و انت بتختار الفلوانس كنت بتقارنها مع مين؟ و ليه استقريت على الفلوانس فى الأخر؟

أكيد كلنا كنا فى حيرة و أحنا بنختار عربيتنا الجديدة اللى هندفع فيها رقم كبير و كتير مننا مقسطها و تعتبر طبعاً استثمار للأسرة و المرجو منها توفير ركوبة سهلة مريحة بدون مشاكل
كل واحد مننا عايز بفلوسه يجمع اكتر و اهم المواصفات فى عربية واحدة
امكانيات، كماليات، اعتمادية و توكيل مضمون.... الخ
أكيد لفينا و دورنا و سألنا و درسنا و اتفرجنا و ركبنا و قعدنا شهور لغاية لما استقرينا على الفلوانس

قصتك تهمنا و تهم كل من هو مقبل على الشراء حالياً او لسه محتار و مش عارف ياخد القرار

انا حاطط هنا استطلاع كنت بتقارن الفلوانس مع ايه...طبعاً اخر مقارنة قبل تنفيذ الشراء و ياريت بعد الاختيار تقولنا ليه استقريت على الفلوانس
مشاركتك تهمنا و تهم كل المحتارين

تحياتى

السلام عليكم يا باشمندس هاني...انا اشتريت الفلوانس من اسبوع وكنت بفاضل بينها هي والكورولا والحمد لله اخترت الفلونس لاسباب1-ارتفاعها عن الارض ده كان اهم شئ في الاختيار لاني كان معايا اوبل كورسا وكانت عاليه وعمرها ما حكت في مطب 2-فرق السعر فلوانس ب174 والكورولا 197 بالافر بريس 3-كماليات الفلوانس احسن خصوصا فتحه السقف 4-تصميم التابلوه في الكورولا مش حلو خالص وقعده الكرسي مش مريحه زي الفلوانس5- ان الفلوانس اوربي يعني سنتر وشنطه كهرباء ومكن رفع مع سنتر مش عارف ليه الكوري والياباني مش بيعملوها وكانها حاجه صعبه

اقتباس:

---

المشاركة الأصلية كتبت بواسطة mmsobhi

السلام عليكم يا باشمندس هاني...انا اشتريت الفلوانس من اسبوع وكنت بفاضل بينها هي والكورولا والحمد لله اخترت الفلونس لاسباب1-ارتفاعها عن الارض ده كان اهم شئ في الاختيار لاني كان معايا اوبل كورسا وكانت عاليه وعمرها ما حكت في مطب 2-فرق السعر فلوانس ب174 والكورولا 197 بالافر بريس 3-كماليات الفلوانس احسن خصوصا فتحه السقف 4-تصميم التابلوه في الكورولا مش حلو خالص وقعده الكرسي مش مريحه زي الفلوانس5- ان الفلوانس اوربي يعني سنتر وشنطه كهرباء ومكن رفع مع سنتر مش عارف ليه الكوري والياباني مش بيعملوها وكانها حاجه صعبه

---

اشكر حضرتك جداً على المشاركة و على ذكر الأسباب لأستفادتى انا شخصياً و استفادة كل المحتارين
مبروك على الفلوانس و تستمتع بيها....ربنا يديك خيرها و يكفيك شرها

كل سنة و حضرتك طيب

تحياتى

موضوع مهم فعلا....تحياتي

كنت بقارنها مع سوبارو xv ..... و أخترت الفلوانس علشان الأوبشن العالي لأني من هواه التكنولوجيا الحديثه و طبعا سعرها معقول أوى .

