مندوب مبيعات بــ 6000 ف الشهر

أنا كالعادة يعني بدور على شغل من فترة ولقيت شركة شغالة ف المنتجات الطبية ومشهورة جدا عايزة مناديب

رحت أستفسر مدير الفرع قعد معايا وقالي الشغل عبارة عن إنك بتشتغل مندوب تسليم مش مبيعات
يعني من الفرع الرئيسي بيجيلنا فواتير وناس طالبة منتجات إنت بتاخد المنتجات وتروح للناس دي !

على كل منتج هسلمه هاخد 15 جنيه غير اللي هاخده من العميل هيبقى ليا برضه وهاخد الفلوس ف يومها وأنا ماشي مش هتسنى لآخر الشهر

يعني لو عملت 8 أوردرات ف متوسط الأوردر 30 جنيه مع شيل حق المواصلات هنقول هيتبقى 200 جنيه دول ليا !!

حتى لو 6 أوردرات أو 5 هيبقى مرتب كبير برضه !!

لحد هنا كويس !

هما عندهم نظام بمضي على وصل أمانة علشان يضمنوا إني مآخدش المنتجات واخلع قيمته 25000 جنيه !!

هي الشركة كبيرة وسمعتها معروفة ومنظمة جدا

إي رأيكم أقبل ولآ لآ ؟!؟!

انا شايف ان في ظل الظروف المنيلة بنيلة دي الشغل ده تمام .. لو منك اقبله

طب وحوار وصل الأمانة ده ممكن يلاعبني بيه ولآ هو حقه !!

شغل كمندوب تسليم و ليس مبيعات زي الفل و المرتب زي الفل

بص لاحظ انك هتفضل تلف طول اليوم

هو الشغل من كام لكام ؟؟؟

لا انصح بموضوع الامضاء علي وصل امانه

الحوار دة اتعرض عليا من ييجي 4 سنين بس بصراحة المرتب كان قليل عن كدة لانه كان في الاقاليم مش القاهرو
وبصراحة موضوع ايضال الامانة دة هو اللي خلاني رفضت لاني من اكتر الناس اللي بعارض موضوع اني امضي لاي حد علي ايصالات امانة
محدش ياعم يضمن اي حد في الزمن دة وممكن في اي خلاف مستقبلا يشغاني عندة عبد او يمكسني من ايدي اللي بتوجعني والناس اليومين دول مش مصمونين
صلي استخارة وحاول تسأل حد يكون شغال في المجال دة قبل كدة وربنا يكرمك بالاحسن ان شاء الله

كله الا وصل الامانه . قوله ممكن امضى على شرط جزائى فى العقد لكن وصل امانه لالالا

لو شركه كبيره وسمعتها كويس توكل على الله

انت مش عاوز تقول اسم الشركة ليه ؟
ممكن تبقى معروفة لحد هنا او فى حد اتعامل معاها يقدر يقيدك
ولا خايف حد يخطف منك الشغل ( بهزر طبعا )
اسال الناس اللى شغاله هناك عن موضوع ايصال الامانه ده وشوف هيقولولك ايه
يعنى الناس اصحاب الشغل محترمين ولا لا ؟
بالتوفيق

انا شخصياً لو عرفت اسم الشركة هروح اقدم واخطف الوظيفة

بلا هندسة بلا بتاع ياعم

طيب انتا اية عرفك انك ممكن تعمل 8 اوردارات في اليوم ..اعتقد دا شيء صعب جدا خصوصا لو عميل خارج القاهرة او عميل في مكان بعيد مع الزحمة ....يعني انتا احسبها كويس


موضوع إصال الامانة دا مش كويس ابدا ....في طرق تانية يضمن بيها حقة ...منها مثلا انك وانتا بتستلم الاوردر بتوقع على الاستلام وصورة الفاتورة وعليها صورة البطاقة ( طبعا بيكون صيغه معروفة زي نموذج كدا بتوقع عليه وانتا واخد البضاعة ..وبعد ما تستلم الفلوس من العميل وترجع الشركة بتاخد اصل النموذج وتسلمهم الفلوس )

نطاق شغلك القاهرة ولا فى محافظات وسفر؟؟
مين اللى يوفر العربية او الانتقالات انت ولا الشركة؟؟

شركات كبيره جدا بتمضى على وصل امانه

مفيش شركة أدوية او أجهزة طبية كبيرة و بتمضي على ايصالات

ده غير ان مفيش شركة كبيرة بتعين حد بأجر يومي .. المفروض أجر شهري

اسأل كويس في الموضوع

الشركة هي شركة إس اتش فارما سعيد بتاعة سعيد حساسين للناس اللي بتقول حد يآخد الوظيفة يعني !!

