الموضوع: سرقة العربيات بالبيض

مع زيادة الانفلات الامني و مع سوء الاوضاع الي تمر بها البلاد , بيجد الحراميه و النصابين ارض خصيه لهم لممارسه اعمالهم الاجراميه , و من خلال تجربتي اليوم هحكي ليكم تجربتي مع محاولة سرقة سيارة صديقي عن طريق ( البيض ) اي نعم البيض
الموضوع بدء باننا كنا في مشوار علي طريق العبور و ماشين بالسياره عادي جدا , مره واحده لقينا بيض اترمي علي زجاج العربيه ( بيض ني )
ولمحت علي جنب الطريق عربيه واقفه , صديقي للاسف الشديد شغل ( مساحة الزجاج ) و ده ذاد الطين بله لان الزجاج كله بقي عديم الرؤيه
ولكن الحمدلله انا كنت قرأت عن حادثه زي ديه قبل كده و قولتله اوعي توقف العربيه و حاولنا علي قد ما نقدر انه يفضل ماشي بالعربيه لحد اما وقفنا عند موقف ميكروباصات علي الطريق
و نزلنا و لقينا الناس في الموقف قالولنا احمدوا ربنا العربيه كانت هتتخد منكم
وطلع الموضوع ان بتبقي عصابه اجراميه , بيحدفوا بيض ني علي زجاج العربيه
فانت بيبقي قدامك اختيار من الاثنين الاختيار الطبيعي : ياما انت هتشغل ( مساحات العربيه ) بتفتح المياه و المساحه و ديه بتخرب الدنيا اكثر لان الزجاج كله هيبقي مش شايف منه حاجه
و بتضطر انك توقف العربيه علشان تنزل تمسح الزجاج او انك من الاول من الخضه ان البيض اترمي عليك بتركن العربيه علي جنب و تنزل علشان تشوف ايه الي وقع علي الزجاج
و العصابه بتبقي واقفه بيطلعوا عليك بسلاح و يخدوا منك العربيه و يمشوا .
طيب اعمل ايه ؟

لو اتعرضت للموقف ده اوعي تشغل مساحه العربيه و اوعي تقف مهما حصل , امشي بالعربيه لحد اما تقف في حته امان و فيها عمار و انزل امسك البيض بقماشه ناشفه , خد بالك قماشه ناشفه مش مبلوله و بعد كده اغسل الزجاج بالصابون عادي
وربنا يسترها علينا جميعا .


المصدر
تجربتي مع حيلة البيض لسرقة السيارة




حد اتعرض للموقف ده قبل كده ؟ و فين