الموضوع: تظبيط صوت النترا 2007

السلام عليكم ورحمة الله

انا عايز اظبط صوت عربية النترا 2007 .. العربية كل حاجة الصوت فبريكة ما عدا الكاسيت بايونير .. ما خدتش بالي من الموديل بتاعه بس هو في فتحة يو اس بي وده تقريباً اهم حاجة عندي دلوقتي :)

بالنسبة لعدة الصوت .. انا عندي آمب الباين 640 وات 4 تشانيل ، وصب انفينيتي 10 بوصة

صوت الاتنين كويس مبدئياً

كده فاضل السماعات .. من خلال مشاركات الاعضاء المحترمين وتجاربهم .. فهمت ان افضل سماعات بيضاوي ممكن اركبها حالياً هي كينوود دبل بيس صناعة اندونيسي ان وجدت واتمنى ما الاقيش اقل من كده :)

طيب هو الجي ام 4 تشانيل وانا موصل اتنين بريدج عالصب .. الاتنين الفاضلين كده هيبقو للسماعتين

بالنسبة لسماعات الابواب !

انا عندي الاربع ابواب فيهم سماعات .. وعايز اشيلهم واحط سماعات صوتها يكون أقل ما يوصف بيه .. رائع .. وفي البابين اللي قدام جمب المراية من جوه فيه تويترات بس صغيرة جداً

محتار جداااااااااااااً بالنسبة لقصة الابواب دي .. عايز اعرف اربع سماعات للابواب وتويترين هيحتاجو آمب تاني ولا هيشتغلو على طول عالكاسيت ؟!

السماعات الجديدة هتركب تحت الغطا بتاع السماعات الفابريكة اللي في الأبواب مكانها بالظبط ولا مش هينفع وفي الحالة دي لا قدر الله هيبقا الحل ايه ؟

المكان الصغير جداً اللي على شكل مثلث يمكن اكبر من مثلث الجبنة النستو بحاجة بسيطة بتاع التويتر اللي في الباب اللي قدام ده هينفع يتفك برضه ويركب فيه تويتر اصلي ؟

وبالنسبة لسماعات الابواب .. اللي على ما فهمت بتكون اسمها سماعات كومبوننت .. ويا ريت لو فهمت غلط حد يصححلي فكرتي .. برضه على حسب ما قريت من الاعضاء ان احسن حاجة سوني او الباين على ما أذكر .. عايز اعرف الطقم بيكون عبارة عن سماعتين ولا اربعة وتويترين ولا انا بشتري السماعات لوحدها والتويترات لوحدها !

انا مشغل حالياً الجي ام والصب في البيت والصب مع انه 10 بوصة بس ما شاء الله صوته زلزال مع الجي ام مع اني ولا مراعي جودة الوصلات ولا نيلة ، والجي ام مديله الباور من الباور صبلاي بتاع الكمبيوتر

لكن كل الدنيا متفقين على ان احسن جي ام للصبات بلا منازع هو السيمفوني ..

فاذا كنت محتاج جي ام تاني للسماعات بتاعت الابواب .. يبقا في الحالة دي اجيب جي ام سيمفوني للصب ... واخلي الجي ام الألباين للاتنين البيضاوي ... مش هيتبقا برضه غير اتنين تشانيل لـ 6 سماعات في الأبواب !!!!

معلش مش عارف اظبط المسائل في دماغي كويس ..

بعدين عايز اعرف بالظبط ايه الوصلات اللي هحتاجها واحسن نوع واجيبها منين عشان انزل مشوار واحد اشتري كل الوصلات اللي هحتاجها من غير ما الف عليها كتير

وبالنسبة للصب برميه في الشنطة بالبوكس ما بيتثبتش بحاجة ! .. وبالنسبة للصب نفسه والكون جمبه .. مش تفرق اذا كان الصب والكون ناحية الشارع او ناحية العربية ؟

وهل ممكن يكون في كنترول زي سويتش عشان افصل الصب واشتغل عالسماعات بس لأن احياناً بكون مصدع ممكن اسمع اغاني بس على السماعات لكن مفيش قلب اسمع الرزع بتاع الصب ده

وأخيراً .. انا عايش بقالي كتير اوي بالصب ده ولما جيت قريت ولقيت ان مقاسات الصبات بتفرق من 15 وطالع .. وجيت اقيس الصب بتاعي اتفاجئت انه 10 :)

انا كنت فاكره 12 .. هو صغير فعلاً بس صوته فظيع .. وانا مش بقول ده مقارنة بلا شيء ... بركب ميكروباصات وتكاتك وبيكون حاطين صبات كبيرة وبوازيك والصوت عندي تمام جداً .. معرفش عشان الصب امريكي .. ولا الجي ام الباين .. ولا كارت الصوت بتاعي كرييتيف .. الله أعلم

