بسم الله الرحمن الرحيم
السلام عليكم و رحمة الله و بركاته

تقرير عن صيانة الـ1000 فرع العبور رينو لوجان 2 + تغيير مساعد في الضمان

بداية حجزت لصيانة الـ1000 الاسبوع اللي فات و مكنش فيه يوم غير التلات و كان ده كارثة بالنسبة ليا عشان الشغ
المهم توجهت للتوكيل الصبح عقبال ما وصل للتوكيل كانت الساعة 11:30 تقريبا دخلت سجلوا العربية و الاستقبال كان كويس جدااا من اول تسجيل العربية و الانتظار للتسجيل امر الشغل و كنت رايح بعدة مشاكل ظهرت معايا من ساعة ما استلمت العربية و هي كالآتي :
- تنفيس من الشكمان
- طقطقة في المطبات من الشمال و كأن مفيش عفشة اصلا قدام
- خبطة في الشنطة ورا مع المطبات
- زنة مسموعة في التابلوه في الجزء اليمين

المهم طلع معايا م \ فؤاد و وجد فعلا كل المشاكل ديه ماعدا الطقطقة مظهرتش اوي غير لما اخدنا اول مطب لكن قالي هنبص عليها برده للتأكيد
المهم رجعنا و أكد ع الحاجات اللي في العربية و علم عليها في امر الشغل و هيتم حل كل المشاكل ديه بالاضافة لصيانة الـ1000 و هي تغيير زيت و فلتر زيت و تربيط عفشة و كشف سوائل و هكذا و ابلغوني هخلص الساعة 2:30 و ديه كانت كارثة و يا ريتها كانت الكارثة الوحيدة و انتظرت في الاستراحة و شوفت الفني بيجرب العربية
و الوقت بيعدي قولت ادخل اسال ع اسعار قطع الغيار و لقيت الاسعار معقولة للعربية بالنسبة لتوكيل المهم لقيت العربية طلعوا 2 فنيين يجربوها تاني بدأت اقلق قولت جايز بيأكدوا و الساعة جت 2:30 و لسه العربية مخلصتش و لقيت المرة ديه م \ بهجت طالع بيجرب العربية بنفسه مع الفنيين كده قلقت بقي قولت شكل فيه مصيبة روحت اسأل ابلغوني بحل كل المشاكل ماعدا الطقة و السبب المساعد الشمال قدام فيه عيب صناعة و هيتغير حالا في الضمان و مضيت ورقة الضمان و قالي في اقل من ساعة و كان الفني بالفعل بدأ يحل المساعد القديم اول ما اكتشفوا الموضوع و بعد حوالي ساعة كانوا طالعين يجربوا العربية و ابلغوني استلم
بداية فحصت العربية و راجعت ع السوائل طبعا انا مشوفتش المساعد الجديد و هو بيركب بس بصيت ع الحالي لقيت الفرق بين المساعدين واحد جديد و واحد قديم و طلعوا جربوا معايا مرة
تقريري عن العربية اختفاء المشاكل اللي واجهتها ماعدا التنفيس من الشكمان و ابلغوني انها هتتحل بعد 20,000 ك لتكون الكربون في العلبة و هيختفي الصوت ده بالرغم اني مش مقتنع لكن هفضل وراه لحد ما اشوف حله
صوت الموتور هدي عن الأول بس برده مش حاسس بانه الاداء اللي هو و بالتالي هستني بعد 3000 ك حسب ما الدليل بيقول ان افضل اداء للعربية بعد 3000 ك

و اخيرا سعيد بالتعامل مع التوكيل ده كأول تعامل ليا معاه من خلال رينو لوجان و انهم فضلوا يجربوا و مرضيوش العربية تمشي الا لما المشاكل تتحل و بالشكل اللي انا شوفته ده اديله من وجهة نظري 9\10 و الدرجة الناقصة ديه لشوية حاجات بسيطة محتاجة تتظبط زي عامل الوقت و اللي يعتبر سبب لي مشكلة في الشغل شوية و حاجات جانبية

و انتظروا تقارير اخري عن العربية

بالتوفيق للجميع ان شاء الله