الموضوع: ازاى افتح حساب بالدولار

انا كنت فاتح حساب بالدولار من حوالي 6 سنوات وقفلته تاني لعدم إحتياجي له .. في بنك الأسكندريه
بالبطاقه الشخصيه فقط ومبلغ بسيط بالجنيه المصري لم يتعدى ال 500 جنيه .. أكيد كل ده أتغير حالياً ( لكن مش تغيير يبعد الناس عن البنوك )

النصيحه اللي اقدر أفيد حضرتك بيها وبتجيب مالأخر .

1- حضرتك تبحثي على جوجل وتحددي فلتر البحث مصر - اخر سنه ( علشان تشوفي تجارب الاخرين الحديثه )
2- كل بنك له موقع عالنت .. وداخل الموقع بعض التفاصيل الغير كامله عن خدمات البنك والحسابات
والأهم رقم خدمة العملاء اللي غالباً بيكون رقم مختصر خمس ارقام
هتتصلي بكل بنك .. وتاخدي المعلومه من عقر دارها مباشرة وتكوني مجهزه قبل إتصالك انتي عايزه تسألي في ايه وايه وايه
غالباً ( ايه هي إجراءات فتح حساب بالدولار , كام الحد الأدنى لفتح الحساب ونوع عملة الإيداع , نظام الفوائد , نظام الحوالات الخارجيه , نظام السحب , نظام ال atm وعملة السحب , هل يتوفر إمكانيه إدارة الحساب من على موقع البنك .. الخ )

موظف خدمة العملاء ( عامل زي الروبوت ) بيرصلك التفاصيل بالتفصيل الممل من قبل ما تسألي وكلامه هو الصح أكتر من موظف الفرع نفسه ( سعات موظفين الفرع بيكون عندهم معلومات غلط .. اه غلط عادي بتحصل معايا كتير جداً )

وطبعاً بعد كل مكالمه هتكتبي في ورقه اسم البنك ونتائج المكالمه ( علشان ترجعلها بعد ما تخلصي كل إتصالاتك وتقارني بينهم وتراجعيهم ) لأنك بعد اتصالين تلاته هتتلغبطي بين معلومات كل بنك ومش هتفتكري مين قال ايه .

3- بعد ما تعملي فلتر وتنقي كام بنك قررتي انك تبقي عميله عند أحدهم
يبقى السؤال : مين أفضل في التعامل وبينجز بين البنوك الفلانيه ( ومش هتكوني محتاجه تدخلي في دوامة ايه الإجراءات , طب وازاي , طب وفين ) .. وهيدخل واحد بعد شويه يقولك أنسي الإجراءات معقده ولازم تعملي تحليل dna وفيش وتشبيه وإثبات مهنه .. الخ الخ ويعقدك ويحبطك .

بالتوفيق .

فيه البنك العربى ميزته انك ممكن تسحبى من المكن دولار وده مش موجود فى اى بنك تانى تقريباً

بالنسبه للانتشار فماكينات Hsbc ماليه الدنيا وموجوده فى كل سوبر ماركت مترو ماكينه برضه

المشاركة الأصلية كتبت بواسطة أحمد كمال

hsbc ..... كلمي الكول سنتر و شوفي الشروط

انا فاتحه من 3 سنين تقريبا .....

بس اللي أنا سمعته ومش متأكد منه إنك لو عندك حساب بالدولا في بنك, ما ينفعش تشتري منه دولارات وانت مسافر.

هايقولك ما ينفعش تشتري مني دولار عشان إنت عندك حساب بالدولار

عن تجربة hsbc خدماتة سيئة لو هايتم التحويل من خارج مصر
بس للامانة جوة مصر رقم 1

فى بنك الاتحاد الوطنى كويس جدااا وكمان مصرف ابوظبى الاسلامى الاتنين دول مصاريفهم البنكية قليلة جدا