استشارة في قرار السفر لانجلترا

**brown-eyes** · 05-11-2014 01:08 AM

هو حضرتك عندك اولا د ؟ وسنهم قد آيه لان أنا حاليا في إيطاليا وبفكر ارجع مصر لان بنتي بقي عندها ٤ سنين وانا مش عايزها تتربي هنا مع ان كل اللي في مصر بيقولي بلاش ترجع ومحتار بردو

**Mohab.Nabil** · 05-11-2014 01:20 AM

حضرتك بتقول انك قعدت فى لندن 8 سنين يعنى فترة كبيرة جدا

بصراحة انا شايف ان عندك كل حاجة تقدر تخليك تاخد القرار الصح ، جربت العيشة هناك لمدة مش قليلة يعنى مش سياحة مثلا فمتقدرش تحكم و اكيد جربت العيشة هنا فى مصر فترة كبيرة جدا برضه

القرار يرجع ليك و ان كنت حاسس احساس شخصى انك عايز تقعد هنا بس مش عايز تندم على الفرصة و مستنى اللى يشجعك انك تقعد هنا .. بصراحة انا شايف اكتر حد يقدر يحكم على الموضوع هو حضرتك و بس لأنك قعلا جربت هنا و هناك و اكيد تقدر تحدد مميزات هنا و عيوب هناك و العكس

توكل على الله و اعمل اللى يريحك و متقعدش تفكر لا ديه فرصة و هتضيع طالما فكرت كويس و حاسس انك مستريح لقرارك نفذه .. مفيش حتة هى الجنة .. كل مكان ليه مميزاته و عيوبه و اكيد حضرتك عارف الكلام ده اكتر منى بحكم التجربة فشوف تفضل مميزات انهى مكان فيهم و خد القرار

بالتوفيق ان شاء الله

**zangry** · 05-11-2014 01:22 AM

مدام مرتاح هنا متسافرش وتسيب اهلك

**mohamed_selim** · 05-11-2014 08:41 AM

كفايه العيشه النضيفه و السيستم اللى بيطبق على الكل
ممكن تسافر تجرب و بالنسبه للعياده تشوف دكتور شاطر بس معندوش عياده و تجيبه معاك الكام شهر دول و لما تسافر الناس هتفضل تيجى على اسمك و انهم شافوه و بالتالى لو مستريحتش و حبيت ترجع يبقى العياده مش مقفوله

**أحمد كمال** · 05-11-2014 08:48 AM

بكرة تندم لو ما سافرتش :(

**MohamedAbo** · 06-11-2014 08:12 AM

ربنا يكرمكم جميعا علي مشاركتكم ... أنا عندي ولد وبنت 5 سنوات ... يا جماعه قرار السفر صعب لاني مستقر هنا .. بس طبعا أنا مش عايش لوحدي .. فوضي .. همجية . حتي الواحد مش عارف يتعمل مع الناس .. هوا الواحد بيفكر في مستقبل أولاده maa byn الحياة fy مكان kwys bs مش بلدك إو الاستقرار هنا وزي منتو شايفين الدنيا مشية الزاي . إن شاء الله ربنا يكتب الخير

**ehab_mansour** · 06-11-2014 08:26 AM

ربنا يوفقك و ييسرلك الحال و اكيد انت عارف ازاي تستخير ربك

القرار فعلا صعب خاصة ان حياتنا هنا مليانة همجية و سوء تنظيم و جهل و الحياة بره مليانة ثقافات مختلفة و انفتاح و غربة و لكن محترمة و نضيفة