المشاركة الأصلية كتبت بواسطة gamal710
طيب انا مش عارف مشكلتى نفس المشكله ولا مختلفه هحاول اشرحها بالتفصيل لانها معقده شوية على الاقل بالنسبه لي لانى مابفهمش فى العربيات اوى ولسه جديد.
التوكيل بصراحة وللاسف الشديد مش لاقي فيهم اى حد بيفهم , بداية من 3 مهندسين استقبال مش فاهمين حاجة , لحد الاستاذ المهندس مدير الورشة اللى مش فاهم اى حاجة بردة, ودة رأيي فيهم مع العلم انى مش بفهم حاجة فى العربيات, امال لو حد بيفهم فى العربيات اتكلم معاهم مش عارف هيعمل ايه فى نفسه ... انا بتكلم على فرع مصر اسكندرية
عندى كروز 2010 كنت جايبها مستعمله وهى دلوقتى عامله 84 الف كيلو
المشكله عندى بتنقسم لنقطتين :
1- لمبه ال check engine الصفرا احيانا بتنور , ومع الملاحظة لقيت انها بتنور لما بتمشى على سرعه فوق ال 80 مثلا, بتنور وتعمل فلاش كدة يعنى بتنور وتطفي مش بتنور وتثبت , ولما بطفي العربية وادور تانى اللمبه بتطفي, وبمشى بيها عادى لحد ما ادوس شوية بنزين تبتدى تنور, المهم فى التوكيل قالولي لازم اغير كومبيوتر الموتور, بس ممكن امشى بيها شوية يعنى مش هتأثر على حاجة.. الكلام دة من 4 شهور كدة او 5
2- الفتيس عندى بينتش جامد جدا على النقله الخامسه او الرابعه , يعنى فوق ال 90 كيلو كدة تقريبا ال rpm بيعلى وبعدين تحس انه فوت غيار والعربية نتشت لقدام جامد, وتروح لمبه ال check engine تنور, بقيت النقلات كانت شغاله تمام لحد كدة
- رجعت للتوكيل من اسبوع علشان يشوفو حل لانى زهقت من الموضوع دة ومش قادرين يفهمونى ايه المشكله بالظبط, وهل النقطتين اللى فوق مرتبطين ببعض ولا دى حاجة ودى حاجة
المهم روحت لمدير الورشة وقولتله شوف حل لانى زهقت, قالى لازم تغير زيت فتيس, طبعا غيرلى الزيت بس بصراحة من غير ماعرف النوع ولا كام ليتر ولا اى معلومات, بس تقريبا دفعت 740 جنيه تقريبا على ما اتذكر للزيت.
وقالى انى لازم اغير كومبيوتر الموتور لان دة اللى بيعمل النتشه الجامدة دى وهو اللى بيخلى اللمبه تنور
- بعد ما غير الزيت دلوقتى النتشه بقت تقريبا فى معظم النقلات, وبقت قويه جدا على ال r يعنى وانا راجع بضهري لورا, واللمبه لسه بتنور لما بدوس بنزين واعدى ال 90 كيلو مثلا , يعنى ممكن يكون على النقله الخامسه.
- المهندس المحترم مدير الورشة مصمم انى احتمال قريب اوى اغير فتيس, اقوله يا سيدى ازاى يعنى اغير فتيس وهو مافيهوش مشكله , يقولى اصل انا شاكك, اصل انا حاسس , اصل انا متوقع, وبيتلجلج فى الكلام كأنه مخبي عنى حاجة, ويقولى لما تغير الفتيس هعملك تخفيض, كأنه متأكدة انى هغير الفتيس
- هو مدينى معاد كمان كام يوم علشان اروح اغير كومبيوتر الموتور, ومش عايز يوعدنى انى بعد ما اغير كومبيوتر الموتور ان الفتيس هيشتغل تمام, مع ان كلامه ان كومبيوتر الموتور هو اللى بيبوز نقلات الفتيس
الأسئله بالترتيب:
1- هل منطقي انى اغير كومبيوتر الموتور لمجرد ان لمبه ال check engine بتنور؟
2- لو فعلا لازم اغير الكومبيوتر هل ينفع اصلحه او حتى اشترى واحد مستعمل؟ فى التوكيل(6000 جنيه)
3- انا دلوقتى ماعداش عليا اسبوع واحد مغير الزيت الزفت اللى فى التوكيل دة والفتيس بقى زفت خالص, هل اغير زيت بالطريقة المذكورة هنا وامرى لله واجرب؟ ولا انا عندى مشكله اكبر من موضوع تغيير الزيت؟
4 - هل كومبيوتر الموتور ليه علاقة بالنتشه اللى بتحصل فى نقلات الفتيس؟
انا اسف جدا على الاطاله بس بجد انا فى دوامه
جزاكم الله خيرا