عاوزين كل واحد من الاخوه الافاضل يحكي عن اصعب موقف العربيه بتاعه عملته معاه و هو سايق و اتصرف ازاي
عرض للطباعة
عاوزين كل واحد من الاخوه الافاضل يحكي عن اصعب موقف العربيه بتاعه عملته معاه و هو سايق و اتصرف ازاي
انا عن نفسي حصلي موقف قمه في الغرابه انا مش عارف حصل ازاي الموقف دا بس ححكيه لكم
ايام ما كان معايا ال 125 كنت راجع من القاهره مره الكلام دا كان سنه 2000 و انا ساكن في المحله الكبري
فكنت راجع بالليل جيت اهدي عن كطب لقيت الفرامل بتاع العربيه بتهرب نزلت ابص لقيت ان خرطو زيت الباكم اللي ورا بيسقط فطبعا الفرامل بتضعف لحد ما يبقي مفيش فرامل خالص المهم قولت اكمل و خصوصا ان الريق بالليل فاضي ما عليهوش ضغط المهم قدام شويه كنت بدوس بنزين لقيت ان دواسه البزين مش بتدوس نزلت ابص لقيت ان التيش بتاع الاكسراتير اتكسر!!!! حاولت اعلي صوت العربيه و مشي بيها و خلاص ما نفعش ربنا هداني و كان معايا حبل في الشنطه قمت جبته و ربطه في التيش المكسور و طلعته من الكبوت و مسكته بايدي (يعني البنزين بقي في ايدي الشمال مش رجلي و خلاص قولت اهي كلها 20 كيلو و اوصل) المهم علي مدخل المحله جاي بدوس دبرياج لقيت سلك الدبرياج اتقطع!!!!!:):):)
بطلت العربيه و عشقتها و دورت من علي التاني لحد ما صلت عند البيت و انا التلات دواسات مش شغالين خالص و تاني يوم بعت جبت الميكانيكي عملها تحت البيت كنت خلاص مش قادر اركبها في الحاله دي
بس الحمد لله ربنا ستر
القصه دي لو تتحط في فيلم لـ "جيم كاري" وللا لـ"أسماعيل ياسين" تكسر الدنيا أنت حقك تديها لكاتب كوميدي يعمللها سيناريو ويديها لـ"أحمد أدم" أو "أحمد حلمي" أو... كومديان هايفرقع بيها جامد جدااقتباس:
المشاركة الأصلية كتبت بواسطة hazem_khidr
فعلا يا حازم أنا موت من الضحك على الموقف ده
وأحلى حاجه عجبتني في الموضوع حتُسن تصرفك وحكاية الحبل فعلا تصرف ذكي منك
متشكرين يا مستر بايو بس علي فكره انا عندي حكايات كتييير و نقيت احلي حاجه يا ريت انت بقي تقولنا اي موقف و وواضح سوري في اللفظ انك عفريت سواقه يا ريت تحكيلنا حاجه
أنا حكاياتي مأساويه ونهايتها دائما بتكون في المستشفى مع تركيب بعض المسامير والشرائحاقتباس:
المشاركة الأصلية كتبت بواسطة hazem_khidr
ده غير السيارات المحطمه على مدار السنوات السابقه .... فبلاش أنا عشان حكايتي متنكدش عليكم
ايه يا جماعه محدش عنده اي موقف صعب قابله و هو ماشي خالص مفيش حد عنده اي قصه يحكيها كده
خلاص كلنا بقينا راكبين شبح و ما بتعطلش ولا بتعمل حركه نص كم مع الواحد:)
عموما خدو موقف تاني كمان يمكن حد يتشجع
كنت مره راجع من فرح بالليل و ماشي علي الطريق (طنطا المحله) المهم كان معايا بن خالي جانبي و اخويا و ابن خالي التاني ورا المهم كنت ماشي عادي يعني 80 او 90 كده مش مزود المهم لقيتلك موتوسيكل ماشي علي اليمين و عمال يتمرجح قولت يمكن يكون شباب بيستظرف ولا حاجه و كان المسافه حوالي 20 متر او كده و فجأه لقيتلكم الموتوسيكل باللي عليه وقع امام العربيه عندي ببص ععلي الارض في لحظه كده لقيت الارض عليها زيت!! و كل اللي بحكيه دا حصل في تلات ثواني او حاجه روحت واخد اقص الشمال و نزلت بنص العربيه علي الجزيره و حاولت اطلع في الطريق المقابل ما عرفتش كان فيه سور اسمنت المهم فضلت مكمل زي ما انا و كل خوفي ان حد يتفرم تحت العربيه لقيت الموتوسيكل جاي في وش العربيه من الشمل روحت جاي خابط الموتوسيكل و نقلت من رابع لتالت من غير ما اضرب فرمله و خبط في الموتوسيكل تاني و نقلت من من تالت لتاني و خبط في الموتسيكل برضه لحد ما اطمنت و بدات اخد يميني براحه و استعملت الفرامل و وقفت العربيه علي بعد حوالي 100 متر من الحادثه و نزلت اطمنت علي الناس لقيتهم الحمد لله كويسين محدش حصل له حاجه و احنا واقفين جات عربيه نص نقل شافت ناس كتير واقفه جه يهدي بالفرامل علي الزيت دخل في الحائط الاسمنتي و بعديها مفيش دقيقتين جات موتوسيكل تاني و اتقلب باللي عليه برضه بسبب الزيت دا كله في خمس دقايق.بلنسبه للعرربيع عندي بقي الخبطه جات في الاكصدام و و ش العربيه ما حطلوش حاجه الخبطه كلها سمعت في الرفرف و لقيته متني علي بره(الخبطه جات في الاكصادم و الاكصدام نقلها في عضم العربيه و ظهرت الاثار علي الرفرف)
