تقريركامل عن هيونداى جراند i 10 هاتشباك 2015
http://nileup.com/up/uploads/nilemotors_14193715061.jpg
مبدأيا ده اول تقرير ليا فى المنتدى وعلى اد ما اقدر هحاول اغطى معظم تفاصيل العربيه
انا مش مهندس سيارات فاعذرونى لو التفاصيل مش مكتوبه بشكل احترافى او علمى.
اهتمامى ان اكتب تقرير عن العربيه ده لان انا واحد من الناس كنت بدخل كل يوم على المنتدى عشان اشوف اى معلومه عنها قبل ما اجيبها...فحسيت ان التقرير ده ممكن يفرق مع ناس كتير فى قرار الشراء
ركبت عربيات كتيره مرسيدس باسات وفنتازيا والانترا (سيارتى الشخصيه)وبيكانتو وسانديرو القديمه وجيتز واكس باندينو وفيرنا و ماتريكس
لكن فى المقارنات هحاول هقارنها بالبيكانتو والسانديرو(القديمه) والجيتز
اول حاجه هنكلم عليها الشكل
وده من وجهه نظرى موضوع نسبى
شكل العربيه فى السيدان يعتبر معقول ..لكن الهاتشباك اعتقد ان شكلها اكتر من رائع
السيدان كانت نازله قبل الهاتشباك بحوالى شهر ونص
وواضح من التوكيل ان الحجز على الهاتشباك اكتر من السيدان
تانى حاجه حجم ووسع العربيه
العربيه حجمها من بره هو تقريبا نفس حجم الجيتز
يعنى اكبر من البيكانتو ب 20 سم فى الطول وحاجه بسيطه جدا فى العرض لكن اصغر من السانديرو (القديمه)
العربيه واسعه من جوه بالمقارنه بنفس الفئه دى من العربيات يعنى اوسع من جوه من البكانتو بشكل ملحوظ وتقريبا زى السانديرو من جوه ....العربيه وسعها من جوه يعتبر ممتاز بالنسبه لحجمها
بالنسبه للشنطه فحجمها معقول يعنى اكبر من شنطه البيكانتو لكن اصغر من شنطه السانديرو (القديمه)
تقفيل العربيه
من وجهه نظرى ان تقفيل العربيه هو زى تقفيل اى عربيه هيونداى (باستثناء الفيرنا) يعنى معقول بنسبه كبيره جدا لكن اقل فى المستوى من تقفيل البيكانتو لكن بنسبه مش ملحوظه....يعنى تقفيل العربيه من جوه زى البيكانتو اللى انا شايف ان تقفيلها محترم جدا او اقل بنسب بسيطه..تقفيل العربيتين من الداخل افضل من وجهه نظرى من تقفيل السانديرو(القديمه) من الداخل
الموتور واستهلاك البنزين
موتور العربيه ناعم جدا...انعم من السانديرو والبيكانتو ودى بصراحه من اهم مميزات هيونداى عموما
سحب العربيه حلو جدا .....العربيه موتورها 1248 سى سى بقوه 87 حصان وده بالنسبه لعربيه بالحجم ده ممتاز
استهلاك البنزين خراااافى....تقريبا استهلكت 7 ليتر فى 140 كم يعنى فى ال20 ليتر تعمل تقريبا 400 كم وده يعتبر استهلاك (من وجهه نظرى) تحفه مع الاخذ فى الاعتبار ان كنت ماشى على سرعه 100 يعنى السرعه المثاليه لاستهلاك البنزين
العفشه
محترمه جدا فى نعومتها وبرده زى معظم الهيونداى يعنى من الحاجات اللى بتعحبنى فى هيونداى هو نعومه العفشه لكن مش عارف ده على حساب الثبات ولا ايه.....ارتفاع العربيه فى المطبات كويس جدا.. العربيه لغايه دلوقتى ماحكتش معايا فى اى مطب بما فيها المطبات السخيفه ب 3 افراد فى العربيه
الثبات
لغايه سرعه ال120 كم معقوله.. لكن بعد كده العربيه بتبقى خفيفه يعنى اقل من السانديرو فى الثبات وبصراحه ماجربتش البيكانتو بعد سرعه 100 كم
الكماليات
مفيش لا abs ولا airbag
فرامل العربيه معقوله اللى حد ما لكن مش ممتازه
الباور بتاع العربيه ناعم وخفيف جدا
الكاسيت بتاع العربيه شكله حلو ومتناسق مع التابلوه بتاع العربيه (cd+usb+aux+bluetooth)
لكن منظر بس...يعنى صوته سىء وواطى جدا ممكن يكون ده عشان العربيه مفيها ش غير سماعتين بس فى الابواب الاماميه فقط......دى بصراحه من الحاجات اللى تضايق.....
اضاءه العربيه من الداخل واضاءه التابلوه شيك جدا
اضاءه الكشافات الاماميه للعربيه كويسه جدا
جنوط العربيه 14 وجنوطها عاديه (مش سبور)فى جميع الفئات
سعر العربيه فى الوكيل 99400 ودى الفئه الاوتوماتيك الاولى وفيها اتنين زجاج كهربا وسنترو طاره ملتى فانكشن وطبعا اوتوماتيك
فى فئه واحده بعدها تقريبا ب103500 ودى فيها زياده عن الفئه الاولى اربع زجاج كهرباء وفوج لايت و ريموت سنترو مرايات كهربا واشارات بالمرايات
الاسعار اللى انا كاتبها دى اسعار وكيل وفى المعارض ممكن تلاقى بنفس السعر او اعلى
الفئه الاولى اوتوماتيك دى متاحه فى الوقت الحالى اما الفئه التانيه غير متاحه لغايه مانا اشتريت وبالحجز
كل كلامى بالنسبه للاسعار يخص الهاتشباك ومعرفش هيفرق كتير عن السيدان ولا لأ
الفئه التانيه فى الاوتوماتيك اعتقد انها متاحه فى السيدان
انا استلمت من توكيل ابو رواش ومندوب البيع اللى كان متابع معايا اسمه اسلام اشرف وبصرحه راجل محترم وذوق جدا
التقرير اللى انا كاتبه ده بناء على تقييمى الشخصى بعد ما ركبت العربيه ومشيت بيها حوالى 750 كم يعنى العربيه المفروض انها لسه فى التليين
اسف على الاطاله .......ولو فى اى حاجه انا نسيتها هارد عليها فى الكومنتات