الموضوع: لوجان ولا سياز

المشاركة الأصلية كتبت بواسطة egorme

نفس المقارنة أفكر فيها فقمت بسؤال فنى تكييف وكهربائى وصاحب معرض سيارات عن المقارنة بينهما فجاءت ردودهم كالآتى:

1. فنيين اصلاح اليابانى منتشرين عن الرينو
   
2. قطع غيار السوزوكى منتشرة أسهل من لوجان
3. استهلاك بنزين السوزوكى أحسن من لوجان
4. قطع غيار السوزوكى عموما أرخص من لوجان
5. سوزوكى أسهل فى اعادة البيع عن لوجان حتى لو أتوماتيك
   
6. صالون سياز أوسع من لوجان
7. شنطة سياز أكبر من لوجان
8. أما حساسات الانتظار والشاشة اللمس فى لوجان فيمكن اضافتها الى سياز
   

وكى أستفيد من المهلة حتى معرض فورميولا الذى يفترض أن تأتى فيه أتوماتيك اللوجان فقمت بحجز سياز فى التوكيل وأمامى مهلة فى استلامها أو استرجاع المقدم مقاربة لفورميولا

وخلال المهلة المذكورة فرصة لمزيد من المشورة والمقارنة

بداية واضح ان حضرتك اتكلمت مع ناس من اللي اخرهم ماروتي و سويفت قديمة و طالما قالولك يا بيه الياباني كذا و الاوروبي كذا يبقي افهم انهم بيرددوا و خلاص زي حكاية زي 5000 و زيت 10000
انا كان معايا التو اسعار قطع غيارها هي اللوجان برة في حاجات كتيير
تيل الفرامل في التوكيل 350 ج في توكيل و ده كام من سنتين تقريبا اما رينو في حدود 400 دلوقتي مع العلم فرق الفئة و الالتو فئة اقل من اللوجان
قولهم محدش يفتي في حاجة و يبطلوا شغل ترديد الكلام زي البغبغانات و خلاص اسالهم موديلات او لما يجوا يتكلموا يقارنوا بين العربيات بموديلاتها مش يقولي ياباني و كوري و اوروبي و ال فاهم ال

نيجي نتكلم في نقطة نقطة بقي

فنيين اصلاح اليابانى منتشرين عن الرينو
العربيات اللي بتكنولوجيا بسيطة مش معقدة طبيعي هتلاقي ناس كتيير تشتغل فيها زي الماروتي و السويفت القديمة و الفان هي ديه فكرة الناس عن الياباني
بس الكلام غلط فيه عربيات في الياباني فنيين ميعرفوش يشتغلوا فيها عشان مش عارفينها
الاوروبي بشكل عام معقد في التقفيل و عشان تغير حاجة لازم تفك حاجتين تلاتة و اغلب اللي معاه عربيات اوروبي مبيروحش غير توكيل او مركز صيانة معتمد عشان فاهمين العربية فقليل لما تلاقي حد فاهم فيها
و هديك مثل في الرينو الميجان العربية ديه محترمة بس للأسف بعض اللي جابوها راحوا لميكانيكية برة و النتيجة العربية خربت مش فاهمين فيها و مليانة حساسات خلوا الناس تاخد فكرة سيئة عن الميجان بالنسبة اللي ميعرفهاش فعلا لكن اللي تابع مع التوكيل العربية زي الفل بقالها سنين و لسه مقابل ناس منهم في الصيانة بيعملوا الصيانة معايا و مبسوطين
بس انت هتجيب عربية جديدة زي السياز مثلا متقوليش انك هتروح لميكانيكي في الشارع يبقي حرام عليك لما تفكر في عربية جديدة في الفئات ديه خليك مع التوكيل

قطع غيار السوزوكى منتشرة أسهل من لوجان
غير حقيقي المنتشر قطع غيار الموديلات القديمة زي ماروتي و فان
و الالتو مش عند اي حد كنت بلاقيها عند محلات معينة بعينها و منفذ بيع قطع غيار التوكيل طبعا
اللوجان قطعها منتشرة لأنها بنفس الموتور و الفتيس و اغلب الاجزاء الميكانيكية و ده اللي فوجئت بيه لما نزلت لفيت لكن احقاقا للحق اكسسوارات و اكصدامات و فوانيس لسه ملقتهاش برة غير عند 2 بس


استهلاك بنزين السوزوكى أحسن من لوجان
ده حقيقي سوزوكي دايما بتعمل المواتير بتكنولوجيا توفر استهلاك البنزين و هتلاقيها دايما بتنزل عربيات بسي سي قليل بس بعزم


قطع غيار السوزوكى عموما أرخص من لوجان
لو هنتكلم في ماروتي و فان و سويفت قديمة هقولك اه لكن غير كده لأ و ده طبيعي لاي عربية جديدة
كان معايا التو و لقيت الاسعار زي بعض في حاجات كتيير برة التوكيل و احيانا في التوكيل

سوزوكى أسهل فى اعادة البيع عن لوجان حتى لو أتوماتيك
زي ما اتفقنا الناس بيتكلموا عن موديلات قديمة لكن ممكن تشوف مبيعات اللوجان المستعمل بعد ما ثبتت نفسها و شوف الانتشار بنفسك


صالون سياز أوسع من لوجان
شنطة سياز أكبر من لوجان

بصراحة مقعدتش في السياز عشان احكم لكن غالبا قريبين من بعض جدااا حسب القياسات اللي كتبها أ \ محمد في القسم


ما حساسات الانتظار والشاشة اللمس فى لوجان فيمكن اضافتها الى سياز
الكماليات ديه امرها بسيط و ممكن تركبها في التوكيل لو موجودة عندهم و بلاش تعمل حاجة برة عشان الضمان و عشان تبقي في السليم انت عارف الصنايعية


و اخيرا يا باشا هقولك حاجة سيبك من كل الكلام ده و المقارنات جيب العربية اللي انت مرتاح لها و حاسس انها تلبي احتياجاتك و سيبك من كلام ناس و قطعها و اعادة بيعه