ها لسه محدش عاوز يحكي؟؟؟:)
مفيش مشكله يا باشا احكي برضه علشان الناس تاخد عظه منك و اديك بتنصحهماقتباس:
أنا حكاياتي مأساويه ونهايتها دائما بتكون في المستشفى مع تركيب بعض المسامير والشرائح
ده غير السيارات المحطمه على مدار السنوات السابقه .... فبلاش أنا عشان حكايتي متنكدش عليكم
اظرف وارخم موقف كان الشتا الى فات ده, كنت مسافر اسكندرية مع مراتى وحماتى واخت مراتى, المهم اول ما دخلت مدخل اسكندرية الفردة الشمال اتخرمت ومشيت عليها ومخدتش بالىو المهم الفردة كانت تيوبليس وطبعا باظت, بعد ما وصلنا الاوتيل رايح اركن العربية لقيت الموتور بيرتعش اوى, فتحت الكبود وقعدت احاول ملقيتش حاجة كله موظبوط, وفضلت ادور على ميكانيكى لحد ما ربنا هدانى لواحد وفى الاخر اتضح ان فايظ الهواء كان مفكوك وانا مخدتش بالى منه, المهم بعد كدة خدتهم وكنا رايحين نزور ناس فى محرم بك وتهت وكانت ليللة وبعدين دخلت بنزينة امون وبعد ما مونت جيت ادور لقيت العربية مش بتدور , خير يا عم البطارية ضربت وروح يا عبدالله دور على كهربائى واشترى بطارية جديدة واستنى لما تشحن وركبها وفى الاخر روح زور الناس وانت ايدك مليانة شحم وسواد والايد التانية فيها ورد وعجبى...
انا شايف ان كل الاحداث دي ممكن تحصل بس مش كده ممكن اقول وسعت شويه ( انا اسف )
انا حصل معايا قبل كده موقف كنت جاي من الفيوم والسير اتقتع ومعيش غيره كان معايا حبل غسيل ربطه مكان السير باحكام ووصلت القاهره بخير الحمد لله بس كنت ماشى بهدوء الموضوع ده بجد
في كمان موقف كنت انا واصدقائى مسافرين اسكندريه وهما معاهم عربيه بيجو 405 في حديده خبتط في التنك شرخته رحت جايب صابونه وسديد بيها الشرخ الي في التنك ووصلنا اسكندريه ومفيش نقطة بنزين نزلت من التنك الحد لله ( كان معانه صابون لان كنا رايحين نصيف )
ردك ده هايخليني ماهوبش ناحية الموضوع ده تاني ... لما أنت حاسس إن المواقف دي مبالغ فيها شويه (من وجهة نظرك) أومال لما أحكي إللي عندي بقى هاتقوللي أيه ؟؟؟؟ أستغطى يا "بايوو" قبل ماتنام ؟ وللا هاتقوللي بطل تتفرج على أفلام بلاستيك تاني ؟اقتباس:
المشاركة الأصلية كتبت بواسطة samirpop2
لا يعم أنا مش هاحكي حاجه
والله علي حسب الموضوع قول وانا اشوف ان كنت تنام ولا لا
وانا قصدى علي موضوع الفرامل والدبرياج والبنزين
احكى يا عم بايو متخافش مصدقينك طبعا فى اى حاجة تقولها (مش كده يا ولاد :wink: )
استاذ بايوو ليه انت باين دلوقتي اون لين وانا اوف لين
لو عاوز تبقى ظاهر أنك موجود بالمنتدى أدخل على الملف الشخصي بتاعك هتلاقي اختياراقتباس:
المشاركة الأصلية كتبت بواسطة samirpop2
اخف حالة وجودك في المنــتدى: نعم لا
أختر (لا)
كده تمام الف شكر
انا كنت على الدائرى بين المهندسين و مصر الجديدة الساعة 3 بعد نص الليل ولاقيت الكاوتش فرقع ركنت على جنب نزلت جاى بركب الكورييك لاقيته بايظ ! (اول مرة كنت اجربه) المهم قولت مش مشكلة اشوف اى عربية معدية بعد حوالى اكتر من 20-30 دقيقة كده واحد وقف واخدت منه الكوريك طلعت الاستبن لاقيته نايم ! رجعت الكورييك للراجل و كلمت واحد صاحبى وصحيته من النوم وجالى ركبت الاستبن بتاعه بالكورييك بتاعه
و الله الاستاذ اللي مش مصدق براحته تصدق تصدق ما تصدقش ما تصدقش دا حاجه ما تهمنيش اوي و بعدين سيادتك بقالك كام سنه بتسوق و ركبت كام عربيه في حياتك و خبرتك عباره عن ايه بالضبط؟؟يا ريت ترد علي الاسئله و بعد ازنك يا ترد رد مناسب يا ماتردش انما غلط دا مش كويساقتباس:
وانا قصدى علي موضوع الفرامل والدبرياج والبنزين
