الموضوع: وبدأت رحلة الـ bm 316 بمشيئة الله

السلام عليكم ورحمة الله وبركاتة

حبيت أطرح عليكم موضوع شراء سيارة BMW 316I موديل 2015

أود أن تشاركوني الأراء وأشارككم المعلومات لكي نستفيد منها جميعاً ،

نبدأ علي بركة الله تعالي

بسم الله الرحمن الرحيم




في البداية أنا مقيم بالسعودية ومع قرب نزولي نهائي لمصر بدأت أفكر في شراء السيارة ألي تناسبني ،
طبعاً لفيت علي المواقع والمنتديات وكل شوية تطلع في دماغي عربية معينه وأدخل وأشوف مقارنات ،
وفي الأخر أحتار أكتر وأكتر ، وكل مرة سقف أحلامي يعلي أكتر وأكتر ،


شوفت المرسيدس السي الجديدة ، أنبهرت بيها ، شكل وتكنولوجيا وهيلمان وفخامة ، حاجة لاتوصف ،
وبالفعل أرسلت أخويا لتوكيل مرسيدس في أسكندرية وحجز لي ولنفسه الفئة سي 180 أعلي فئة ،
وقلت أخيراً هي دي العربية ألي هتمتع بيها بعد سنين من طويلة من الغربة ، وهيأت نفسي علي كده ،
وفجأة فوجئت زي كتير من الناس أن فيه مشاكل في البنزين وطبعاً قولت لأخويا ألغي الحجز ،
وبالفعل تم الألغاء ، وبدأت الحيرة مرة أخري ، ولكن هذة المرة قلت لنفسي لابد من أختيار سيارة أعتمادية ،
وبدون مشاكل ولم أجد أي ماركة سيارات خالية من العيوب إلا شركة BMW ، وتم أختيار الفئة الثالثة ،
وبدأت حيرة أخري هل أشتريها من مصر ولا أشتريها من السعودية ،
في مصر السيارة تمنها كلنا عارفينه 356 ألف جنية ،
وفي السعودية فيه عرض عليها وأصبحت بـ 130 ألف ريال ،
ولكن العربية في السعودية فيها تقريباً كماليات 328I ،
وفي مصر طبعاً كلنا عارفين أنها فاضيه تقريباً ،
أستقريت علي البي أم ولكن برضو فيه حنين للمرسيدس ،
ولكن الأخ / أحمد المحلاوي ، أستشاري المبيعات في BM السعودية قالي مقولة كيفتني ،
وبصراحة حسيت أن العربية هتبقي مميزة بالنسبة لي ،
قال لي :

( أي حد معاه فلوس يركب مرسيدس ، لكن مش أي حد معاه فلوس يركب BM )

عجبتني الحكمه دي وقررت أني أخلص فيها وبالفعل تم ،

معلش أنا بطول شوية لكن بختصر التفاصيل علي قد ما أقدر فسامحوني ،
نرجع بقي للعربية تاني وهنا بدأت البحث عن مخلص جمركي شاطر ، بمعني أنا مش عايز أسرق البلد وفي نفس الوقت مش عايز البلد تضحك علي وتستغفلني ،
لحد مالقيت مخلص شاطر وفي نفس الوقت كل شيء رسمي ،
والنهاردة روحت أخدتها من الوكيل علي ونش ( ساطحة ) من BM ،
و سلمتها لشركة الشحن علشان يوم الخميس إذا أراد المولي تتحرك العبارة بيها ،
وتوصل بأذن الله السويس علي يوم الثلاثاء ،
لحد هنا ونتوقف وهنعمل تحديثات أول بأول مع رحلة الـ BM لمصر ،

بداية الرحلة

محجوز للنشر

معلش بقي مش عارف أعمل تعديل علي تاني مشاركة ألي هي كانت محجوزه علشان تسلسل الموضوع ،
مش عارف أنا ألي مش عارف ولا قوانين المنتدي كده ، ماعلينا ندخل في الموضوع

