الموضوع: عربيتي تحت قبضة التنين !!

اول امبارح كنت عند والدتي في الشروق ومروح البيت - في عين شمس - وقولت اخد الدائري اريح للعربية (بدلا من طريق المهاجرين - او طريق جسر السويس ثم التوغل في مجاهل عين شمس)

المهم انى قررت اخد الدائرى وانزل منزل المرج الجديدة منها للمرج ثم عين شمس - عيب الطريق ده بس في المسافة من المرج الجديدة للمرج عشان الطريق كله مكسر وضيق وزحمة عشان المترو ده غير وحوش الاسفلت بكل احجامهم بداء من العفاريت الصغيرة لحد التنانين والديناصورات ذات الكام وعشرين راكب . واثناء عبورى من منطقة المرج (عند محطة مترو المرج ) اذا بتنين ضخم واقف بالعرض استعدادا لانة يلف وكان واقف وراه حد المهم انا ازمرت قبل ما اعدي من وراه وبدات اعدى بس بعد ما نص العربية بقى وراة لقيتة بيرجع بضهرة فزمرت اكتر ودوست بنزين عشان اطلع من وراة بسرعة بس هو ولا هو هنا ورجع اكتر لحد ما سمعت الصوت المالوف اياه طاااااااااااخ
العربية اتخبطت

نزلت وعنينة بطق شرار وانا ناوي اطلع فيه القديم والجديد (عربيتي اتخبطت مرتين قبل كده مرة ميركوباص بردو ومرة كنت راكنها في وسط البلد رجعت لقيتها مخبوطة)

انا مبشيلش معايا شومة في الشنطة ولا صاعق كهربا واستخدام الايد في موقف ميكروباصات غير مأمون العواقب مش هطول عليكوا كل اللي كان في دماغي اني اخدة علي القسم عشان يتروق هناك

اللي حصل ان الناس اتلمت وكلهم بيحاولوا يقنعوني اني اخد منة فلوس واسيبة بس انا مش حابب اخد فلوس الراجل حلفلي بكل الايمان اللي في الدنيا ان مراتة حامل وبيتة هيتخرب وصاحب العربية هيميشية لو راح القسم فانا بصراحة خفت ليكون بيتكلم بجد وهيبقي فيها خراب بيت فقولتلة خلاص ربنا يسامحك واللي عند الله مبيروحش

المهم بعد الخبطة الشنيعة ديه بفكر اسمكر العربية وارشها كلها عشان الخبطات وعشان فيه خرابيش برضوا كمان اعملها تبع التامين (الجمعية الاهلية) ولا حرام ولا ايه مش عارف بصراحة نفسي اتسدت من العربية وجالي ليها مشترى فبفكر ابيعها انتوا ايه رايكوا