الاستاذ سمير خلانى فعلا قلقان احكى --ههههههههههه --لان انا نفسى مش مصدق لغاية دلوقتى ---خاصا ان الموضوعين اللى عندى حوادث سيارات وانتهت بوجود طائرات --اة والله طائرات هليوكوبتر--يالا سلام اللى عايز يعرف --يستنى لغاية ما انزلة فى يوليو --افضل من التريقة--ههههه---- وفى سؤال للاستاذ حازم الموقف التانى بتاع الزيت اللى حصل معاك كان برضة بالسيارة 125 --
ايوه ب 125 هو في اكصدام تاني ولا عظم عربيه يستحمل ان موتوسيكل يتخبط فيها و مايجرالوش حاجه؟؟:)اقتباس:
سمير خلانى فعلا قلقان احكى --ههههههههههه --لان انا نفسى مش مصدق لغاية دلوقتى ---خاصا ان الموضوعين اللى عندى حوادث سيارات وانتهت بوجود طائرات --اة والله طائرات هليوكوبتر--يالا سلام اللى عايز يعرف --يستنى لغاية ما انزلة فى يوليو --افضل من التريقة--ههههه---- وفى سؤال للاستاذ حازم الموقف التانى بتاع الزيت اللى حصل معاك كان برضة بالسيارة 125
و انا مستنيك تحكي يا باشا و انا اول واحد حصدقك بس يالا خلينا نقرا و ورينا:):)
انا الحمد لله مقابلتنيش مواقف جامدة زى دى خالص
بس من اصعب المواقف على الاطلاق, كنت سايق على الاوتوستراد اتجاه حلوان, و بعدين قبل مدخل المعصرة بشوية الطريق حوالى 5 حارات, و فى حاجة زى موقف ميكروباصات على الناحيتين, فكان فى تلاميذ اخرهم 10-11 سنة عاوزين يعدوا
انا واخد اقصى الشمال و هما فى الرصيف اللى فى النص عند U-turn صغيرة.
كانوا تقريبا بيراهنوا بعض, ان مين منهم يقرد يقف امام السيارات فى نص الحارة الشمال
انا سايق تقريبا 120, و لاحظت من بعيد انهم بيلعبوا اللعبة دى, شلت رجلى من على دواسة البنزين, و بدأت ادى نور و كلاكس
2 من ال 3 عدوا, و التالت تقريبا اللى كان المفروض يكسب الرهان
كل ده و انا عندى امل انه يعدى, فلم المس الفرامل.
من حظى الهباب الاقى عربية طلعتلى على يمينى, يعنى الواد صعب اوى يقف فى النص بينا, تبقى كده كملت :evil:
طبعا بدأت ساعتها فى اقل من ثانية الفرامل و اسقط نقلة, و رحت دخلت بالعربية حاجة بسيطة فى حتة ال U-turn بحيث سمح لهذا الطفب الشرير انه يقف بين عربيتين
ركنت على جنب بعدها, و ربنا وحده يعلم كان ضربات قلبى وصلت كام ساعتها. اولا طفل فى ربيع عمره بسبب افكار طائشة و اسمحوا لى قلة تربية بيلعبوا مع عربيات اقل سرعة فى المنطقة دى 100كم/ساعة, و ثانيا طبعا مستقبلى
ردك السريع على هو اللى خلانى احكى--شوف يا سيدى--انا كنت راكب ميتسوبيشى لانسر استيشن موديل 97--وكنت على الطريق السريع والحد الاقصى للسرعة 100 ك- المهم انا ملتزم --وماشى فى امان اللة وفجأة لقيت سيارة فى لحظة اصبحت امامى واللى انا واثق منة انة كان بيفرقنى عنها نصف متر تقريبا--طبعا جنون --قبل ما افكر ادوس فرامل لازم طبعا لازم انظر الاول فى المرايا علشان اشوف فى حاجة كمان ولا اية وفعلا نظرت ما لقيتش حاجة وبنظر امامى مرة اخرى لقيت السيارة اللى كانت امامى اصبحوا سيارتين وراحوا داخلين على بعض وخبطوا بعض --عقبال ما فكرت افرمل كانت سيارة منهم بقت بعرض الطريق --وبعدين انا شايف نفسى انى داخل فيهم والفرملة مش كفاية لان كأن حاجة بتوجهنى ليهم --طبعا وبأختصار دة اللى انا شفتة وفاكرة--عرفت بعدها انة وقع حادث قوى مابين 8 سيارات وانا كان ترتيبى الثالث --يعنى فى 5 سيارات دخلت فى عربيتى --فى خلال دقائق طبعا كانت الشرطة موجودة والاسعاف ثم المطافى لانهم كان لازم يقصوا سقف السيارة علشان يطلعونى انا --ونفس الشىء مع سيارة اخرى--وثم حضرت هليو كوبتر الاسعاف --وتوجهت بنا الى المستشفى --وفضلت فيها حوالى شهر ونصف ---اما باقى السيارات واصحابها فكانت النتيجة وفاة اثنين--واللى عاشوا اتكسر عضمهم تمام--وقدر الله وما شاء فعل --اما السبب والمفاجأة --ان الاثنين اللى توفوا وواحد من المصابين اصدقاء- وكانوا اصلا سهرانين مع بعض وكان بينهم تحدى على الطريق---- وال 3 كانو سكرانين---بس خلاص حسب ردود الفعل بعد الحكاية دية --ح اشوف احكى التانية ولا بلاش-
أنا بقى ليا حكايات وحكايات مع المواقف الغريبة .
