الموضوع: مشاكل ماكينة زجاج باب السيارة (دروس مستفادة)

انا هاحكي قصة حصلت معايا ؛ من فتره بنزل زجاج الباب الخلفي من من لوحة المفاتيح اللي جنبي فجأة لاقيت الزجاج وقع كله تحت ف الباب طبعا ماينفعش امشي كده او ايب العربيه في مكان كده روحت لفني تصليح أبواب سيارات

قالي كلام غريب ( هافكلك الماكينه من الباب وتيجي تاخدها بكره علي ماتروح تتلحم وتتصلح ومش عارف ايه كلام غريب كده والتكلفه 150جنية طبعا ماصدقتش الكلام ده )

المهم رفعت الزجاج وثبته بمفك رفيع لغاية ما افهم القصه

لفيت وسالت عند بتوع قطع الغيار ووصلت لقب القصه انت طبعا ماتعرفش ايه اللي حصل وبتجري علي اي حد بتاع زجاج يلحقك عشان الامان للعربيه وهما بيلعبوا ع الحته دي
طبعا كل اللي بيحصل ان الماكينه فيها اجزاء فيبر او بلاستيك مع الوقت وغياب التزييت تنشف وبتتكسر والسلك برده ممكن يبوظ

طبعا برده وانت بتشتري من المحلات اسأل في كذا مكان لان محل هايقولك 45 و هي نفسها في مكان تاني يقولك 20 اعتمادا علي عدم علمك باسعار الحاجه دي

الاجزاءالبلاستيك دي عباره عن بكره دائريه في قلب الماكنة بيلف عليها السلك عند بتوع قطع الغيار هاتلاقيها ب 10 او 15 حتي 25 جنيه علي حسب نوعها اي حد بيصلح ابواب زجاج (صنايعي مش محل بيع بيقولك دي 70 جنيه ) وبكره اخري مربعه بتمشي علي المجره اللي شايلله الزجاج تمنها طبعا برده من 15 ل 25 جنيه ويجي الصنايعي يقولك 70 جنيه برده كل ده غير مصنوعية ايده والاكراميات كذلك السلك المتر ب 5 جنيه بيبيعه ليك ب 20 جنيه المتر

يعني بحساب التكلفه البكرتين والسلك اخرهم 60 جنية و مصنوعيه 30 جنية لان الموضوع بسيط مش مستاهل الماكينه تبات عنده الفك والتركيب اخد بالظبط نص ساعة عند صنايعي اخر بس هو كمان قاللي نفس الاسعار للبكر والسلك بس قولتله الحاجه كلها معايا طبعا وافق وعملها علي مضض كان مخنوق اوي
\
نقطة اخيره قطع الغيار الاستيراد انضف من اي حاجه تقلييد جديده انا جبت مبرد زيت ماتور اتحاد اوربي من محل في صقر قريش قعد سنه بيجيب زيت وتسريب من عاوز يخلص رغم اني جبت ليه اويل سيل اصلي من الهاشمية كان ب 400 جنيه و بعدين قولت اجيب استيراد من الحرفيين كان تمنه 200 جنيه الحمد لله ركب ماجابش زيت تاني

طبعا مش عاوز اذكر اسماء المحلات والناس بس عامة لو انت من المعادي عد صوابعك ورا اي صنايعي لان الامانه عندهم قليله شويه صنايعي جابلي كوعه في دوره التبريد وقاللي ب 150 جنيه ودي الاصليه وبعدين اروح الهاشيمه الاقيها ب 75 جنيه و واحد تاني برده جابلي كوعه برده من صقر اتحاد اوربي وادهالي بتمن اغلي من الاصليه ههههه

هههههههههههه احمد زاهر ده تعد صوابع ايدك ورجلك لامؤخذاه وراه مش ممكن ابدا الراجل ده ( علي فكره برده ليه زبونه اللي بيحب انه يتنصب عليه)