الموضوع: بالصور....وداعا ملص البيض

كنت عملت موضوع تحت عنوان(وداعا ايها الملص اللعين) من فترة وكنت وعدت حضراتكم انى اكمل الموضوع بالصور واعتذر عن التاخير لظروف العمل والامتحانات.
طبعا اذا قلت كلمة لادا فده معناها انك بتتكلم عن ملص البيض والعربيات اللى بتلاقيها مترميه يمين وشمال والعربيه باركه على الارض وصاحبها ياعينى محتاس اخر حوسه.
الحمد لله اخوانا الروس بقيادة بوتين قعدوا يفكروا لغاية لما طلعولنا بيض مابيملصش لكل انواع الادا،بيض روسى اصلى محترم جدا وخامته نضيفه جدا وبيقعد على الاقل سنتين او خمسين الف كيلو وانا جربته لاكتر من خمسين الف وزى الفل الحمد لله
المميزات
1.روسى اصلى بضمان الوكيل ووجود البطاقه الاستيرادية.
2.من شركة بلماج ودى شركة محترمه جدا جدا وبتورد لجنرال موتورز جميع انواع البيض والمقصات ونزلت السوق المصرى بكثافه وبتنزل قطع غيار اصليه لكل العربيات الادا
3.خامات نضيفه جدا وهتلاحظ الفرق بنفسك
4.طبعا والاهم هتنسى ملص البيض نهائى وهتمشى وانت حاطط بطيخه صيفى فى بطنك.
5.بتتحمل اقصى المطبات والحفر اللى بتتميز بيها شوارعنا الجميلة
6.ثبات عالى جدا للعربيه فى السرعات العاليه والطرق السريعه.
7.غطاء كاوتش للحمايه من الاتربه والمياه وعشان تحافظ على الشحم اللى جوه.
العيوب:
1.السعر غالى شويتين (الطقم بحوالى 240 جنيه)
2.مش منتشره قوى (حمدى لادا وعندنا الوكيل فى الاسماعيلية ومش هتلاقيها فى التوفيقيه كلها ماتتعبش نفسك)
3.الدركسيون بيتقل حاجه بسيطه.
4.البيض السفلى منها بمشاحم العلوى بدون (يعنى هتضطر كل شهرين تشحمها ب 5 جنيه ولو انى شايف ان دى ميزه انك تبقى مطمن على الشحم اللى جوه البيضه.
5.ممكن تسمع صوت طقه خفيفه لو خدت مطب جامد او وقعت فى حفره جامده او لو اهملت التشحيم.
تعليمات التركيب:
1.قبل ماتركبها تجيب مشاحم (3جنيه)وتركبهم الاول عشان يبقى موضوع التشحيم سهل بعد كده
2.تغير كل المسامير والصواميل اللى بتثبت البيضه فى المقص (كل حاجه ليها عمر افتراضى)
3.تملا الغطا الكاوتش شحم(العفشجى هيقولك مش مهم،بس هات علبة شحم نضيف معاك واملاها بنفسك).
4.تروح للمشحمه وتشحم البيض تانى يوم على بال مالبيضه تنعم شويه وماتسافرش بيها اول يوم.
تحذيرات:
للاسف ياجماعه فيه ميكانيكى مشهور هنا فى المنتدى مش هقول اسمه طبعا بيركب بيض من عنده على اساسا انه روسى بدون مشاحم(لما سالت فى التوفيقيه لقيته صينى ب 140 جنيه)انا عارف انه ميكانيكى محترم والناس كلها بتحبه وبتروحله وانا اولهم بس غالبا هو مش عارف.ولما وريته البيض الروسى قالى هيقعد يطقطق معاك ومارضاش يركبه وده الحمد لله محصلش معايا .
اسيبكم مع الصور

معلش ياجماعه ماقدرتش ارفع الصور....المنتدى فيه مشكلة فى الرفع