لكن الأغرب إن الواحد لما كان بيطحن في عربية الوالد ما كنش بيحصل حاجة ولما اشترى العربية بفلوسه بعد الجواز ، شاف بيها العجب العجاب .
اسمعوا يا اسيادنا ..
أول موقف غريب واجهته مع العربيات ما كانش بتاعي لكنه موقف بيحصل مرة في المليون ، كنت في الجيش ، ولي صديق عزيز كان بييجي كل عشر أيام ياخد تصريح وينزل ، كان بييجي بعربيته ويركنها بره قيادة الجيش في الاسماعيلية ، المهم ما طولش عليكم ، الكلام ده كان سنة 97 ، وهو ركن العربية أمام مستشفى الاسماعيلية العام اللي أمام بوابة القيادة مباشرة ، المهم دي منطقة زحمة جداً قوم إيه .. ركن عربيته صف خامس ولا سادس ، ودخل ، والتصريح اتأخر جداً عشان كان قائد الجيش في اصطفاف ، وسكرتيره اللي بيمضيلنا على الأجازة معاه ، قوم إيه .. رجع ومضى لنا الساعة 2 الصبح ، قوم غيه خرجنا نركب العربية ونلاقي حواليها كردون أمني وخبراء مفرقعات ومكافحة إرهاب وأمن مركزي وشرطة عسكرية ، وخابرات حربية ، كلهم حوالين العربية ، حاجة كدة رعب ، أتاري العربية بقت واقفةو في نص الشارع من الساعة 6 مساء ، المهم قضينا الليلة في قسم الاسماعيلية علشان طبعاً كان المحضر اتسجل أحوال ، لحد ما وكيل النيابة جه الصبح ، وأفرج عن العربية ، لكن ما اقولوكوش المنظر كان مرعب قد إيه . تمت أول واحدة
لا احكي و انا مصدقك احكي بليز ما تسكوتش
التانية بقى اسمع يا سيدي .
مغامراتي مع فصول 127 المعفنة ( أقصد عربيتي السابقة حتى لا أثير حساسيات )
القصة الأولى : أول مشوار طوالي مع العربية . ما كنتش متعود قوي إني أعمل حساب عطل العربية لأني تقريباً ما وقفتش قبل كدة ، حاجة غريبة ، المهم كنت عند بابا بترننج سوت ، وجه أخويا ، وقرر يروح قلت له تروح ازاي بالليل وانا معايا العربية ، نزلت أخدت المدام والأولاد ، وهو ومراته وابنه ، وقررت ببساطة توصيله ، وأنا بدون محفظة ولا بطاقة ولا فلوس ، الكاوتش فرقع ، والكوريك بايظ ، والاستبن فاضي ، ولولا ستر ربنا كان فيه بتاع كاوتش على بعد 300 متر ، رحت وبكل شجاعة قلت له يلحم الخرم ،قاللي يا بيه الكاوتش ده مش تيوبلس ده شنبر ، قلت له طيب ، طلع الشنبر قاللي ده فيه 27 لحام ، والحل لازم شنبر جديد ، قلت وماله ركب يا معلم ، قاللي عندي كذانوع قلت له حط أحسن حاجة ، تمنها كام 25 جنيه ومصنعية 5 جنيه قلت له بس كده عيوني ، المهم الراجل ركب وظبط ، جيت أدور على فلوس معايا مفيش ، مع المدام مفيش ، لقيت نفسي في قمة الكسفة ، واضطر أخويا يدفع الفلوس وأنا في نص هدومي . عادية مش كدة .
الجاية أتقل بكتير
ههههههههههههه.بجد موقف يموت من الضحك يا باشا العربيه ال125 لما كنت بطلع مشوار سفر صغير كنت بقرا سوره ياسين قبل ما اطلع علشان ما تعطلش
التالتة ( مجمعة عشان الوقت والمساحة والحبايب )
يقول الراوي يا سادة
أن أحمد سمير الهمام كان يسوق عربيته 127 المأسوف عليها في أول أسابيعها معه ، وقرر طبعاً يحمل الأسرة إلى زيارة لأهل المدام ، وفجأة وأنا في منتصف شارع جامعة الدول العربية قبل ميدان مصطفى محمود ، أدوس على الدبرياج هوب لقيت الدواسة لبست بل لزقت في دواسة العربية ، مفيش دبرياج ، حمدت ربنا إني كنت عالتاني ، لكني لم أجد مكاناً على مرمى البصر أركن فيه ، ولقيت الإشارة قافلة وانا بقرب عليها ، وادعي ربنا يسترها والإشارة تفتح قبل ما العربية تفصل وسط الزحمة ، ونضطر نزق ونرمي وخلافه ، ربنا ستر لحد ما ركنت العربية في آخر الشارع تحت الكوبري .. واتحلت المشكلة .
