اشتريت ميجان2/فلوانس مستعملة ؟
و الكلام عن فلوانس phase1 من 2010 ل2013
ألف ألف مبروك
لو كانت ميجان , يا رب تكون كشفت عليها في التوكيل بدل ما تتدبس في عربية مش ولا بد و ترجع تغني ظلموه
لو كانت فلوانس , برده يا رب تكون كشفت عليها في التوكيل عشان ده الطبيعي يعني :)))))
دلوقت اي عربية مستعملة في الدنيا لما تشتريها لازم حاجة من اتنين
يا اما
العربية تكون ماشية على جدول الصيانات بتاع التوكيل و مالكها السابق بيديهولك و بالتالي بتكمل عليه و خلاص , او بيقول لك انها صيانة توكيل فبتتصل بالتوكيل و بتاخد منهم تاريخ صيانات العربية و بتكمل عليه الجدول الرسمي للصيانة
او
بتبقى مش عارف اي حاجة عن تاريخ الصيانة في العربية , و هنا بيبقى عليك انك تتكلف شوية و تعمل لها صيانة 60 الف حماية للعربية اللي معاك لأن سير الكاتينة لو عمره الافتراضي خلص و اتقطع العربية هاتجيب وش سلندر
التفاصيل ايه ؟
5 لتر زيت 5w40 الماركة اللي ترتاح لها (انا عن نفسي اكتر من مرة اجرب توتال اللي بيستعمله التوكيل و ما بيعجبنيش خالص) (هاحاول اجيب المواصفات القياسية للزيت و ازودها في الموضوع)
فلتر زيت , هاته من التوكيل
طقم كاتينة , سعره في التوكيل قريب اوي من سعره برة فهاته من التوكيل , بتاع ميجان2 بيعمل 800 جنيه اظن , و بتاع فلوانس اظن اكتر حاجة بسيطة
فلتر هوا و فلتر بنزين , برده هاتهم من التوكيل , فلتر الهوا ب100 و شوية و فلتر البنزين مش فاكر بكام
طقم بوجيهات , ممكن تجيبها من التوكيل بحوالي 150 جنيه و الافضل تاخد الكود بتاعهم و تجيبهم من توكيل NGK مثلا ب60 جنيه بس الطقم
بتتغير مياة التبريد , توتال الجركن ب70 جنيه تقريبا
بيتغير زيت الفرامل , العلبة في التوكيل ب20 جنيه تقريبا
لما الصنايعي بيفتح , و يفضل تعمله عند صنايعي رينو لو مش هاتعمله في التوكيل او مركز خدمة معتمد , بيبص على طرمبة المياه , لو حالتها تعبت يبقى بتغيرها هي كمان
و استمتع بعربيتك الجديدة :)
المفضلات