العربيات مخبطة ليه كده ؟

**masrawy99** · 04-11-2008 09:03 PM

فى الحقيقة اخد بالى من ظاهرة موجودة فى العربيات الموجودة فى الشارع وجدت الاتى
ان 70 فى المائة ان لم يكن اكثر عربيات بها مشاكل مثل
اما خبطات فى الرفارف او البيبان او تجريح شديد للبوهية او اكصطدام مكسور او مطبق
او خبطات بسيطة مثل خبطات حوالى خمسة سنتى فى امان متفركة من العربية او خرابيش
عمواما وجدت ان كثير من العربيات بها مشاكل وان العربيات اللى سليمة ليس بها اى خدش قليلة جدا
كان هذا على السيارات الملاكى
فمش عارف بصراحة ليه كده
والله الواحد بيبقى حزين جدا لما يجد سيارة زيرو او موديل سنة فاتت وفيها مشاكل كده
ما هى الاسباب اللى بتخلى العربيات توصل للمستوى ده
هل الاستهتار ؟
هل الغشومية؟
هل السرعات العالية؟
اليوم شفت عربية لادا بتاعة جيش راكب فيها عقيد وعسكرى سايق المهم العربية دخلت فى تاكسى وخبطته
الكلام ده كان عند جسر السويس امام شارع السباق
والطريق وقف والعسكرى والسائق بتاع التاكسجى قلع قميصة ونازل يتخانق والعقيد نزل وقالوا تعالى معى وانا اصلحهالك فى الورشة بتاعة الجيش والتكسجى مرضيش وخد فلوس بعد تفاوض والعسكرى يعيط ويقول للتكسجى هتحبسنى كده ابوس ايدك خلاص
وكانت مهزلة بمعنى الكلمة
فى الحقيقة انا شخص لا احب المشاكل ولا احب ان اوضع فى موقف مثل هذا
لكنى شعرت انك علشان تركب عربية وانا جديد على القيادة
لازم تكون مثل اللمبى
يعنى مطوتك فى جيبك سنجتك فى عربيتك واللى يقولك انتا خبط عربيتى قطعه
فوجدت الامر يا شباب مهزلة بكل ما تحمله الكلمة من معنى

**Samir Elshahawy** · 04-11-2008 10:21 PM

شوف ياسيدي الفاضل عربيتي موديل 2006 و 99.999 % من التجريح اللي فيها و الخبطات الصغيرة اللي في الابواب او الأكصدامات و هي واقفة في مكانها مع العلم كنت بسافر معظم شهور السنة و راكنها في الجراج , هاتقولي امال ايه اللي عمل فيها كده ؟؟ أقولك :
- واحد راكن جنبي و بيفتح باب عربيته بغشومية يقوم ايه خابط لي الباب و طبعا مجرحلي البوية
- عربية سايقاها واحدة ست بترجع لورا تروح داخلة في الاكصدام الامامي
- انزل من البيت مرة الاقي شنطة العربية مخبوطة من عربية نص نقل
- راكن في شارع و نازل اجيب حاجات و لسه بعدي الشارع الاقي واحد راكب عجلة و شايل عليها مواسير بالعرض و شادد خط علي صف العربيات اللي راكنة و منهم عربيتي
اقسم بالله مافي خبطة واحدة انا المسئول عنها و الا كنت لومت نفسي و ارتحت

انا خلاص اقتنعت ان البلد دي مش ممكن الواحد يركب فيها عربية نظيفة و غالية

**waleedrahmy** · 04-11-2008 10:29 PM

انا خلاص اقتنعت ان البلد دي مش ممكن الواحد يركب فيها عربية نظيفة و غالية

هو ده الكلام المضبوط بلدنا أخرها الحنطور بتاع زمان

**M.Osman** · 04-11-2008 10:30 PM

عربية سايقاها واحدة ست بترجع لورا تروح داخلة في الاكصدام الامامي

اقسم بالله واحدة زميلتى بتركن عربيتها كانت هتعمل مصيبة ...هههه
عمالة ترجع لورا لورا لورا ..ريحت عالعربية اللى كانت وراها .. ولسة محستش .. لسة كانت هتكمل كمان لولا انا كنت واقف ....صباح الخير! انتى نجحتى اززاي في امتحان السواقة يعنى ؟؟
>>> هههه ال يعنى الواد مش عارف !!

انا خلاص اقتنعت ان البلد دي مش ممكن الواحد يركب فيها عربية نظيفة و غالية

نفس الشعور ... الواحد بيبقى مرعوب و هو راكن عربيته فى الشارع

**dr_abooody** · 05-11-2008 12:14 AM

كل دة بسبب الزحمة و الطرق الضيقة

**ZIMOFOX** · 05-11-2008 12:20 AM

مش عارف بصراحة بحس ان كل عربية ليها برستيجها
يعنى لو شفت عربية بى ام دبليو راكنه فى الشارع 530i
مثلا
وفى نفس الوقت حطيت عربية مثلا على سبيل المثل (س) من العربيات الحديثه
الدرجة التانية
وتركتهم مثلا اسبوع
اراهنك ان مع الاحوال الطبيعية هتلاقى العربية (س) اكثر جروحا وتكحيتا من البى ام
فيه عربيات تخض وصاجها ماشاء الله تخاف منه
ربنا يوعدنا ويوعدكم

**Noha.M** · 05-11-2008 08:44 AM

عادى والله دة اليومين دول كمان تبقي شايف لعربية زيرووو و لسه واخدة نمر مؤقتة و بجد متخرشمة مش عاوزة هقولك الاكصدام مثلا ولا رفرف لا والله انا لسه شايفة مازدا 3 حمرا بكياسها و نمر مؤقتة و الباب الشمال بالرفرف متدغدغ والله و داخلين لجوة !!! و عادى جداااااا تبقي شايف عربيات زيرو ز اكصدامتها مخبطة ما انا عربيتي اهو متنيلة تحت و اكصدامها مطبق و الفانوس مكسر و داخل لجوة! عمرك شفت فانوس داخل لجوه ! عاااادى جداااااا :)

**جمال** · 05-11-2008 01:25 PM

انا عربيتى لسه مكملتش 3000 كم واتخبطت من كل حته و الفانوس الخلفى اتكسر ده غير الفن المسمارى على الشنطه , وكل ده وهى واقفه فى الشارع و مفيش منهم اى حاجة عملتها انا او حدثت و انا راكبها
واخيرا الونش رفعها و بهدلها من الامام و كسر الفانوسين الاماميين و طبق الكبوت وكسر الاكصدام واضطررت لتصليحها فى التوكيل وهتتكلف حوالى 4000 ج وبقالها اسبوعين فى التوكيل
الحمد لله على كل شىء