أول مشوار للشغل :
أجازة نصف العام انتهت ، وقررت لأول مرة أذهب لشغلي بالسيارة ، أنا أعمل في إعلام الأزهر وهي في مقر الجامعة القديم بالدراسة وأنا أسكن في مدينة نصر ، كان المطر خفيف ، والأرض مزحلقة، وما كانش عندي فكرة عن ثبات العربية 127 ولا فراملها العادة .. الحكاية 10 أيام بس تجارب ، مشيت في صلاح سالم ، وأخذتني الجلالة واسترجعت ايام الماضي وفتحت بالعربية 100 110 يعني ، الحمد لله العربية جابت معايا وكنت فرحان بأداء الموتور ، دخلت نفق البعوث ، وطلعت على سرعتي ، وفجأة تاكسي شاهين نازل من كوبري الفردوس قرر فجأة يعبر صلاح سالم بالعرض ليدخل شارع المرور ، واخدني معه وأنا أحاول تفاديه وأنا باحدف يمين وباحاول اهدي ، مع أول مسكة فرامل جاامدة لتجنب الاصطدام ، العربية اتزحلقت وحدفت يمين ولقيت نفسي لابس في إكذدام هوندا سيتي عالزيرو ، نزلت لقيت صدر العربية بالرفرف اليمين والفوانيس وخلافة ، والكبوت طبعاً عجينة .. تخيل العربية شهر بتتظبط من سمكري لميكانيكي لكهربائي لخلافة بعد ما شتريتها بعشر أيام .. شوفوا الحسرة والندامة .
يتبع
فى رحلة شهر العسل و كنا بال 128 ونازل من الساحل الشمالى لآسكندرية قال نتغدى عند قدوره يادوب عند الحمام وهوب دخان جوه العربيه طبعا العروسه اتخضت قلت عادى عادى ده الفيوز معايا غيره رطبت غيره برضه ولع و عمل دخان الكلاكس فصل و مش عارف ايه تانى فصل قلت عادى وصلن اسكندريه قضينا وقتنا سألت عن كهربائى قالو خلف سينما مترو صحابنا قعد ساعه و نصف اصل انتم عارفين ان ال 128 تكنولوجيا معقده جدا قلت باقولك ايه سيبها راح ارجع بيها مصر كده مش مشكله فى الاخر تطلع ماكينة الفرامل باظت وعملت قفله اتغيرت فى دقيقه بعد الساعه و نصف طبعا و اتحلت المشكله
برضه نفس ال 128 كنت رايح اشوف عروسه وميعادى عند نادى الزهور الساعه 8 خرجت من المعادى 7:30 يادوب خرجت من الجراج سلك الدبرياج اتقطع جرى على الميكانيكى طبعا قال فين الصاموله قلت صامولة ايه ياعم هيا ناقصه قال ارجع مكان ما انقطع راح تلاقيها رجعت جرى لاقيتها و ركب السلك و الحمد لله السياره عوضت تأخير الوقت بالجرى فى الطريق المهم وصلت فى الميعاد لكن العروسه هيا اللى صرفت نظر عنى بصراحه
معلش يا باشا هيا دي الحكاوي ولا بلاش كمل و انا نازل مشوار و جاي بالليل تاني
الحكاية التانية بقة --كنت برضة على الطريق السريع -- وكنت فى طريقى لاجتياز نفق--والطريق حارتين فقط والاتنين رايح يعنى ما فيش حاجة جاية --اللى جاى طريقة لوحدة ويفصلنا حيطة خرسانية --المهم انا كنت ماشى فى الحارة اليمين وسبحان الله اللى اللهمنىانى انقل على الحارة اليسار الخاصة بالسرعة الاعلى --وقبل ما اوصل للنفق بحوالى 20 او 25 متر فوجئت بسيارة مقلوبة على ظهرها وبتلف ---انا الوحيد اللى كنت ماشى قى الحارة الشمال --طبعا فى الحال بصيت فى المرايا واعطيت اشارة الانتظاروانا ببص كنت بفرملووقفت العربية قبل السيارة المقلوبة بكام متر -- وسمعتلك شوية خبطات --اول سيارة على اليمين يعنى الموازية لية فرمات خاصا ان الجزء الاكبر من السيارة المقلوبة كانت ناحيتة --هى فرملت من هنا وراح داخل فيها ثلاث سيلرات ----روحت انا نازل من العربية وجريت فى اتجاة العربية المقلوبة --وفعلا كنت اول واحد يوصل لها وكل الناس نزلوا بس ما فيش حد راح على السيارة المقلوبة ---المهم روحت عند العربية لقيت سيدة شابة كدة بتحاول تطلع راسها ودماغها من العربية ---مديت لها ايدى --ما عرفتش اطلعها لان لقيت ان فتحة الزجاج بتاع الباب بتاعها بقيت ضيقة جدا --ولقيت نفسى بجرى على عربيتى --وروحت واقف على السقف وفضلت اصرخ--ساعدونى --ساعدونى --الحقوا بسرعة فى اطفال فى السيارة ---اقسم بالله ما اعرف اية اللى خلانى اقول كدة --لكن فعلا ناس كتير جريوا على العربية وكانت المفاجأة --ان بعد ما طلعنا السيدة صرخت فى وجهنا وقالت الحقوا ابنتى الصغير فى الكرسى الخلفى ---وفعلا ساعدناها وستر ربنا ان الشباك من ناحيتها كان اكبر شوية ---- طبعا عقبال ما خرجنا البنت كان البوليس فوق دماغنا--وقامت الطائرة بنقل الام --والاسعاف العادية بنقل البنت --طبعا كل الناس شكرتنى والبوليس كمان لان كان ممنوع حد يمشى لغاية ما يخلص تحقيق مع كل اللى شاف اللى حصل --وطبعا اتاخرت على الميعاد اللى خلانى بدل ما اسوق فى الحارة اليمين --لا انقل على اليسار--ويسترها ربنا معايا --لا وخدت كمية شكرا --فرحان بيها لغاية دلوقتى --بس خلاص
الرابعة : حكاياتي مع الفرامل .