واحد من القرارات الصعبة .. هو قرار شراء سيارة جديدة


أربعة شهور بالتمام هى ما إستغرقته عملية إتخاذ القرار بالشراء منذ الشرارة الأولى لميلاد فكرة تغيير السيارة


ندخل فى الموضوع ... بدأت تصفيات البطولة بــ 14 ماركة يمثلها حوالى 24 موديل مختلف فى مجال سعرى يتراوح مابين 130 ألف جنيه حتى 210 الف جنيه
طبعاً سيثير هذا المجال السعرى الواسع جداً نسبياً إستغراب ودهشة الكثيرين ولكن كان هذا التفاوت الواسع مقصوداً لغرض فى نفسى (سيتم التعرض له تفصيلاً فى موضوع قادم بإذن الله)
المهم .. إنتهت الأدوار التمهيدية للبطولة لأصل إلى دور الأربعة (قبل النهائى) وكانت المنافسة مابين تويوتا كرولا & رينو فلوانس & كيا سيراتو & فورد فوكاس
إنتهى الدور قبل النهائى بسرعة لأصل إلى المباراة النهائية مابين المتنافستان تويوتا كرولا & رينو فلوانس .. إستغرقت تلك المباراة وقتاً ليس بالقصير لا سيما أن الكرولا منافسة قوية وشرسة لايستهان بها ومازلت أعتبرها من أفضل السيارات العائلية (طبقا للمواصفات المتاحة فعلياً بالسوق المصرية) فى الفئة السعرية (حتى 200 ألف) وإنتهت المباراة لتفوز رينو فلوانس بعد مباراة طاحنة إستخدمت فيها السياراتان معى كل أسلحة العقل والعاطفة المتاحة لهما.


عناصر المفاضلة المرجحة (لفئة الهاى لاين فى السيارتين) :-
1 - الشكل الخارجى والداخلى :- كانت المقارنة لصالح الفلوانس .. وفقاً لذوقى الشخصى لم أستطع إستساغة الشكل الخارجى الجديد للكرولا وأعتبر الموديل السابق أكثر جمالاً وتناسقاً وبصفة خاصة مؤخرة السيارة .. أما عن الصالون فلم أشعر بأى تفرد لتابلوه التويوتا (وهو أول جزء يخطف نظرك فى أى سيارة) ووجدته تقليدياً جداً يخلو من اللمسة الإبداعية والفخامة ، بعكس ما يوحيه لى المظهر الخارجى للفلوانس من رقة وفخامة وأبهه فرنسية لم تخطئها عينى من أول نظرة .. و ما أن جلست بكرسى السائق إلا وتأكد هذا الإحساس داخلياً أيضا.


2 - كماليات وتجهيزات إضافية :- بخلاف أنظمة VSC & Park assist & حساسات الركن الأمامية & كاميرا خلفية & مرآة صالون تعتيم ذاتى أوتوماتيكياً التى تتفرد بهم الكرولا وتتميز عن الفلوانس فإنه فى المقابل تتميز الفلوانس بتجهيزات غير متوفرة بالكرولا كالآتى : فتحة سقف كهربائية & مصابيح زينون (واطى فقط) بخاصية الضبط التلقائى & فرش جلد كامل & حامل نظارة & ستائر جانبية بالأبواب الخلفية وللزجاج الخلفى & نظام صوتى بـ 8 سماعات & مخارج خلفية للتكييف & مصابيح حساسة للإضاءة تعمل تلقائياً & مساحات مزودة بحساسات للمطر &keyless entry & START/STOP button & زجاج كهربائى للأربعة أبواب بلمسة واحدة .
إجمالاً .. فإننى وجدت كم الكماليات والتجهيزات الإضافية بالفلوانس تفوق ما تتميز به الكرولا طبقاً لذوقى الشخصي وترتيب أولويات إهتمامى وإحتياجاتى عملياً . إلا أنه وللأمانة فى العرض .. لو كان لى أن أختار من تجهيزات تويوتا لإضافتها للفلوانس لإخترت نظام VSC فقط أما باقى التجهيزات فلا أجدها ضرورية أو تمثل وجه تميز من وجهة نظرى وذوقى وإحتياجاتى الشخصية.


3 - إرتفاع السيارة :- تتفوق به الفلوانس عن التويوتا ، وقد ثبت بالتجربة العملية لحوالى 9000 كم وسبعة شهور من الإستخدام الفعلى وبحمولة كاملة نجاحها بنسبة 100% فى تخطى كل أنواع المطبات والمقبات الصناعية حتى العشوائى منها.


