الموضوع: انا عملت حادثه وبجد محتاج مساعدة

الف شكر ياجماعا والله يسلمكم وانا مش زعلان على العربيه كل اللى يجي فى الحديد يغور اهم حاجه اننا طلعنا منها بخير .

المشاركة الأصلية كتبت بواسطة جمال

اولا الحمد لله على سلامتك ومن كان معك بالسيارة
انا لما اتعاملت مع الجمعية لاصلاح سيارتى وعملت اخطار الحادث اعطونى اسم المهندس اللى هيعاين السيارة و رقم تليفونه , واتصلت بيه و راح عاين تانى يوم و مضى المقايسة فى التوكيل بدون تأخير او مشاكل او رشاوى
خد بيانات المهندس من الشركة و اتصل بيه و نسق معاه المعاينة
وتابع حقك و لاتتركه

ااولا الله يسلمك
وثانيا هم قالولى المهندس هينزل على المركز وصاحب المركز هـ يوديه لمكان العربيه ونمرت المهندس مع صاحب المركز انا مخدتهاش ساعتها تفتكر اروح اجيبها من التامينات تانى ولا اروح لصاحب المركز اللى جنبى اخدها منه ؟؟

الاخ الفاضل اولا حمدا لله علي سلامتك وقدر الله وما شاء فعل
من غير زعل انا شايف انك متاخر في المطالبة بحقك ومنتظر ان حل المشكلة هيجي لحد عندك
يجب ان تذهب الي مقر شركة التامين بنفسك وتطلب منهم اسم المهندس ورقمه وايضا انه يحدد لك ميعاد للمعاينة في وجودك ولا تقبل منهم الكلام العائم من ان المهندس هيجي بعد اسبوع وفي ضغط شغل والكلام الفارغ ده ولو وصل بيك الامر انك تطلب لهم النجدة وانت واقف لاثبات تقاعسهم عن عمل المعاينة للعربية وتنفيذ بوليصة التامين
ولك ايضا الحق في انك تتقدم بشكوي للهيئة المصرية للرقابة علي التامين وترفق بالشكوى صور للعربية من جميع الجهات وصورة بوليصة التامين
انت منتظر ايه هما مش هيترحركو ويصرفو فلوس الا لما يكون صوتك عالي واجراءات قاطعة
وربنا يعوض عليك

والله ياماريو انا مش عارف اعمل ايه اروح لوحدى ولا لازم اخد والدتى معايا لانها صاحبت العربيه وانا والدتى ماتقدرش تروح وتيجى ولو روحت لوحدى هل هيقولى لازم صاحبت العربيه هى اللى تيجى ولا ايه وهو ده اصلا السبب الرئيسى اللى معجزنى اعمل اى حاجه فيها ينفع اتصل بيهم واديلهم رقم الاخطار ويدولى رقم المهندس ولا ايه

المشاركة الأصلية كتبت بواسطة جمال

خد رقم المهندس من اى حته و كلمه بنفسك واتفق معاه على موعد المعاينة
صاحب المركز ماتفرقش معاه طالما العربية مش عنده
دور على حاجتك بنفسك ( لايحك جلدك مثل ظفرك ) , ماحدش هيدور على مصلحتك زيك انت نفسك

فعلا صاحب المركز ولا حاطط فى دماغه وانا لحد دلوقتى مكررتش اذا كنت هكهنها ولا لا ووالدتى بتقول اذا كانت هيصلحها صاحب المركز يصلحها واهى اسمها عربيه فى الاخر بردو وانا بقول اذا اتصلحت عمرها ماهترجع زى الاول وبعدين ارجع واقول طيب مهو حرام ادفع فى عربيه تانيه النسبه اللى هما بيقولها دى 10 % يعنى 7 تلاف جنيه وانا اصلا لسه دافع فى اللى اتقلبت مش عااااارف اعمل ايه ؟؟؟؟