وأنا عرضت عليه يقلل المبلغ شوية قالي هو ده نظام الشركة

هي فرعها الرئيسي ف القاهرة وأنا هروح أديهم ورقي وهمضي ف القاهرة وهشتغل ف فرع بنها !

مش معايا عربية والمواصلات عليا !

أنا سألت ف موضوع وصل الأمانة ده لقيت كل الناس ف أي شركة بتمضي وعلى أضعاف اضعاف المبلغ ده !!

بس ياترى حد اشتغل ف فرع من فروع سعيد حساسين قبل كدة يقولنا على مميزاتها وعيوبها !

باشا انت بتقول شركه كبيره و ليها سمعه، وصل الامانه ده علشان حيديك بضاعه توصلها يعني بيضمن حقه مش اكتر
توكل علي الله و الموضوع عادي جدا و ربنا يوفقك

لو هتمضى على وصل الامانه
اساله انت لو حصل وحبيت تمشى فى اى وقت
هيبقى الوصل موقفه ايه
ولو تعرف تسال اى موظف جوه يبقى تمام

ليا واحد صاحبى محامى كان انه ممكن فى نفس اليوم اللى تمضى فيه وصل الامانه تروح تعمل محضر بالواقعه فى القسم وده تقريبا بيحميك من الوصل اللى مضيته لانه بيثبت انك مستلمتش المبلغ ده على سبيل الامانه والافضل انك تسأل محامى عشان لوفى حاجه فى كلامى مش صحيحه
وبالتوفيق ان شاء الله

انا مش قصدي اخوفك من الشغل او اضايقك

و لكن للتذكير

الشركة مش كبيرة و لا حاجة .. على العكس الراجل ده بيطلع ينصب على الناس في التلفزيون

شركته هتبقى زيه

ربنا يوفقك لما فيه مصلحتك

اقتباس:

---

المشاركة الأصلية كتبت بواسطة mahmoud naguib

الشركة هي شركة إس اتش فارما سعيد بتاعة سعيد حساسين للناس اللي بتقول حد يآخد الوظيفة يعني !!

وأنا عرضت عليه يقلل المبلغ شوية قالي هو ده نظام الشركة

هي فرعها الرئيسي ف القاهرة وأنا هروح أديهم ورقي وهمضي ف القاهرة وهشتغل ف فرع بنها !

مش معايا عربية والمواصلات عليا !

أنا سألت ف موضوع وصل الأمانة ده لقيت كل الناس ف أي شركة بتمضي وعلى أضعاف اضعاف المبلغ ده !!

بس ياترى حد اشتغل ف فرع من فروع سعيد حساسين قبل كدة يقولنا على مميزاتها وعيوبها !

---

بنها بلد 100% ومش كبيرة بالنسبة للمواصلات هتلاقيها ضعيفة ومش غاليه هناك
بس في نفس الوقت البلد صغيره وحوار انك تعمل 8 اوردر في اليوم هيكون نسبته ضعيفة
راجع امورك مرة تانية
وصلي صلاة استخارة واتكل علي الله

أولا الشركة مش محترمة و لا حاجة و معروف انها نصب و صاحبها بيستغل جهل البسطاء و بيبعلهم الوهم.

ثانيا مين اللي قال انك حتعمل متوسط 8 أوردرات في اليوم؟؟ هل المدير و لا ناس شغالين معاهم نفس الوظيفة و لا ده افتراض من حضرتك؟؟ الرقم كبير و مش واقعي في وجهة نظري.

ثالثا هو قالك حتاخد 15 جنيه على الاوردر و لو العميل أداك حاجة (واضح انه المقصود بقشيش يعني) تبقى ليك, بناء على ايه أفترضت ان متوسط الاوردر 30 جنيه؟؟ يمكن واحد يديك جنيه و يمكن واحد يديك خمسة و يمكن واحد ميديكش بقشيش خالص. لو عايز تحسب تحسب على ال15 جنيه المضمونة بس.

رابعا لما تحسب المفروض تحسب الاوردر ب15 جنيه (لأنك مش ضامن أي زيادة زي ما قلنا) و تضرب في عدد أوردات اليوم و تضرب في 25 يوم بس مش تلاتين, و لا انت مش حتاخد أجازة أسبوعية؟؟ حتلاقي المبلغ بعد خصم المواصلات أقل من نص اللي انت حاسبه, ده لو عملت 8 أوردرات في اليوم مش أقل.

