انا هشترى عربية جيلى سباركى 2005 وعاوز رأيكم
السلام عليكم ورحمة الله وبركاته
انا هشترى عربية جيلى سباركى 2005 إن شاء الله وعاوز رأيكم
وياريت أسمع نصايحكم
اولا صاحبة العربية أول مالك أشترتها من 2005 وهى معاها لحد دلوقتى يعنى 9 سنين
ولما شوفت أنا العربية وانا خبرتى بسيطة فى العربية بس حسيت أنها مهتمه بيها اوى ومحافظة جدا عليه
ودى تفاصيل العربية
1- فرش السيارة بكيسه مستخدمش ومركبه عليه فرش جديد
2- لسه مغيره 2 كوبلن وأنا سمعت أن الكبالين بتاعت العربية دى بتبوظ بسرعه الكلام دا صحيح ؟
3- الزجاج مش كهربا وهل لو عملته كهربا هيكلف كام ؟
4- كان فى مشكلة فى الديبرياج والميمكانيكى قالها ممكن يتلم او يتصلح وقالت له غيره كله ولسه مغيراه
5- الاربع كوتشات جداد
6- بطارية لسه جديدة
7- الرخصة ساريه حتى 2015 او 2016
8- العربية عامله 70 الف كيلو بمتوسط 650 كيلو فى الشهر تقريبا لو حسبنا 70 الف على 9 سنين
9- مكتوب فى كل مواصفات العريية دى على النت أن العربية باور وصاحبة العربية قالتلى أنها باور بس لما سوقتها والعربية واقفة ودايرة وبلف الدريكسيون كان تقيل زيه زى 128 بالظبط فبسألها قالتى هى باور بس وهى واقفه بتبقى تقيله وهى ماشية بتبقى خفيفه بس مش مقتنع أنا بالكلام دا فهل هى باور فعلا ولا نصف باور ولا الباور مش شغال ؟
10- زجاج المريات كهريا فى موديل 2005 ولا التحكم فيه من بره علشان ملقتش زرار التحكم جوه ونسيت أسألها
11- العربية فيها خبطة بسيطة خالص فى الرفرف الخلفى يعنى تقريبا نص شبر
12- لقيت حته كدا متقشرة فى الكبوت ومرشوشة بسألها لقيتها بتقولى دى من الشمس فهل فعلا الشمس بتعمل كدا؟
13- موتور العربية موتور تيوتا كرولا 97 الكلام دا صحيح ؟
عاوز أعرف رأيكم فى العربية بالمواصفات دى؟ وسعرها كام ىتقريبا ؟ وعاوز أعرف أسعار قطع الغيار تقريبا وأمكانهم خصوصا فى الهرم وفيصل والمعادى والجيزة ؟
مع العلم أنى معايا حاليا 128 فيات فهل كدا هيبقى فى تقدم ولا الاتين اوحش من بعض ؟
وكنت عاوز أكشف على العربية كشف كامل علشان أشتريها وأنا مطمن يكون برضو فى المعادى او قريب من المعادى وعاوز أعرف أسعار الكشف كام فى البنزينة والمراكز وانهى افضل وهل اكشف عليها فى مراكز خاصة بالجيلى ولا فى اى مركز؟
معلش يا جماعه طولت عليكم وياريت اللى يعرف حاجه يساعدنى بيها