الموضوع: تقرير مبدئي عن استلام وقيادة لوجان 2015

استلم أمس ابن عمي لوجان 2015 هاي لاين وكنت معاه في الإستلام من الطارق فرع مول العرب وحبيت انقل انطباعي

اولا الإيجابيات :
========

1 السيارة شيك من الداخل وتقفيلها مقبول جدا مقارنة بالفئة السعرية كاللانوس والفيرنا.

2 شيك من الخارج وأعني من الامام وشكلها هجومي إلى حد ما.

3 فيها شوية إمكانيات هامة مثل abs. ebd. air bag 2.

4 اوبشنز ظريفة جدا بالسعر دا مثل حساسات بارك. مثبت سرعة. محدد سرعة. مرايات وزجاج كهرباء. ايموبلايزر. فوج لايت أمامي وخلفي. جنوط سبور. إشارات بالمرايات. gps navigator. كومبيوتر رحلات.

5 العربية عالية بالنسبة للمطبات حتى لو 4 راكبين فيها.

6 النور ممتاز سواء الشبورة أو الكشافات الرئيسية.

7 الشنطة واسعة للداخل جدا.

تيجي بقى للحاجات الي ضايقتني منها جدا

ثانيا السلبيات :
========

1 العربية ضيقة من الامام لدرجة اني مكنتش عارف اقفل الحزام وانا قاعد لأن التوكة محشورة بين الكرسي ومسند اليد. علي فكرة انا طولي 185 يعني مش عملاق :)

2 طبعا ضيقة من الخلف يعني يادوب 2 على الكنبة وخلاص.

3 عند فتح الشنطة ظهر الفوانيس الخلفية من الداخل لا يوجد غطاء لها وكابلات اللمبات ظاهرة وبارزة بمعنى أن ممكن جدا ايدك تخبط فيها وانت بتحط حاجة في الشنطة وتقطع الكابلات دي. شكلها وحش جدا الصراحة

4 عند فتح الكبوت تجد ضفيرة الكابلات بتاعة الكنترول ماشية على الصاج بلا ماسورة وملفوف عليها شريط لحام اسود - اه والله شريط لحام - ومش مغطيها كمان.

5 أيضا في الكبوت عند النظر في الفيتيس والسكاترا ستجد صدأ واضح جدا دليل على ردائة الخامات
- طبعا انا لم أصدق اول الأمر أن دا طبيعي إلا لما فتحت أكثر من سيارة ووجدت أن كلهم بالشكل دا -

6 الجنوط اسبور ولكن الاستبن حديد

7 لما سوقتها على الطريق لقيت سحبها ضعيف جدا في الطلعة رغم أنها 1600 مانوال. لكن بعد كدا بتجمع.. طبعا مكنتش بقرص عليها يعني أخرى 2.5 rpm

8 صوت الإشارات والانتظار يكاد لا يسمع رغم أن الزجاج مغلق والكاسيت مش شغال. فممكن تنساه بسهولة

9 زرار الانتظار في المنتصف وظاهر جدا لكن يصعب الوصول إليه سريعا إلا لو كنت مقدم الكرسي على الاخر

10 الاتزان في هذه السيارة غير موجود بالمرة...
يعني على سرعة 90 كم على وصلة الدائري عديت جنب عربية نقل لقيتها بترقص مني علي الرغم اني مظبط الكاوتش نيتوجين اول مخرجت

عموما دي وجهة نظري الشخصية...

المشاركة الأصلية كتبت بواسطة medo_1982

موضوع السحب ده مش متوقف علي انها 1600 بس

لان عندك عامل تاني وهو العربيه دي 8 صبابات ولا 16 صباب

معلومه اللوجان 8 صباب فلو قارنت سحبها بسحب عربيه 16 صباب والاتنين 1600 سي سي حتلاقي سحب عربيتك اقل

فعلا انا مكنتش اعرف انها كامة واحدة 8 صباب.. كدا الكلام معقول. هي سحبها أفضل قليلا من اللانوس إلى هي 1500 8 صباب أيضا..
على فكرة هي مش عربيتي بس تقريبا بسوقها كل يوم :)