الموضوع: فورد فوكس ٢٠١٤

استاذ هاني سعد المحترم منسق قسم الرينو
ارجو من حضرتك ( ابوس رجلك يا اخي) بلاش كلام عن فتيس الباور شيفت و حضرتك لا ركبت و لا تمتلك العربية و لا تعرف فورد بتبيع كام عربية و لا حتى حصرتك بتشوفها في الشارع كل خبرة حضرتك في الفتيس ان حضرتك قريت موضوع في النت عن الشكاوي اللي في الفتيس و اللي رديت على حضرتك و قلتلك ان دي شكاوي بسبب ان الناس كانت فاكراه اتوماتيك عادي مش دبل كلاتش و ان حتى الاحساس بالنقلات قل كتير مع السوفت وير ابديت بداية من ٢٠١٤ و ده رابط الموضوع
http://www.nilemotors.net/Nile/45196...vs-2014-a.html
يعني يا سيدي ينفع ان كل اللي يسال عن الفلوانس نخش نقوله ان الماتور فية مشكله و بيسرب زيت و نشوه العربية برغم ان التوكيل اكتشف الخطا و عالج الموضوع فعليا و ما بقاش موجود

استاذ aymankhalifa
انا سالت طبعا علي ناس بتفهم اوي في العربيات
وملاك للعربيه
وكانت النتيجه ان العربيه ممتازه
انا طبعا مش بقول لحضرتك اشتريها
بس بشارك معاك اللي عرفته
وربنا يسترها
علي فكره الحجز في عبد اللطيف ببلاش ايه موضوع 500 جنيه دول

الاستاذ هاني سعد المحترم منسق قسم الرينو
بما اني حاسس ان حضرتك صعب مصر اصرار عجيب على عيب العربية خليني ارد على حضرتك في شوية نقط بسيطة وصدقني اوعدك ان دي اخر مرة اتكلم مع حضرتك في الموضوع ده اما ذنب توصيل معلومات غير دقيقة للناس الي داخلة المنتدي وكلها ثقة انها تحصل على معلومة امينة و ما يحصلش ده فدا متروك لربنا اولا و تقدير حضرتك ثانيا
1-اعتذر عن مقولة ان الفتيس wet هو فعلا بعد المراجعة طلع dry type
2-ford من الشركات العملاقة اللي لوكان في عيب فعلا كانت عملت recall مش extended warranty و انما فورد بتعمل كده لانها بتحافظ على سمعتها وبتطمن الناس وقالت ان في احتمالية (لفظ may)ان يكون فعلا في مشكلة تسريب بس في نقطتين اولا ان الضمان زاد لغاية عام 2014 فقط و ليس بعد كده مما يعني ان الانتاج الجديد لو المشكلة دي فعلا فيه فتبقى اتحلت النقطة الثانية ان العربية الفوكس اللي موجودة في امريكا دي تصنيع بالكامل في الولايات المتحدة و تشترك مع الفوكس الالماني اللي في مصر فقط في التصميم انما انتاجا و تقفيلا فمختلفة تماما و ما طلعش فيها العيب ده اصلا و الا فورد المانيا (الفرع الاوروبي) كان اتخذ اجراءات اكثر صرامة من مجرد مد فترة الضمان فورد المانيا مابيهزروش
3 الكوري كله في امريكا ضمانه سبع سنين ومن غير مشاكل تذكر و على ما اتذكر توكيل رينو في مصر مد فترة ضمان فتيس الميجان 2 الي 100 الف كيلو و ذلك ضمانا للسمعة بعد ما كان في شوية مشاكل في موديل 2005-2006 و اتحلت بعد كده مدفترة الضمان مش عيب و لا اعتراف بعيب في التصنيع ده سلوك الشركات العملاقة عندما تثار التساؤلات حول المنتج وبالمناسبة فورد يا ما عملت recall لعربيات فيها عيوب تصنيع مش حيبقى في عيوب تصنيع وتسكت دي مش شركة تحت بير السلم
4-فولفو فيها نفس الفتيس الباور شيفت المصنع في المانيا بلا اي مشاكل تذكر ودي برده فولفو
5-خبرة ملاك العربية هي المعيار الحقيقي في الرد على العيوب و اعتقد ان لو حضرتك بس قريت الموضوع كويس حتلاقي ان كل اللي اجاب من الملاك اقر ان العربية هايلة و ممتازة وان ما فيش مشاكل في الفتيس الوحيد في الموضوع اللي بيقول ان في مشاكل في الفتيس هوحضرتك برغم ان حضرتك (حسب كلام سابق لحضرتك) ما بتشوفهاش اصلا في الشارع
6 بمناسبة موضوع فورد استراليا برضة العربية مختلفة عن الالماني اللي في مصر و التوكيل هناك عمل كده (حسب ما هو مكتوب في المقال) كجزء من costumer satisfaction و ليس actual recall
7 ما فيش حاجة في العربيات اسمها اصل ده شبه ده يعني مش علشان ان الفتيس الDSG فيه مشاكل لازم الباور شيفت كمان يبقى فيه مشاكل ما هو الواحد لما يتسأل عن الفلوانس مش حيقول لأ ما تشتريهاش لان الميجان 2 المنتجة من نفس الشركة كان فيها مشاكل ما فيش حاجة اسمها كده لما نحب نتكلم عن ال DSG نتكلم عليه لوحده كاحد انواع الفتيس الدبل كلتش مش كانه بيمثل كل الانواع
8 لما واحد يسأل حضرتك عن العربية وهو مش عارف موضوع الفتيس المفروض (انا مش بعدل على حضرتك لا سمح الله حضرتك اكبر من كده) المفروض نفهمه ان الفتيس ده مش اتوماتيك و انما هو DCT automated manual ونقوله ايه هي مميزات الفتيس و احساس النقلات بتاعه ازاي و بعدين هوحر يجيب العربية و لا لأ انما مش نقوله دا الفتيس بتاعها بيجي بدري بدري
9 اخر حاجة و معلش لو طولت بمناسبة كلمة حضرتك اني بدافع عن الفورد باستماته اللي حيقرا الموضوع ده حيعرف انا قولت ايه عن الفوكس و قولت ايه عن الفلوانس مثلا
http://www.nilemotors.net/Nile/45085...post3875834892
http://www.nilemotors.net/Nile/45085...post3875834902