كلاكيت أول مرة : رايح جامعة 6 أكتوبر بادرس هناك يومين في الأسبوع ، نازل من منزل المحور من كوبري الصحراوي ، بادوس فرامل مفيش فرامل ، هه هه .. مفيش .. اي حاجة .. ابداً .. عشان خاطري .. لا يمكن . دعيت ربنا يسترها ، كان المحور ساعتها لسه ما اتوسعش ، والمنطقة خطيرة جداً ، والزحمة فظيعة الصبح الساعة 8 ، ربنا ستر لحد ما دخلت الجامعة ، انقل عالتالت للتاني للأول لحد ما ركنت ، خرجت صلحت الفرامل عند الميكانيكي ، وهوب عند جامعة مصر بادوس فرامل مفيش تاني ، كملت المحور لحد ما نزلت ميدان لبنان ، ركنتها عند بيت المدام ، بعد ما أعصابي اتفرتكت وطلع ماستر الفرامل باظ . تمت .
كلاكيت تاني مرة : فضيحة فوق كوبري أكتوبر :
حماتي كانت عندنا ، وكنت باغير للعربية قنطرة خلفية ( كان فيها 172 لحام وما حدش يكدبني ) وجوز مساعدين خلفيين ، المهم استلمت العربية يومها ، وفي تمام الساعة الواحدة مساء أخو المدام تعب شوية كلمونا حماتي قالت لازم اروح له ، والمدام كمان ، ركبت العربيةوأنا مطمئن تماماً ، كله جديد والمسألة تمام .. وفوق كوبري أكتوبر الساعة 2 صباحاً وكان يوم خميس .. لاحظت فيه زحمة رهيبة ، بادوس فرامل ما فيش نهائي ، مسكت فرامل اليد قبل ما خبط ، اديت انتظار وركنت على جنب ، بصيت لقيت زيت الفرامل نزل تماماً من عند العجلة الخلفية ، أتاري البيه قطعه وهو بيركب المساعدين ، أعمل إيه الكوبري زحمة .. كلمت الميكانيكي يجيبلي خرطوم وعلبتين زيت ، ويجيلي ، رفض الباشا قاللي احنا الساعة 3 الفجر .. داديها وحايلها يا دكتور .
ما باليد حيلة . مشيت عالهاند بريك ، نزلت منزل شبرا الصعب عساني أجد ميكانيكي فاتح ، رحت لبنزينة اتعاطفوا معايا بعتوا لميكانيكي حشاش صحوه من النوم ، جه قاللي هاقفل الخرطوم المقطوع ، ونزود زيت والعربية هاتمسك تلات عجلات بس قلت أحسن من مافيش خلص شغله ، ولهف تلاتين جنيه ، صحيح ما المدام والأولاد وحماتي واقفين في الشارع . الخلاصة وصلت حماتي وانا راجع شميت ريحة شياط رهيبة كأن العربية بتولع ، فوق كوبري اكتوبر برضه ، حاولت اعرف السبب معرفتش لكنه كان مؤكد انه بسبب الربطة اللي ربطها الميكانيكي إياه .. وقفت بتاع تلت ساعة ، والولاد نايمين ، دعيت ربنا ، ومشيت بالعربية وصلتني لحد تحت البيت ، وقبل ما اركن فصلت كهربا ، بتوع الأمن ساعدوني في الركنة . وعدت الحكاية .
التالية .. في انتظار الفظيعة .. الحلقة الأخيرة
الفظيعة ..
هذه بقى ماساة وليست موقف .. كنت أسير على الطريق الدائري بعد كوبري السويس ، الطريق ده لمن يعرفه حارتين ضيقين جداً ، كنت خلاص ظبطت العربية تماماً ، غيرت فيها كل حاجة تقريباً ، عفشة وكبالن وكاوتش وكهرباء وسرفيس وفرامل وقنطرة وكله كله ، ما كنش ناقص غير طقم الجرايد البراني علشان تبقى عروسة فعلاً .
ماشي في أقصى اليمين ، جنبي تريلا كبيرة عبارة عن فنطاس بنزين موبيل ، وفجأة قررت سيارة نقل صغيرة ايوزو أن تعبر ما بيننا ، استهيفت طبعاً ال 127 فجأة الطريق لف يمين حدف عليه بتاع النقل ، وأنا باجي شمال لحد ما تقريباً كنت هاخش في الرمل واتقلب ، كلاكسات مفيش ، أنوار مفيش ، هو صمم وخد القرار ، حاولت اهدي .. هديت فعلاً ، لطشني البيه من اليمين ، الدريكسيون رف في ايدي طبعاً مسكته بكل قوة ، العربية انحرفت يمين ، ولقيت نفسي أوشك أن أعبر الكوبري إلى الآخرة ، سلمت أمري لله ، واستسلمت لقدري ، فقد كانت العربية في طريقها المباشر للاصطدام بتانك السولار بتاع التريللا اللي هي فنطاس بنزين ، ستر ربنا في فانية اللي هي أقل جزء في الثانية لقيت نفسي نازل تحت النقل قبل الكاوتش الدوبل الوراني اللي فرتك بمعنى الكلمة وش العربية العربية طبعاً وقفت وهي بتتسحل ، وانا في انتظار اللي هايهبدني من ورا علشان كنت عرضت في الطريق ، ربنا ستر ، نزلت ، العربيتين النقل الاتنين مشيوا ولا كأني دبانة ( ذبابة باللغة العربية ) لقيت ورايا عربية شرطة ، نزل منها عقيد عرفني بنفسه بأنه قائد الطريق الدائري في هذه المنطقة ، قاللي انت كويس ، قلت وأنا لم أفق من هول الصدمة الحمد لله .. قاللي سكتك فين ، قلت له راجع البيت في مدينة نصر ، قاللي نص ساعة ابعت لك الونش بتاعنا يقطرك ، وما كلفش خاطره يتكلم في اللاسلكي يوقفوا حد من العربيتين ، انتظرت ، وما حدش جه ، قطرت العربية لحد البيت ، بعد ما كسرتها بإيدي بالشاكوش ومفتاح العجل ، الموتور اتكسر نصفين ، وكذلك الرادياتير والحوض بقى عجينة ، والكبوت اترمى على قدام ، المهم العربية بقت خردة ،بعتها بعد شهر للسمكري بتاعي بأقل من نصف تمنها .