بعد ما سلمت العربية لشركة الشحن في جده وبدورها شحنتها علي الباخرة ،
وصلت العربيه ميناء السويس وأخدت في الطريق يومين ، وكانت أخر عربية أتشحنت ،
ولما وصلت السويس كانت أول عربيه تنزل ، وأول ماوصلت المخلص شافها وقالي ناقصة
المثلث والقاطرة والمفك وكوريك كنت شاريه وحطيته في الشنطه ، ماعلينا المهم أنها وصلت بدون
حكات أو خلافه ،
نسيت أقولكم أني لما نزلتها كانت بأسم تاجر مستورد علشان تبقي الجمارك معقوله وواجهتنا مشكله في الجمارك ،
العربيه موديل 2015 وموجودة علي سيستم الجمارك ولكن ألي موجوده علي السيستم بدون الأضافات ألي موجوده في عربيتي وهنا مشكله تانيه بعتوا أسكندريه علشان يجيبوا أكواد الأضافات ومن هنا بدأت المجزره في الجمارك ،
المهم وصلوها لحد ١٨٥ ألف جنيه ، طبعا أنا أعترضت وقدمت طلب لأعادة التقييم مرة أخري ، وتم أعادة التقييم ،
وبالفعل تم تخفيض المبلغ إلي ١٦٥،٣٧٢.٩٧ جنيه بالأضافة إلي ٦٠١٦ جنيه رسوم ونثريات وأرضيات وساطحة ( ونش يعني ) علشان أبعت عليه العربيه من السويس للأسكندرية ،

أما بقي لو كنت عملتها شخصي مش تجاري فكان المبلغ هيوصل تقريباً إلي ١٩٥ ألف جنيه ،
طيب تعالوا كده نحسبها من أول لما أشتريتها لحد ماوصلتني في أسكندرية ،
مبلغ الشراء ( ١٣٠،٠٠٠ ريال * ٢،٠٥ جنيه ) = ٢٦٦،٥٠٠.٠٠ جنيه
مصاريف الشحن لحد السويس ( ١،٨٠٠ ريال * ٢،٠٥ جنيه = ٣،٧٩٢.٥٠ جنيه
جمارك + رسوم ومصاريف وأرضيات ( ١٦٥،٣٧٢.٩٧ جنيه + ٦،٠١٦ جنيه = ١٧١،٣٨٨.٩٧ جنيه

يبقي المجموع : ٢٦٦،٥٠٠.٠٠ + ٣،٧٩٢.٥٠ + ١٧١،٣٨٨.٩٧ = ٤٤١،٦٨١.٤٧ جنيه بالتمام والكمال

نيجي بقي لعيوبها : طبعاً العيب الوحيد والأساسي أن سعرها كده غالي جدااااااااا
أما مميزاتها : هي أنك راكب عربيه ٣١٦ بكماليات ٣٢٠ وبنزين أقل وضريبه أقل .

أقولكم بقي أنا جبتها ليه مع علمي بأنها هتكون غاليه ولكن لم أتوقع تكون غاليه أوي كده :
دلوقتي أنا بصفي نفسي في السعودية وبأذن الله هنزل نهائي في شهر يوليو ٢٠١٥ ،
أنا راكب هنا تويوتا برادو ٢٠١٢ عامله ٣٠ ألف كيلو وسعرها حالياً ٩٧ ألف ريال وأنا كنت شاريها ١٢٤ ألف ،
قولت لنفسي أنا هعتبر نفسي مادفعتش تمن العربيه ال bm ، يعني البرادو قصاد ال bm ،
يبقي ألي أنا هحسبه هي الجمارك وبس ( علي أساس أن أنا هبيع البرادو لما أنزل إن شاء الله ) ،
علشان كده أنا رضيت بالزياده في الجمارك وحسست نفسي أن ده هعتبره سعرها وخلاص ألي هدفعه ،
ياريت النقطه دي بالذات أكون وفقت في شرحها وتوصيلها إليكم زي ماقصدتها بالظبط .
أنا عملت ليه كده لأن الكلام حلو وأنت بعيد لكن وقت الشراء من مصر الوضع بيختلف والفلوس بتبقي عزيزه
علي الواحد علي أساس أن ألي هيطلع صعب تعوضه ،
يعني لو بشتري bm320 هدفع تقريبا ٤٤٥ ألف جنيه وربما أكتر وده أنا شايف أنه مبلغ كبير علي أني أدفعه عداً
ونقداً مره واحدة مش هيهون علي ، أنا طلع عيني في الغربة ١٤ سنة ، ماينفعش بأي حال من الأحوال أدفع مبلغ
بالشكل ده في عربيه ، أومال هجيب شقة بكام وهوضبها بكام وهفرشها بكام ،
دي وجهة نظري بكل صراحة ربما يراها البعض خاطئة ولكن أنا حسبتها كده ، فيه حد هيقول العمليه هي هي في الإخر ،
هقوله لأ معلش أنا أسف تفرق معايا علي الأقل نفسياً ،