4 - السعر :- "ليه تدفع أكثر لما ممكن تدفع أقل"

بالنسبة لهذا العنصر تفوقت بجدارة الفلوانس على غريمتها الشرسة التويوتا لا سيما أن فارق السعر بالنسبة لى وبالسعر الرسمى للوكيل ليس هيناً (حوالى 25 ألف) وبمدة حجز لاتقل عن 3 شهور طبقاً لتصريح مسئول المبيعات ويمكن أن تصل إلى 4 شهور لعدم توفر الهاى لاين وقتها كبضاعة حاضرة . أما إذا رغبت فى الإستلام الفورى من أى معرض فيتراوح فرق السعر ما بين 30 إلى 35 ألف بالأوفر برايس حسب الشطارة .. لماذا ؟؟!!


ومن جهة أخرى لو وضعت الفلوانس فئة الهاى لاين التى إشتريتها بسعر 186 الف فى مقارنة مع ما يماثلها فى السعر من فئات الكورولا لكانت المقارنة بالفئة الثالثة للتويوتا بـ 185 ألف وليس الرابعة (الهاى لاين) وبالتالى كانت ستفقد التويوتا أمام الفلوانس مميزات أخرى عديدة موجودة بالهاى لاين فقط منها :
كاميرا خلفية & مرآة ذاتية التعتيم أتوماتيكياً لتصبح يدوياً & سخانات المرايات الجانبية & رشاشات الفوانيس الأمامية & ستفقد عدد 5 إيرباج لتصبح 2 فقط فى مقابل 6 للفلوانس & سيصبح الفرش قماش فقط بدلا من قماش/جلد فى الكرولا الهاى لاين & ستفقد مفتاح ذكى ليصبح مفتاح بريموت .


آسف إذا كانت المشاركة أطول من اللازم ولكننى حاولت ان أغطى بعض التفاصيل لأمانة العرض والموضوعية.

وتقبلوا تحياتى ،،،

العزيز هشام بيه،
بشكرك بأسمى و أسم كل أعضاء قسم رينو على هذه المشاركة الثرية المفيدة جداً و اللى فعلاً شدنى كل سطر فيها و مكنتش عايزها تخلص و اللى أكيد هتفيد ناس كتير حيرانة و مش عارفة تختار إيه
بحييك على وصفك الدقيق جداً لكل التفاصيل
جزيل الشكر للمجهود الرائع
و مستنيين بشوق الجزء التانى من المشاركة عن سبب رينج السعر الكبير اللى كنت بتدور فيه
تحياتى

موضوع مميز كالمعتاد هانى بيه :)
انا المقارنه عندى رسيت فى النهايه بينها و بين السيراتو ...
فى النهايه لازم تقرر و تختار واحده ... ففضلت الفلوانس ...
تحياتى ...

واضح من الاستطلاع المنافسين الرئيسيين للفلوينس االكورولا و السيراتو و الاسترا و دول فعلا اللى كانوا فى دماغى و انا باشترى بس استبعدت السيراتو سريعا .

موضوع مميز كالعاده :)

موضوع محترم.. إليكم تجربتي
أنا كنت بقارن بين أوكتافيا a7 / نيسان سنترا / فلوانس

أنا ببساطة كنت بدور على أعلى عوامل أمان - ودي فازت فيها الفلوانس من خلال 6 أيرباج والعوارض اللي في الأبواب
بعد كدا بصيت على الكماليات- ودي برده فازت فيها الفلوانس (كقيمة مقابل الفلوس)، خصوصاً أن عربية زي الأوكتافيا مثلا رقم واحد (270 ألف) أقل كماليات ووسائل أمان من الفلوانس

السنترا كان شكلها حلو، بس جديدة ومش مضمونة، والتعليقات عليها في الخليج مكانتش كويسة قوي

وبالتالي كان الاختيار (الفلوانس)

ومع ذلك محدش يقدر ينكر أن الأوكتافيا عربية ممتازة ودا عن تجربة أكثر من شهرين. واسعة، خامات ممتازة، متانة، إعادة بيع، وغيره.

باختصار، لو كنت أعزب أو مفيش أولاد يبقى أوكتافيا
بس مع وجود العائلة، عوامل الأمان كانت الأهم، وبالتالي كانت الفلوانس هي الاختيار. وبعد شهر ونص تقريباً أنا راضي بشكل عام الحمد لله عنها.

تحياتي