ولا عزاء لأصحاب 127 .
من وقتها وقد قررت أن أعود لسيارات محترمة ، وألا أشتري أي سيارة من هذه النوعية ، ولازلت حتى الآن أنتظر وأفكر وأحسب ، وأنتظر وأنتظر وأنتظر ، ولكن هذه حكاية أخرى .
تحياتي
وربنا يكفينا جميعاً شر الحوادث
حكيتلي انت الموقف ده واحنا قاعدين في الربوة في تاني لقاءاقتباس:
المشاركة الأصلية كتبت بواسطة د.أحمد سمير
حسبي الله ونعم الوكيل في سواقين النقل واللي بنشوفوة منهم
قررت الخروج عن صمتي وساحكي لكم
بايجاز شديد من افظع لحظات الرعب اللي عشتها انفجار كاوتش خلفي في ال 128 وكان فيها 4 افراد صباح عيد الاضحي المبارك وكان فوق اعلي منطقة معلقة في الكوبري علي ارتفاع 55 متر
وقولكمش حاولت اسيطر علي العربية ازاي لحد ما وقفت وكاد قلبي يوقف معاها
غير ان اللي كانو معاي كلهم جالهم اغماء وقعدت بعدها بكتير افوق فيهم ودي احد اهم اسباب كرهي لل 128 وهيا اسباب كتير مالهاش مجال هنا
وتاني موقف حصل نتيجة السرعة كنت متجه للاسكندرية عن طريق الزراعي وانا بكرة الزراعي بشدة بس كنت رايح المعمورة
المهم كان معايا عربيتي الاكسيل وفيها حوالي 6 افراد غيري وطفلين وشنطة العربية مليانة علي الاخر وفوق السقف 3 شنط حجم كبير لاني كنت لازم اسافر بكل دول عشان كان فيه ظروف تمنعهم من السفر وحدهم
المهم وانا ماشي علي 120 تقريبا بكل الحمولة السابق ذكرها وامامي اتوبيس سوبر جيت انحرف مرة واحدة وانا كنت خلفة لان الطريق كان زحمه شوية لقيتة انحرف يفادي كلب علي الطريق
تخيلو كلب فى وش العربية بينك وبينة اقل من 20 متر وانت بالسرعة دي-لو دخلت فيه هافرتكة وافرتك وش العربية وفي الغالب هاتقلب في الترعة اللي جنبي
انحرفت افادية قعدت العربية تطوح يمين وشمال مالا يقل عن 200 متر وانا مش عارف اتلم عليها من كتر الانحراف المفاجيئ مع الصراخ اللي عمال تسمعة من الحريم اللي معايا وتوتر اعصاب رهيب الي ان هدأت بفضل الله ورحمتة بيننا
وحرمت ادخل الزراعي تاني حتي لو رايح طنطا :lol: :lol:
كريم منير
أعتقد كل مصرى عنده حكاية واحدة على الأقل مع الـ 127 :) .... أنا اول سيارة سقتها كانت برضة 127 ... و الحمدلله الأيام بتاعتها عدت على خير و ربنا سترها و محصلش معايا مشاكل فيها من نوعيات أفلام الآكشن دى ... لكن أفتكر موقفين ليها معايا ...
