اقتباس:
المشاركة الأصلية كتبت بواسطة dr.sherifmansy
شكرا لأهتمامكم و اقتراحاتكم...
الموضوع متعب لسبب حاولت المح ليه و ماكنتش حابب اوضحه ...
بس اعتقد انى لازم اوضحه علشان فيه بعض الأخوة الأعضاء فاكرين ان الناس دول هايخافوا من الميرى او الضرب و خلافه زى بعض الأقتراحات..
للأسف عندنا فى كل مهنة ناس كويسة و ناس مش كويسة ، و لما تكون المهن دى ليها نفوذ و يكونوا مش كويسين و مش دوغرى و ممكن يعملوا اى حاجة علشان القرش يبقى على الدنيا السلام و مافيش مجال للحلول التقليدية..
مجموعة السياس دول بيتحاموا فى 5 او 6 افراد من السكان فى الشارع فى مهن مهمة جدا و الناس دول معروف انهم للأسف مش من الناس اللى بتهتم بالقيم و الشرف ... الخ الخ .. يعنى كل شئ عندهم مسموح ، و زى ما قلت قبل كده يا ما طلعوهم من بلاوى علشان هم بيستفيدوا منهم فى وجود اماكن محجوزة 24 ساعة 7 ايام فى الأسبوع و الثمن حاجة ببلاش كده ... مكالمة او كارت عند اللزوم ... بدل ما يدفعوا اشتراك جراج بالشئ الفلانى ، و كده مستفيدين أكتر ان كل واحد عربيته قدام بيته...
و تقريبا المجالات متغطية بالكامل ، و بالتالى هم مش محتاجين لخدماتى المتواضعة...
حكاية شراء الجراج فدى كبيرة حبتين على .. ماقدرش على تمنه ابدا..
موضوع انى احط العربية بالعافية ممكن يكون ليه تبعيات تكون مؤذية للعربية لأنى مش هاقدر اخلى عينى عليها 24 ساعة .. و لو هانوصل الموضوع للقسم و النيابة ... للأسف عندهم اللى يغطيهم كويس ... زى ما وضحت لكم فوق..
المؤسف ان لما اتكلمت مع الجيران لقيت منهم تراخى غريب ... زى ما يكون ان الحكاية دى مش فارقة معاهم ... و لكن فهمت لما رخمت فى الكلام ان الموضوع هو مشكلة الكسل التقليدية ... ماحدش عايز يتعب نفسه و عايزين كل حاجة على طبق فضة.. يعنى انا اعمل كل حاجة و اقول لهم اتفضلوا اماكن عربياتكم اهى..
المؤسف ان فيه احتمال للحل بطريقة مش عاجبانى بس مافيش غيرها حتى الآن ...
أحد المحظوظين الواصلين اللى بيتحجز لهم اماكن قابلنى النهاردة و كشف عندى هو و مراته و ولاده ... و بغض النظر عن هو مين ، او بيعمل ايه .. فهو جار .. و اول مرة يكشف عندى ... و بالتالى رفضت اخد منهم اى كشف ... كمجاملة و مراعاة للجيرة ... و يظهر ان الحكاية دى عجبته ... ففوجئت بيه بيكلمنى على حكاية الركنة و ان السياس دول غلابة و طيبين و بتوع ربنا ... الخ الخ ... و ان انا اللى حامى عليهم شوية ...(تخيلوا) .. و انه ممكن يكون واسطة خير ... بينى و بينهم ... بس ابقى اراعيهم فى طلباتهم ...
بصراحة دماغى عمالة تلف .. لو كلمنى اقبل ولا لأ .. اركب الموجة لو جت و لا ارفض الأسلوب ده ... انحنى لأزمة المرور و نقص اماكن الركن و اقبل الطريقة دى ؟؟؟ و خصوصا ان الدوخة اللى باشوفها يوميا بقالى سنين عمالة تلح على اقبل ... و يا ترى الثمن ايه بالضبط ؟؟
بجد محتار ..
للأسف الوضع اللى حضرتك بتشكي منه ده كنت بمر بيه من فترة حوالي 10 سنوات وربنا الحمدلله عفا عني بإني عزلت من المنطقة كلها ... بس لسة لما بروح لوالدي ساعات بتحصل نفس المشاكل لكن طقم السياس اللى كان موجود زمان كله إتغير فالطقم الجديد مايعرفنيش
بس الفرق إني من الغيظ اللى أنا فيه كنت بستنى ساعات أول ما العربية بتاعة أي حد تطلع من مكانها أقوم نازل على طول جايب عربيتي وسابق وواخد المكان وطبعا كان بينتج عنها خناقات
(بس هية مش خناقات الحمدلله قد ماهي إني بمشي وأسيبه يخبط رأسه في الحيط ولما بيزعق ولا حاجة ويحب ييجي يتخانق كنت بحذره إن لو العربية لاقيت فيها خدش هوة أول واحد هاسحبه على القسم حتى لو مش هوة اللى عمله لغاية مايدفع تمنه ويصلحه وبالمرة يتربى شوية جوة القسم .. وبكل هدوء .. وبرضه بسيبه وأمشي)
طبعا الحل معروف بس مكلف وحتى لو توافرت الإمكانية المادية في ناس مش بترضى بيه ... وهو إنك تعزل في أي منطقة من المدن الجديدة زي 6 أكتوبر أو القاهرة الجديدة أو ما شابه بحيث على الأقل عند بيتك تلاقي ركنة
ربنا يعفو عنك ويحفظك