مشكلة بعد صيانة الـ 1000 كم
السلام عليكم ورحمة الله،
الحمد لله, بعد صعوبة كبيرة قدرت اروح النهاردة مركز القطامية و اعمل صيانة الألف الاولي,
العربية مكنش فيها مشاكل تذكر الحمد لله الا حاجات بسيطة جدا, زي مثلا:
1. عضة خفيفة في الفيتيس, وممكن سببها اني مابضغطش علي الدبرياش للآخر وانا بادي الغيار
2. ساعات (نادرا وليس بشكل متكرر) وانا بادي كلاكس, تروح الفلاشة فاصلة اللي مشغلاه ولازم اشغل الراديو بعدين الفلاشة مرة تانية
----
خلصو شغلهم في حوالي ساعة او اقل من تشييك علي الفرامل و العفشة و تغيير الزيوت وخلافه,
لاحظت بقي مشكلة مزعجة جدا,
هي درجة حساسية السنسور بتاع الرجوع للخلف,
الاول كان مجرد مادي المارش علشان ارجع لورا اسمع صوت بيب واحدة بسيطة جدا و يسكت,
و يبدأ يديني مع الرجوع كذا بيب بشكل منتظم بطيء, بعد كدة تزيد سرعة النغمة, بعد كدة تبقي بيييييب طوييييلة لما اكون خلاص هالبس في اللي ورايا,
دلوقت بقي, بمجرد ما بادي الغيار علشان ارجع للخلف,
الاقي البييييييب الطوييييييلة دي من غير حتي مايكون في حاجة ورايا !
* ياتري المشكلة من ايه, وممكن اعملها انا ولا لازم ارجع تاني الفرع, لأن المشوار بالنسبالي كان متعب جدا ومافيش وقت يسمح