الموضوع: طقم شنبر

المشاركة الأصلية كتبت بواسطة فارس الواحة

طيب اللى هشترى منه بيقولى هتغيرلها طقم شمبر بس على اخر الصيف ، معنى كدا انى هحتاج اعمل كل اللى انت عملته ولا لا ، و اعرف حالة الموتور اثناء الشراء ازاى لانى مقدرش افكه ؟ وبعدين
الطلبات دى انتى اللى جبتها لميكانيكى ولا هوا اللى اشتراها ؟

بص ياباشا ..المكنه بتاعة العربية زي البطيخه ..الزميل اللي عمل طقم الشنبر وكلفته 1500 ..ده نصيبه كده ..عشان هو اللي كان فيها من مشاكل كلفه كده ..أنا أعرف واحد فك المكنه عشان يعمل طقم شنبر وكان عامل حسابه على 400 جنيه ..زي ما اللي باعله العربيه قاله ..صرف 4000 جنيه ..فتح المكنه لقاها عايزه مكنه ..غير كل حاجه من الألف إلى الياء في المكنه ..الحاجه الوحيده اللي متغيرتش الشورت بلوك ..ده حتى غير غطا التاكيهات عشان كان مقفع وكان معموله حشو بورق كرتون ..المكنه تتفتح ..وتاخد قرار من أول يوم إتفتحت فيه ..يا تكمل عمرتك ..يا تغير وتسقط مكنه ..إشترى عربيه تكون حالتها كويسه من صاج ومكنه وغيره ..تكييف عايز يتشحن ..دي الكلمة اللي بيكتبها البايع في الإعلان ..ولما تشتري تلاقي التكييف عايز يتغير كله ..فيها خبطة بسيطة تترد على البارد ..دي الكلمة اللي بتتكتب في الإعلان ..ولما تشتري تلاقي العربيه كلها مسوسة ..عايزه طقم شنبر فقط ..ولما تشتري تلاقيها عايزه مكنه ..مش ده اللي بيحصل برضه ولا إيه ؟؟؟؟؟؟

المشاركة الأصلية كتبت بواسطة فارس الواحة

مشكور لردك ، والله حيرتى زادت اكتر ، ياريت كان فيه امانة فى التعامل ، طيب ينفع اسيب مبلغ و اقوله هبص على الماكينة الاول ، أفتحها يعنى ؟

وده كلام برضه ؟؟؟؟!!!!...فيه حد بيشتري كده برضه ؟؟؟!!!!!...وبعدين هتحجز كام من الفلوس على ما تكشف على المكنه ..هتحجز أربع تلاف جنيه مثلا ...وبعدين حتى لو حجزت مبلغ ..ما هو هيدخلك بقى في شوارع وحواري على شاكلة طيب مش هعمل التوكيل غير لما تخلص الفلوس اللي عليك ..أصلي مش هجيب شهادة مخالفات غير لما تاخد قرار نهائي في البيعة دي وتقولي ناوي تشتري ولا لأ ...وبعدين ندخل بقى في حوارات طب هتحجز كام ..طب هتدفع كام ..طب أصل العربيه مش عارف مالها ..بقولك إيه ياباشا ..هي البيعة كده على بعضها ..يا تخلص فيها على بعضها ..يا تسيبها على بعضها ..وده رأيي بصراحه ..شوف كده لو تعرف تنزل في سعر العربيه الفين مثلا ..علي أساس إنها لو فتحت في الأربع تلاف يبقى كده الخسارة جايه بالنص ..يبقى إنت حطيت ألفين بس ..ولو جت في الفين يبقى إنت كده مخسرتش حاجه ..شوف كده وحاول ...ب