السلام عليكم و رحمة الله و بركاته
تم بحمد الله و فضله استلام نيو لوجان 2015 مساء امس من توكيل رينو اللي جنب سور نادي الزمالك
طبعا انا حجزت الفئة الثالثة Comfort في 25/11 اللي فات
و الحمد لله استلمتها بعد شهر واحد بس برغم ان الوكيل قايلي هستلم في خلال 3 شهور
التضحية الوحيدة اللي قدمتها هي اني اتنازلت عن اللون اللي كنت مختاره في الحجز وهو الشامبين
و اخدت بدل منه الفضي و بصراحة مخلي العربية شيك جدا ما شاء الله
بعد انتظار ما يقرب من 3 ساعات العربية وصلت الساعة 8:30 بالليل
شوية و العمال قعدوا يلمعوها و يركبوا طاسات العجل و يجربوها
موظف التسليم قعد معايا و شرح لي تابلوه العربية و الكماليات اللي فيها
جربت كل الانوار و الوظايف و التكييف و المفاتيح والكاسيت و اطمنت ان الاستبن و العدة موجودين
دهان العربية تمام مفيهوش غلطة خاصة انها كانت جاية على كساحات
العربية كانت عاملة 7 كيلو ونص ( طبعا ممتاز جدا )
و بعد كدا دورتها و طلعنا على اقرب بنزينه و كل اللي يشوفها يقولي الف مبروك يا باشا
العربية ناعمة جدا في سواقتها و سحبها معقول
الباور مش تقيل ولا خفيف ..
الصالون واسع و كنت قاعد مرتاح و انا سايق ( انا طولي 180 سم )
الشنطة واسعة جدا .. تحس انك ممكن تنام ممدد فيها
الكنبة الخلفية ممكن تطبق و في مكان لتثبيت كرسي الاطفال
الحاجات الرخمة في العربية مكان الكلاكس و طبعا كل الفرنساوي كدا
مثبت السرعة و محدد السرعة شغلتهم و زي الفل الحمد لله
الفرامل ممتازة
استهلاك البنزين عالي نسبيا و دا اكيد عشان فترة التليين
تحديد ابعاد العربية صعب فعلا و عايز وقت على ما تتعود عليها
العربية فعلا تستحق تمنها ربنا يحرسها من العين يارب
و اي سؤال انا تحت امركم
المفضلات