مندوب مبيعات بــ 6000 ف الشهر

**Mahmoud Naguib** · 14-01-2015 12:52 AM

أنا كالعادة يعني بدور على شغل من فترة ولقيت شركة شغالة ف المنتجات الطبية ومشهورة جدا عايزة مناديب

رحت أستفسر مدير الفرع قعد معايا وقالي الشغل عبارة عن إنك بتشتغل مندوب تسليم مش مبيعات
يعني من الفرع الرئيسي بيجيلنا فواتير وناس طالبة منتجات إنت بتاخد المنتجات وتروح للناس دي !

على كل منتج هسلمه هاخد 15 جنيه غير اللي هاخده من العميل هيبقى ليا برضه وهاخد الفلوس ف يومها وأنا ماشي مش هتسنى لآخر الشهر

يعني لو عملت 8 أوردرات ف متوسط الأوردر 30 جنيه مع شيل حق المواصلات هنقول هيتبقى 200 جنيه دول ليا !!

حتى لو 6 أوردرات أو 5 هيبقى مرتب كبير برضه !!

لحد هنا كويس !

هما عندهم نظام بمضي على وصل أمانة علشان يضمنوا إني مآخدش المنتجات واخلع قيمته 25000 جنيه !!

هي الشركة كبيرة وسمعتها معروفة ومنظمة جدا

إي رأيكم أقبل ولآ لآ ؟!؟!

**eng.m7md.ali** · 14-01-2015 02:03 AM

انا شايف ان في ظل الظروف المنيلة بنيلة دي الشغل ده تمام .. لو منك اقبله

**Mahmoud Naguib** · 14-01-2015 03:07 AM

طب وحوار وصل الأمانة ده ممكن يلاعبني بيه ولآ هو حقه !!

**Bassem Youssef** · 14-01-2015 10:09 AM

شغل كمندوب تسليم و ليس مبيعات زي الفل و المرتب زي الفل

بص لاحظ انك هتفضل تلف طول اليوم

هو الشغل من كام لكام ؟؟؟

لا انصح بموضوع الامضاء علي وصل امانه

**Haitham Gamal** · 14-01-2015 10:17 AM

الحوار دة اتعرض عليا من ييجي 4 سنين بس بصراحة المرتب كان قليل عن كدة لانه كان في الاقاليم مش القاهرو
وبصراحة موضوع ايضال الامانة دة هو اللي خلاني رفضت لاني من اكتر الناس اللي بعارض موضوع اني امضي لاي حد علي ايصالات امانة
محدش ياعم يضمن اي حد في الزمن دة وممكن في اي خلاف مستقبلا يشغاني عندة عبد او يمكسني من ايدي اللي بتوجعني والناس اليومين دول مش مصمونين
صلي استخارة وحاول تسأل حد يكون شغال في المجال دة قبل كدة وربنا يكرمك بالاحسن ان شاء الله

**ahmedfathi** · 14-01-2015 10:36 AM

كله الا وصل الامانه . قوله ممكن امضى على شرط جزائى فى العقد لكن وصل امانه لالالا

**احمد المصرى** · 14-01-2015 11:08 AM

لو شركه كبيره وسمعتها كويس توكل على الله

**eng.m7md.ali** · 14-01-2015 11:12 AM

انا شخصياً لو عرفت اسم الشركة هروح اقدم واخطف الوظيفة

بلا هندسة بلا بتاع ياعم

**حسام الغرباوي** · 14-01-2015 11:21 AM

طيب انتا اية عرفك انك ممكن تعمل 8 اوردارات في اليوم ..اعتقد دا شيء صعب جدا خصوصا لو عميل خارج القاهرة او عميل في مكان بعيد مع الزحمة ....يعني انتا احسبها كويس

موضوع إصال الامانة دا مش كويس ابدا ....في طرق تانية يضمن بيها حقة ...منها مثلا انك وانتا بتستلم الاوردر بتوقع على الاستلام وصورة الفاتورة وعليها صورة البطاقة ( طبعا بيكون صيغه معروفة زي نموذج كدا بتوقع عليه وانتا واخد البضاعة ..وبعد ما تستلم الفلوس من العميل وترجع الشركة بتاخد اصل النموذج وتسلمهم الفلوس )