضل عربيتيين فالسوق المصري تحت الـ ٩٠ الف هما الچيلي الـ EC7 و الـ BYD L3 ...و دي وجهة نظر بعد تجربة و جري و ملاحظة ثبات و سفر و استهلاك بنزين و قيمة مقابل الفلوس..و لو معايا فلوس زياده هاجيب الكروز و ها كذا... انما يا سيدي الفاضل اني ادخل اقول بلاش صيني و خلاص... يبقي خطأ ان ما كانتش تجربه شخصية منك و مالقيتش ليها حل ولا توكيل و ضمان ولا اي حته...لأن حتى في عالم الإليكترونيات..شركة Sony رائده اهي و حاجه بقلها زمن فالسوق...و الناس بتشتكي من منتجاتها...بس ده ما يمنعش ان في جزء كبير من منتجاتها و زباينها معندهمش اي مشاكل و بيمروا بأحسن تجربة شراء ليهم.

و فالأخر فكر كويس قبل الحكم...و من الافضل تحكم بعد ما تجرب بنفسك.

الصين حلوه !!