خامسا حتى لو الشركة عايزة تضمن انك متهربش بالحاجة الطبيعي انك بتمضي استلام على الحاجة دي و بتورد الفلوس بايصالات يعني ممكن لو هربت يرفعوا عليك قضية تبديد أمانة. انما موضوع وصل الأمانة ده أسلوب حقير في التعامل و يخليك تحت رحمتهم لو حبيت تمشي

فكر كويس و أستخير ربنا لأن الموضوع مش لقطة زي ما انت فاكر

أنا فكرت ولقيت إن الموضوع فاكس لأسباب كتيرة فعلا !!

بس الواحد تعب من كتر ما هو مش لآقي فرصة كويسة وبيحاول يشوف أي حاجة !!

بص يا باشا
انا كنت اشتغلت في حاجه زي كده زمان
بالنسبه لوصل الامانه متعتلش همه لان اكبر شركات التسويق والمناديب بتعمل كده.. كل واحد بيضمن حقه في ظل الجو المهبب اللي عايشين فيه
تمام
بالنسبه للاردرات : ودي تحت تحتها ١٠٠ خط ليه

٨ اردرات دا رقم كبير انك تعمل في يوم واحد قيسها كده ٨ مشاوير في يوم هتلاقيها صعبه ونادرا لما تاخد ٨اردرات
هيعدي عليك،يوم هتعمل فيه اردر واحد او اثنين وايام هيقول لك مفيش اردرات النهارده لانك غالبا بتكون ماسك،منطقه معينه لو حد طلب بتودي الاوردر محدش طلب خلاص وهو مش خسران حاجه ولا انت فارق معاه من الاساس
ليه : خد بالك علشان الحته اللي جايه دي مهمه

انت دلرقت اخذت اردر ثمنه ١٠٠ جنيه بتلاقي الرسيت اللي يتديه للعميل بمبلغ ١٠٠+ ١٥ جنيه مصارف شحن او توصيل اواي مسمي
يبقي ال ١٥ جنيه هيكون اولك واخرك دا لو مقسمكش فيه دا غير الاوردرات المضروبه يعني تدب المشوار وتسال علي فلان يقول الناس مفيش حد هنا بالاسمدا
وعلي فكره محدش بيدي بقشيش لان اغلب الناس اللي بتتصل ناس غلابه وبسطاء
والله هيجي عليك،ناس هتبقي عاوز تسيب لهم الفلوس من الحال اللي هم فيه

نسيت اقول لك مبلغ ١٥ جنيه قليل جدا
انا كنت شغال من حوالي ٦ سنوات الاردر كان من ٢٠_ ٣٠ جنيه
وكان معايا عربيه شغال بيها وماسك منطقه الهرم وفيصل واكتوبر وكان اخري ٦ اوردات في اليوم

أعرف شركة تخليص جمركي صاحبها كان بيمضي اللي شغالين على إيصالات أمانة ولما حبوا يسيبوا الشركة علشان بتقع ومبقتش شغالة ومفيش فلوس وجالهم فرص عمل برة أفضل الراجل كان بيلوي دراعهم بإيصالات الأمانة ومكنش راضي يخليهم يمشوا واللي مشي بالغصب رفع عليهم الإيصالات وممكن يكون خد أحكام عليهم
نصيحة بلاش تخلي نفسك تحت رحمة حد علشان في ناس مبترحمش ومش بيهمها تدمر مستقبل أي حد وتحبسه ويا ما في السجون ناس محبوسة ظلم بسبب حوارات زي دي ربنا يعافينا ويعافيك والسامعين

اى مندوب بيمضى على وصلات امانة مش تقلق من دى
اول شغلانة اشتغلتها كانت مندوب شركة ادوية تعبانة لسة فاتحة من اسبوع
مضيت على 40 الف والشركة قفلت بعد اسبوع بالظبط وخدت الوصلات عادى
تانى شغلانة مندوب فى توكيل كبير فى الهرم بياخد توكيلات الشركات زى ملكانا وامريكانا وكدة
وكنت ماضى على وصل ب80 الف وكان مرتبي اصلا 1000 جنية وسبتها بعد 3 شهور وخدت الوصلات عادى
شركة نستلة مثلا بتمضى على وصل بحوالى ربع مليون جنية
وفى شركات بتمضى على بياض على فكرة فدى مش تقلق منها طالما الشركة معروفة وليها سمعه
جرب اشتغل اسبوعين خصوصا انك مش هتنزل تلف ولا تتعب وتصرف مواصلات
لو الحال عجبك اوكى لو مش عجبك قدم استقالتك وخد وصلاتك وامشى