أرجو أن وجهة نظري قد تكون واضحة للجميع

نصيحة أخوية
لا أنصح أحد بهذه التجربه ( طبعاً الأمور واضحة )
شوف تكلفتها وصلت كام في الأخر !!!!!!!

عزائي الوحيد
هو أني راكب عربية مميزه مش هتلاقيها في مصر كتير بالنسبه للكماليات ،
وبرضو يكفيني أنها 316 ولكن بكماليات 320
وفي الأخر كفاية أنها ألماني

أنا الحمدلله عندي قتاعة تامة بالي أنا عملته ومش ندمان أبداً
وبدعي ربنا أني لا أكون سبب في أستفزاز أحد لا يقدر علي شراء سيارة مثلها ،
وربنا يدي كل واحد مايتمناه وزيادة

شكراً لكم جميعاً علي متابعتكم معايا ،
معلش زهقتكم كتير ، ولكن صدقوني حسيت فعلاً أني بستشير
أهلي وأصدقائي ، ويارب يارب أقدر أفيدكم في أي حاجه قادمة بأذن الله ،
أنا أستفدت كتير من المنتدي ومن أرائكم وتجاربكم وكان لكن دور مهم في أختياري ،
وفي الأخر بقول الجمله ألي سبق وقلتها في الأفتتاحية :
أي حد معاه فلوس يقدر يركب مرسيدس ،
لكن مش أي حد معاه فلوس يقدر يركب bm

وفي الأخر بقول يارب أعطني خيرها وأكفيني شرها

شكراً وفقكم الله وأي أستفسار أنا تحت أمركم

وسامحوني لأني بكتب من الأيباد فمش عارف أنسق كويس

محجوز للنشر
بعد إذن الأدارة

المشاركة الأصلية كتبت بواسطة Karim_Monir

في النتظارك :-)

شكرا لمرورك يافندم

مبروك مقدما ياباشا وتوصل بالسلامة واختيار موفق احنا لسه مستلمين ال 316 موديل 2014 فى أول السنة دى من ميناء السويس بور توفيق تحديدا والحمدلله الأجراءات كانت كويسة عشان المخلص كان معروف جوه المينا ربا يباركلك فيها ويحفظهالك يارب

المشاركة الأصلية كتبت بواسطة swimmer25

توصل بالسلامة
إنت حسبتها هتقفل كام بالمصري لما توصل بالسلامة عند البيت في مصر؟

الله يسلمك ياباشا ،
والله أنا طبعا حاطط رنج معين ولكن انا ماشي معاكم
خطوة بخطوة وهنوصل للمبلغ النهائي بأذن الله لما
العربية تطلع من الجمرك وهقولكم بكل شفافيه ، لأني
عايزين كلنا نستفاد

المشاركة الأصلية كتبت بواسطة marwanragab

مبروك مقدما ياباشا وتوصل بالسلامة واختيار موفق احنا لسه مستلمين ال 316 موديل 2014 فى أول السنة دى من ميناء السويس بور توفيق تحديدا والحمدلله الأجراءات كانت كويسة عشان المخلص كان معروف جوه المينا ربا يباركلك فيها ويحفظهالك يارب

الله يبارك فيك أستاذ / مروان
مبروك لحضرتك ، وياريت يافندم تقولي جماركها كانت كام لو أمكن ؟
شكرا لذوق حضرتك