الموضوع: الفتيس الdsg لمجوعة سيارات vw 2013 واعلي

هو بيعتمد علي الاستخدام بشكل كبير و عايز يتساق في الزحمة مانيوال !!!
ماعتقدش إنه بيبوظ بعد 20000 كم
موجود في كله عدا الأوكتافيا

شكرا يا باشمهندس مارك......لو ممكن بس توضح ايه الاستخدام المناسب والاستخدام اللي ممكن يبوظه
الف شكر

بص يا باشا أولا لازم تبقي عارف تركيبه الأول و الmechanism بتاعته عشان تعرف تتعامل معاه ... هو معقد شوية بس انت اللي كييف ألماني :) يعني استحملني شوية في الشرح و آسف مقدما علي الإطالة !!!
الفتيس ده عبارة عن فتيس مانيوال تماما (آه مانيوال ماتستغربش) متصمم علي أساس وحدات منفصلة لكن مجمعة :) ... الموضوع يبان confusing شوية و لكن أنا هحاول أبسط علي قد ما أقدر
*الفتيس ده عبقري متكون من 3 مكونات :
1- الفتيس : وده عبارة عن فتيس مانيوال عادي جداً أو بمعنى أصح ٢ فتيس مانيوال راكبين جنب بعض في علبة واحدة والخرج مجموع على ترس واحد ... كل واحد عليه أربع تروس سرعة (نفس النوع اللي راكب في فتيس مانيوال) ... فتيس عليه تروس السرعات الفردية و التاني عليه السرعات الزوجية مع السرعة الخلفية الreverse gear
٢- مجموعة الدبرياج : و ديه تصميمها نفس تصميم الدبرياج العادي تماماً يعني فيها ديسك وبلية وإسطوانة دبرياج ، الفرق الوحيد إن من الناحية التانية من الديسك راكب إسطوانة تانية وبلية تانية ... و كدة يبقوا اتنين دبرياج وبليتين على ديسك واحد ... وكل اسطوانه ليها دواسة دبرياج ... نفس شكل الدوسة إلي احنا عارفينها في المانيوال ولكن بدل السلك راكب عليها دواس بيتحرك بضغط الزيت
3- وحدة الميكاترونيك : ودي كل اللي فيها عبارة عن بوردة الكنترول و دواس زيت (سولينويد ) لكل دبرياج ودواس لكل سرعة مكان مقبض الفتيس المانيوال عشان يشد دراع الفيتس لورا وقدام بدل الدراع ويختار السرعة كأنها مانيوال و كل دواس من دول عبارة عن سولينويد شغال بزيت برضه . وبالتالي الوحدة ديه ليها دورة زيت برضه ، لكن مختلفة عن دورة الفتيس ، لأن الفتيس في حالتنا مانيوال .
مشاكل الفتيس ده هينة مش صعبة و بتتصلح عادي و لكن غالية حبتين :)
-مجموعة الدبرياج : و ديه عيوبها نفس عيوب الدبرياج العادية لكن مشكلتها إن دول اتنين مع بعض والنقل عليهم بيتم بسرعة عالية قوي
-وحدة الميكاترونيك : مشاكلها في حاجتين ... أولاً السولينويد فالف إلي بيضعط دواس الدبرياج ، لأن دة تصميمه حساس جداً ومعتمد على هندسة معقدة يصعب شرحها لكنها حساسة جداً للأعطال و أعتقد ديه اتصلحت في الموديلات الجديدة
ثانياً اعتماد الوحدة على ضغط زيت داخلي عن طريق طرمبة داخلية تعمل بالكهربا داخل الوحدة و ديه فكرة جامدة جدا هندسياً بس ليها بعض المشاكل مش هأقدر أدخل في تفاصيلها
الحل في الفتيس ده إنه بيتغيرله اسطوانة الدبرياج أو الاسطوانتين و الجزء التاني وحدة الميكاترونيك و ديه المصيبة لأنها فيها الكنترول مع الفالفات مع الطرمبة الكهربا
قصر الكلام الفتيس ده بتاع شد و حرق و أداء عالي خرافة بس يتساق في الزحمة مانيوال (في حالة الزحمة الكتيرة و الوقفة الطويلة) و يتجاب علي الN في الزحمة برضه و مايتقرصش عليه عمال علي بطال و إن شاء الله كله هيبقي تمام ... ليّ واحد صاحبي معاه باسات 2012 غيرلها وحدة الميكاترونيك بعد 31000 كم و كان زعلان و لما شرحتله الموضوع و علمته يسوقه إزاي جرب الحكاية و كمل بالعربية 112000 كم من غير أي مشاكل مع الحفاظ علي الصيانة الدورية :)
أي حاجة تانية أنا تحت أمرك و لو عايز حاجة تعالي inbox و أنا تحت أمرك

الف شكر علي الشرح والتوضيح العالي للغاية ..... very informative
وطبعا الف الف شكر علي توضيح الاستخدام الامثل.....يعني الخلاصة ان لو استعملت العربية بالطريقة دي ان شاء الله ممكن الفيتيس ما يحصلش اي حاجة ؟..... انا في صيانة ال٥٠٠٠
التوكيل قال لي ان جالهم update علي سوفت وير الفتيس زائد هيغيروا زيت الفتيس من غير تكلفه وعملوا كده فعلا..الكلام ده في نص ٢٠١٣ فهل اللي حصل ده يبشر بالخير ؟
اسف علي الاطالة ...بس ما صدقت لقيت مهندس فاهم وامين في النصيحة
الف شكر

اشكرك يا باشمهندس مرة اخري
بس انا عايز افهم .....كان في مهندس قال لي ان الفتيس ده عدو لحاجتين... السخونية والمطبات
السخونية فهمت من كلامك ان لو استخدمنا المانيوال مش هيخللي الفتيس يبقل كتير اول وتاني وبالتالي مش هيسخن..انما المطبات ليه ؟؟؟وهل الشخللله البسيطة اللي بتتسمع في المطبات البسيطة (الفوالق عل الكباري مثلا) دي خطر او انذار بعطل؟
العربية عامله عندي ١٣٠٠٠ والحمد لله تمام اوي بس قلقان من اللي جاي ويخلص الضمان ويحصل مشكله واقعد باه اهاتي وابعت لالمانيا وكده

شكرا يا مارك بك حاولت ابعت لك عل ان بوكس بس مانفعش لاني عضو جديد لسه مافيش مشاركات