بس الواحد تحت اي ظرف بيبقا عايز احسن حاجة .. فهل لو جبت صب 15 او 17 او لو حصل معجزة ولقيت اكبر هيكون الفرق يستحق التجربة .. مع العلم ان الصب اللي معايا امريكي .. واللي في السوق دلوقتي غالباً 3 اربع ماركات ... بايونير .. سوني اكسبلود .. جي بي ال .. كينوود واغلبهم صيني او فيتنامي والاتنين عيانين بصراحة في الصناعة .. بس انا ما جربتش حاجة وعايز رأي الناس اللي جربت امريكي وصيني تقوللي .. جايز الدنيا اتطورت وانا نايم في بيتنا ... لأني بقالي فترة مش متابع ومن زمان واحد صاحبي كان قاللي على معلومة ان احسن جي ام للصبات هو السيمفوني وانا قلت ده تلاقيه ما شافش جي امات وقصده عالحاجات بتاعت التكاتك بس .. لكن اتفاجئت لما قريت رأي الناس في المنتدى هنا انه فعلاً ده احسن جي ام للصبات مع ان الناس هنا ما شاء الله دايسين ومجربين البانش والألباين وكل حاجة !!!

بالنسبة للبوازيك .. على ما فهمت برضه ان صوت البازوكا زي صوت الشاكوش .. يعني صوت البيس من غير صدى بعديه ... على حسب ما فهمت من شرح احد الأعضاء صوتها زي مثلاً : ديب ........ ديب .......... ديب ، لكن صوت الصب بيكون معاه الصدى زي: ديننننننننننننننننننن، دينننننننننننننننننننننن .. devvvvvvvvvvvvvv ... وانا بحب اكيد الصوت العريض اوي اللي بيفضل يزن في دماغي ساعة ده مش الصوت الحاد اللي بحس كأن حد خبطني في دماغي .. فاذا كان ده برضه الفرق الصحيح بينهم مش انا فاهم غلط .. اعتقد كده المفروض اتجاهل فكرة البازوكا تماماً :)

اشتري منين واركب فين .. كنت يوم الجمعة في التوفيقية .. وللاسف اتصدمت لما سألت على السجان ولقيت وكر مهجور جوه حارة جوه ممر قاعد فيه شوية ناس بتنش ومش عايزة تعمل حاجة وفيه صبين مرميين مفيش غيرهم اذا كان عاجبك ولا جي امات ولا اي حاجة !!

فانا عايز مكان محترم اشتري منه .. على ما اذكر زمان كان ادريان بيبقا فيه حاجات جبارة ... بس الفرع اللي كان قريب في الدقي قفل .. معرفش ممكن اجيب منين دلوقتي .. وبالنسبة للتركيب بقا .. عايز اعرف فين الاقي واحد صنايعي يكون فنان يخلصني ويعرف اي حاجة غلط من ايه ويتصرف زي صوت زنة حاجة مش راكبة كويس .. اي حاجة يعملها صح

وبالنسبة للرف الوراني .. اعتقد ان من الاحسن احط رف خشب واحط فيه السماعات الجديدة .. عايز اعرف الموضوع ده تبع مين .. اللي هيركبلي السماعات ولا هعمل الحوار ده فين .. وحد جربه في النترا 2007 عشان انا مش واصلاني الصورة كويس برضه هيكون عامل ازاي :)

انا حاسس اني كتبت خمسين موضوع .. آسف جداً عالاطالة بس انا اول حاجة هعملها اول ما امسك العربية اني اظبط الصوت عشان ما بطيقش اسمع صوت الا A1

متابع باهتمام :)

المشاركة الأصلية كتبت بواسطة ahmad--ezzat

ههههههههههههه باشا..انت بتكتب كتير كده ليه
ايه ميزانيتك طيب ؟

سوري يا جماعة .. اصلي شفت اراء كتير اوي فبقيت محتار في كل حاجة تقريباً :)

عموماً يا باشا انا بصورة مبدئية عندي تقريباً نص العدة : الكاسيت والجي ام والصب

يعني مش محتاج غير سماعات بيضاوي وسماعات الابواب .. وجايز جي ام لسماعات الابواب مش عارف هتحتاج ولا لا ..

فمعتقدش محتاجين ميزانية .. المهم انهم يدو أداء ممتاز ما اندمش عليهم واحتاج ابيعهم بخسارة عشان اجيب حاجة تريحني :)