السلام عليكم و رحمة الله
معلش قدر الله و ما شاء فعل و ان شاء الله ربنا يعوض عليك بأحسن منها ان شاء الله...
بص يا سيدي بالنسبه للخبير اللي هينزلك متدفعش و لا مليم لأن هي ديه شغلته و لو حسيت ان الخبير بيتكلم عشان الفلوس و كده يارت بعد اذنك تديني اسمه و بطمنك من دلوقتي الكلام ده مش هيحصل تماما و انا ان شاء الله مسؤول عن كلامي...
بس في كذا نقطه لازم تراعيها الاول و اولها المحضر انا عيز اعرف المحضر مكتوب فيه ايه و مين اللي كان سايق و لازم يكون محضر س و ج
تاني حاجه المفروض المركز المحترم اللي وديتله العربيه بيعمل المقايسه عشان الخبير لما يجي يناقش معاه المقايسه و انا متأكد مليون في الميه ان الخبير جه علي المركز و ملقاش المقايسه جاهزه و مشي علي اساس ان لما المركز هيخلصها هيكلمه عشان يقوله تعالي عاين احنا جاهزين و شكل المركز بتاعك مكبر دماغه ياريت تجيبلي اسم الخبير اللي اتحددلك طالما صاحب المركز عارفه لأن للاسف مش هعرف اجيبه دلوقتي عشان الجمعه و السبت و هو اسمه بيبقي متسجل علي السيستم فقولي مين و انا هكلمهولك بكره ان شاء الله....
تالت حاجه بقي موضوع التصليح او الهلاك الكلي ده بيبقي في ايديك انت تتحكم فيه زي مثلا لو عيز تهلك و شايف ان القرار ده هيبقي مناسب ليك و مش هيخسرك في البنك و هيتبقالك حاجه من شيك العربيه فديه حاجه حضرتك تحددها بنفسك فلو مصلحتك في الهلاك و ديها علي التوكيل علي طول و هتتهلك 100 % لأن في التوكيل بيعملوا مقايسه زي الفل و الخبير بيوافق عليها كلها و اكيد طبعا بمنظر عربيتك كده تكاليفها هتعدي ال40 % من قيمتها..
اما بقي لو شايف انو هيبقي ضرر ليك لو اتهلكت و عيز تصلحها فتوديها علي ورشه كده بنت حلال مصنعيتها قليله و يحاول يوفرلك في قيمه قطع الغيار عشان قيمه التعويض متعديش ال 30 % و يبقي تعويض عادي مش هلاك كلي....
يارب بس تكون فهمت قصدي و اكون عرفت اوصلك كل اللي عيز اقوله....
و بحب اطمن كل الناس الجمعيه يا جماعه زي الفل و مفيش عليها اي تأثير و الأيام جايه و هتثبت كلامي ربنا يجازي بس لعضو المنتدب القديم هو اللي خرب الدنيا الله ينتقم منه و هز اسم الجمعيه في السوق كله و بالسبه للشيكات اتطمنوا شيكات الناس كلها هتطلع مفيش مشكله ان شاء الله و اول دفعه للشيكات ان شاء الله هتبقي في 15 / 11 و التعويضات زي ما هيا محدش يقلك نهائي....
بس هيا المشكله في الاصدارات الجديده و التجديدات للوثائق الموجوده في الجمعيه هي اللي متوقفه حاليا و احنا حاليا بنحول الشغل علي شركات تانيه ....

و انا تحت امر اي حد في اي استفسار

السلام عليكم و رحمه الله

الف الف شكر ليك يا استاذ : ممدوح
انا ان شاء الله هروح لصاحب المركز وهاجيبلك منه نمرت المهندس وهبقى اقولهالك وان شاء الله اللى فيه الخير هيقدمه ربنا
وانا فهمت كلامك كله وتقصد ايه بيه بس انا عايز اعرف انا مثلا اخترت الهلاك فـ ايه هتبقى النسبه اللى هدفعها على العربيه الجديده 10% ولا 5 ولا 20 ولا مفيش خالص ؟؟؟؟؟؟