هشتري ميجان بس محتاس وعايز المساعدة

**Mamoud salah H** · 04-12-2014 11:43 PM

السلام عليكم اهل الرينو عموما والميجان علي وجه الخصوص
العبد لله لسة نازل من اوبل فيكترا 1997 وبصراحة كتر الف خيرها استحملت 3 سنين من غير ما تعمل اي حركة مش تمام وكانت حمالة اسية ومش بتقول لا في اي حاجة وعمرها ما عطلت بيا في اي مكان ولا وقفت

المهم عشان مطولش اكتر من كدة
بفكر بجد في رينو ميجان اوتو 2005 2006 2007 اقصي تقدير
وايضا في اوبل استرا اوتو 2005 2006

ياريت لو حد يجاوبني علي الاسئلة دي عشان ابني قراري عليها

1-الميجان اوتوماتيك الفتيس بتاعها اعتمادي وهيستحمل مشوار يومي من شبرا مصر للمقطم(مشوار الجامعة كل يوم) رايح جاي وطبعا في زحمة ووقفة كتيير والعربية نفسها هتستحمل ولا هتجيب ورا بدري (اهم نقطة)

2-ممكن اسعار قطع الغيار الاستهلاكية زي تيل الفرامل والسيور والفلاتر (نقطة مهمة عشان انا طالب جامعي)

3- اسعار المصنعياتت حدودها ايه ويسلام لو حد يعرف مكان قريب من شبرا ووسط البلد بيشتغل فيها (مهم برضة)

ولو في اي نقط معينة ممكن اخد بالي منها وانا بتفرج علي العربية وتبين ان الفتيس حالته تمام

وبدون تحيز حضراتكم تختارو ايه افضل الاسترا ولا الميجان بدون النظر للكماليات

اسف لو طولت بس المبلغ الي هيدفع مش هيجي تاني وشكرا مقدما

**Elkordy2000** · 05-12-2014 12:13 AM

مش عايز احبطك .... بس صعب جدا جدا تلاقي ميجان حالتها كويسه ومش متهانه ..... قعدت ادور فتره طويله علي عربيه حلوه ... للأسف كل اللي شوفته عدمان ..... عايز تركب فرنساوي نصيحه يبقي اركب زيرو لو تقدر .... أو الاسترا

**M.Radwan** · 05-12-2014 09:38 AM

- انت محددتش السعر اللى انت تقدر عليه ايه.. الميجان النظيفة عزيزة أوي في السوق وغالبا هتلاقي سعرها معدي 80 ألف مستريح لموديلات 2008 وانت طالع..موديلات 2005 و 2006 انت وحظك وبختك يا ابو بخيت.
- الميجان مش زي الأوبل خالص..عايزة اهتمام وايدك تبقى فيها علطول
- حاجة الميجان والناس اللى بيشتغلوا فيها موجودة في صقر قريش..وجسر السويس والحرفيين ومدينة نصر.
- أسعار قطع الغيار الأصلي وغير الأصلي هتلاقيها في المواضع المثبتة..ممكن أقولك مثلا فلتر هواء: 90 جنيه أصلي - 50 جنيه غير أصلي..تيل فرامل أصلي: 400 جنيه- رمسا 200 جنيه.
- بالنسبة للفتيس هو مشهور جدا بالنتشة اللى بين الأول والتاني هو وفتيس البيجو..بس شغال يعني مش مزعج
- بما إنك طالب جامعي فأنا شخصيا أرشحلك الأسترا أو لو هتتنازل عن الأداء شوية ممكن تشوف ياريس مثلا أو لانسر.

**Mamoud salah H** · 05-12-2014 06:32 PM

طب انا دلوقتي انا كنت بتفرج علي عربية ميجان 2006 اوتوماتيك
ورحت كشفت عليها والنتائج كالاتي
1-كبس الموتور 74%
2-حالة العفشة والشاسية جيد جدا
3-دواخل طبعا فابريكة رشة حزام خارجي فقط
4-تحتاج شريط ايرباج

مشكلة واحدة فقط
في تسريب زيت من الفتيس وواصل لبطن العربية ولكن بالتجرية العملية الفتيس بدون اي نتشات او ي تاخير او رزع او هبد او اي مشكلة خالص فقط التسريب والفني بيقولي هيحتاج طقم سيرفيس

السعر بعد الفصال والكشف 56 الف جنيه والعربية بدون موضوع الفتيس دة ما شاء الله عليها كويسة جدا جدا وسليمة جدا وكل حاجة شغالة تمام

**Mamoud salah H** · 06-12-2014 01:02 AM

الميزانية اقصي حاجة 65 الف واللانسر والياريس بكرهم دة غير اني مش معايا يكمل تمنهم

**شادي ايطاليا** · 06-12-2014 02:07 AM

ياباشا انا كمان هشتري ميجان بس بيني وبينك اتمني تكون مانيوال عشان خايف من حوار الفتيس ده سؤال بقي انت عرفت من فين ان حاله الموتور ٧٤ ف الميه دي تقديري من عندك ولا ازاي اتحسبلك يعني

**تامر.محمد** · 06-12-2014 10:02 PM

خليك في 2007 و طالع , و زود ميزانيتك لحد 70 مثلا
هتلاقي الحالات النضيفة متواجدة اكتر شوية

و تستحمل المشوار اللي بتقول عليه و اكتر بكتير لو حالتها كويسة

**Mamoud salah H** · 08-12-2014 06:34 PM

الف شكريا رجالة قررت صرف نظر عن الميجان لعدة اسباب ان في منطقتي مفيش حدبيصلحها خااالص وكمان تكييفها ضعيييف جدا جدا اناشوفت اكتر من 7 او8 عربيات لقيت ان التكييف بتاعهم كلهم وحش جدا وبعد الكشف اتضح ان دة الطبيعي شكرا علي تعبكم معايا وهدور علي اوبل استرا او سيات ابيزا 2006 وربنا المستعاان