أول موقف كانت وقتها موتورها مفوت و كمان انا كنت لسة متعلم سواقة جديد ... المهم كنت مرة مهدى عشان حأحود على شارع جانبى و لقيت فى بداية الشارع مطلع انحداره عالى جداً جداً ... رحت جايب الأول و داخل عليه و العربية بدأت تهدى تهدى تهدى لحد ما وقفت و بعدين بدأت ترجع لورا!!! و كان ورايا عربية نص نقل و لما لقانى بدأت أرجع لورا راح واخد بعضه و راجع هو كمان بأقصى سرعة و طلع من الشارع و هرب منى (أنا متخيل انه أكيد كان قاعد يقول "الله يخرب بيوتكو ... اتعلموا السواقة بقى!!") .... المهم فضلت نازل بالعربية لحد بداية المطلع و بعدين حاولت أعمل محاولة تسلق تانية و مفيش فايدة ... فى الآخر رحت سايب الشارع دة و أخدت سكة تانية ... لما غيرت العربية بقيت كل لما أعدى على الشارع دة و الحمدلله آخد المطلع دة بمنتهى السلاسة و أفتكر الموقف دة و أفتكر العربية النص نقل اللى هربت دى و لا أستطيع أن أخفى ابتسامة عريضة و أحمد الله انه أبدلنى خيراً منها
الموقف التانى برضة مع ال 127 كنت اشتريت وقتها عربية فليشيا و ركنت ال127 لفترة و بعدين عرضتها للبيع ... و اكتشفت لما أول زبون جاء يتفرج عليها انى مش عارف أسوقها!!! فراملها كانت ناشفة حجر و كرسيها كان ضيق جداً رغم انى كل الحكاية انى سيبتها و سقت الفليشيا لمدة 3 أو 4 أسابيع فقط!! قلت للراجل ساعتها معلش بصراحة دى عربية المدام و أنا معايا فليشيا و مش بأعرف أسوق الـ 127 ... المهم الراجل ضحك و أعجب بيها جداً رغم انى كنت مقروف منها و مقدرتش أكتم قرفى منها قدامه!! و اشتراها يوميها بـ 14 ألف و الحمد لله
اسخف موقف بقي حصلي في حياتي كنت انا ووالدتي ووالدي في مشوار عزاء في الاسكندرية في العجمي خاصة وكنا رايحين وراجعين في نفس اليوم وكانت التوقيت نوة رأس السنة وهيا من اسوأ النوات اللي بتيجي اسكندرية
المهم واحنا رايحين كان الجو شمس ولطيف قبل اسكندرية ب 20 كيلو غيمت واديتها مطرة عينة اللي المساحة علي السرعة الرابعة مش ملاحقة عليها
المهم رحنا لعزاء واحنا ماشيين الساعة 4 عصرا مشيت من شارع تاني غير اللي دخلتة واتاري الشارع ده في بركة ماء عادية لما دخلتها بالعربية لقيت مستوي المية بقي عند اكرة الباب
وفجأه :roll: :roll: :roll: :roll:
تتتتاه زي افلام الرعب بدات المية تدخل العربية من كل جانب لحد ما غطيت الكاسيت ووصلت لركبتي ووالدتي كانت جنبي ووالد علي الكنبة الخلفية مريح ضهرة
والعربية عمالة تكركر وهاتبطل عشان العادم بقي بيرجع تاني لماسورة الشكمان
انا قولت لو العربية بطلت مني في الحتة دي مفيش حد هايفكر يقطرها ولو حبينا نقطرها هانشوف مكان الربط ازاي ووالدي ووالدتي يخرجوا منها ازاي :idea:
قعدت ادعي ربنا انها ما تبطلش وانا بدوس بنزين علي الاخر لحد ما ال RPM قرب يدخل المنطقة الحمراء
والشكمان بقي بيطلع فقاقيع جامدة في المية من كتر كبس الموتور ووالدتي عمالة تدعي معايا
الحمد لله فضلت ماشية كانها برمائية بتاعة الحرب العالمية التانية لحد ما خرجت من بركة المية وقامت مبطلة تماما
وقفنا علي جنب نزيح مية من جوه العربية وننشف وبعدين نشفت البوجيهات دارت وقررنا نرجع القاهرة فورا
المهم كانت هدومنا نصها التحتاني بتاع رجلينا اتبل من مية المطر اللي دخلت العربية بقينا سقعانين جدا
الكنترول يونيت بتاع العربية دخلتة المية وباظ-يار يت باظ-قعد يخرف-يشغل الازاز الكهرباء بقي يطلع وينزل لوحة كل شوية
نور العربية خرف
المساحات شوية تشتغل وشوية لاء
حتي الكلاكس بقي يعلق لحد مافصلت سلكتة من كتر الازعاج
جينا بقي نشغل التكييف السخن ماشتغلش غير ساقع
والجو برد والمطر شغال وماشي من غير نور
والزجاج الاربعة مفتوحين كلهم مش عايز يقفل ومحجر
بالمنظر ده لحد القاهرة
روحنا القاهرة 11 مساء والحمد لله
جاللي دور برد رهيب قعدت اكتر من شهر مش بنطق كلمة :oops:
والدي قلبت معاه بحساسية صدر :cry:
والدتي جاله دور برد رقدت فيه كتير :shock:
العربية اتصلحت باكتر من 4 الالاف جنية وعطلة مش اقل من اسبوعيت تظبيطات :cry:
كانت سفرية رائعة بكل المقاييس
سلملي علي النوة بس بلاش عـــــــوة :cry:
كريم منير :roll:
أنا حصلي موقف خلاني بعت العربية تاني يوم
كنت أنا ووالدي ووالدتي وأخويا فى زيارة في القاهرة ومروحين الشرقية الساعة 1.30 يالليل
وفجأة وعلى حين غرة انقطع سلك الديرباج
بحكم اني متعود على المواقف دي مع هذه السيارة الملعونة مديت ايدي بقلب جامد تحت الكرسى علشان أطلع سلك الدبرياج الاستبن اللي شايله معايا على طول( حاكم انا كنت متعود اشيل سلك دبرياج وسير وسلوك وفيوزات لزوم دقات النقص) وكانت الطامة الكبرى( اظاهر السلك وقع وانا باغسل العربية) المهم أخدت تاكسي وسألت أمة لا اله الا الله على محل قطع غيار فاتح ولاكن للاسف لم أجد فاضطريت اسفا اني اركب والدي ووالدتي تاكسي لحد الشرقية وبيت أنا وأخويا فى العربية لحد الصبح لغاية ما المحلات فتحت وجبت سلك وركبته فى 5 دقايق وتاني يوم عرضتها للبيع