ارجوكم تعبت من التفكير,, أحسن عربية بحد اقصى 175 ألف
محتار جدااا اشترى ايه ,, انا معايا نيسان صنى سوبر صالون الشكل القديم ومحافظ عليها جدا وقررت ابيعها واجيب عربية تانية ,, كنت رايح للكورولا وبصراحة وبعد طول تفكير حسيت ان كتيير اوى سعرها عليها وده مع احترامى للعربية وهى فعلا عربية كويسة بس سعرها كتيير عليها
علشان كده فكرت انى ادور على عربية تكون احسن قيمة سعرية او احسن استثمار مقابل الفلوس وبالتالى قررت اخلى الميزانية 175 ألف بحد اقصى وده خلانى بقارن بين
فلوانس - سنترا - شارك وطبعا اتمنى حد من اهل الخبرة هنا فى المنتدى يفيدنى برأيه او لو عنده اختيار تانى
بالمناسبة انا بدور على عربية شيك من بره وفخمة من جوه علشان احس بالتغيير وتكون اعتمادية عالية وقليلة الأعطال سحب وثبات ممتازين او جيد جدا على الأٌقل وتوكيل محترم فى التعامل وعندهم ضمير فى الصيانات وتوافر قطع الغيار- سعر اعادة البيع مش فارق بالنسبة لى خالص - محتاج الأوبشن الأساسية واهما الأوبشن الخاصة بالفرامل وعوامل الأمان والثبات والسنتر لوك ومرايات كهربا ظبط وضم وسى دى و ويو اس بى والباقى خير وبركة
ومحتار علشان:
1- الفلوانس احسن اختيار كقيمة مقابل السعر بس مش لاقى رد قاطع عن سحبها وثباتها بلاقى ناس بتشكر فى ان السحب بقى احسن والثبات ممتاز فى موديلات 2015 وناس لسه بتشتكى ان التسارع وحش جدا والثبات كويس بس مش ممتاز يعنى ومش عارف موضوع زيت الموتور اللى بيخس ده ايه نظامه
2- السنترا بصراحة عجبانى علشان انا مرتاح جداا مع اتوتو ايجيب كوكيل ونفسى اكمل فحاجة نيسان تانى بس لسه العربية جديدة ومجهولة ومعرفش عنها اى حاجة كتسارع او ثبات او اداء وشكل الكاسيت ومفاتيح التكييف وحش اوى اوى وحاسس ان خاماتها مش اد كده
3- الشارك 2015 الكلام عنها كويس جدا جدا وانا ممكن بالميزانية دى اجيب اعلى فئة بس الناس كلها بتتكلم عن العزل السيئ جداا وميزة ان سحبها ممتاز ده بعد ما العربية تبقى على سرعة 80 مثلا لكن طلعتها برضه بطيئة وفيه ناس بتشتكى من التوكيل انه سيئ جدا وناس بتشكر والله واعلم
اسف لو طولت عليكما بس علشان ابقى قلت كل التفاصيل واتمنى الاقى نصيحة من اهل الخبرة والأمانة فى النصيحة ارجوكم بجد محتاااااااااااااااااااارر رر