الى الاخ استاذ هاني سعد المحترم
و بعد استئذان صاحب الموضوع الاخ الكريم aymankhalifa
هقولك الحدوته باختصار يمكن حد يستفيد بيها
انا الحمد لله امتلك عربية فورد فوكس 2005 اتوماتيك منذ ما يقرب من 8 سنين دلوقتي و الحمد لله ربنا يديمها نعمة عليا
اول ما نزلت الفوكس الجديدة في 2011 كنت بافكر ابيع عربيتي و اكمل على تمنها و اجيب الفوكس الجديدة وقتها التريند بلس و برضة اول حاجة خلتني ما اخدش القرار ده وقتها بجانب الضيق الشديد للكنبة الخلفية هو خوفي من الفتيس الباور شيفت و خصوصا انه زي ما حضرتك عارف انه دبل كلتش و هناك من الاساطير اللتي تحكي عن الفتيس المظلوم معانا في مصر DSG ما يجعل الولدان شيبا ترددت و لم لتخذ هذه الخطوة
و النهارده في 2014 وباعتباري مقيما لدي الميكانيكي (صاحبي ) و التوكيل غير المأسوف عليه(اذا كان اوتوماجد اللي ما كانش يعتبر توكيل بجد و لا الله يجحمه فكري و لا اوتو جميل ربنا ................كلهم) مش لحاجة العربية ذي الفل بس انا اللي موسوس و بحب افتكس فبقالي اكتر من3 سنين بشوف الموديل ده و سوقته لفترات طويلة جدا من عربيات اصحابي الفورداوية بدون اي مشاكل تذكر لا في التوكيل و لا عند الميكانيكية (اعرف منهم لحد الوقتي كتييييير) و الحمد لله اني ما اخدتش القرار ده فعلا مش لحاجة و انما كنت حدفع فلوس ماعملتش بيها حاجة (الفوكس هي الفوكس نفس الاداء و المتعة اثناء القيادة والسيطرة صحيح الجديدة طبعا اشيك و دلعها اكتر بس حتتخلى برده عن عربية بقيت حافظها زي اسمك وعارف كل حته فيها باختصار لا معنى انك تنزل من فوكس علشان تركب فوكس حتى لو اجدد) وده اللي خلاني بافكر بفرق السعر اجيب عربية تانية جنب الفوكس اللي انا مش عايز ابيعها علشان مش عارف حاركب ايه سيدان تاني العربية التنية باذن الله هي الاكسبلورر من 98 لحد 2003
تحياتي
ملحوظة ... ترك الفراغ بعد لفظ ربنا السابق شاغرا ليتناسب مع حجم و نوعية الشتيمة اللي كل واحد عايز يقولها علشان اللي عايز يشتم يشتم براحته احنا مش بنديق على حد

يا جماعه هل في حد كن حاجز في عرض أوتو جميل واستلم الفوكس 2014 ؟ وايه الاخباااااار ؟