تجربه ايجابيه جدا مع كمبيوتر شوب وجوفي ترونيكس

السلام عليكم ورحمه الله
زي ما كتبت من شويه تجربتي السيئه جدا مع رايه شوب اونلاين ستور

بكتب عن كمبيوتر شوب الناس الفوق محترمين بتعامل معاهم من سنين وبشتري حاجتي منهم وانا مطمن
من سنتين ونص اشتريت ماوس
اه والنعمه ماوس وكان ضمانه 3 سنين وقعدنا نهرج انا والبياع وقتها وقالي ايوه 3 سنين عندنا مش عند الوكيل احنا اللي بنتعامل
الماوس كان لوجتيك لاني مبحبش امسك ماوس غير لوجيتيك عشان عضم ايدي
المهم من شهرين كه والكليك اليمين بيعلق ولازم اضربه جامد عشان يشتغل
ومتاقلم عادي
بقلب في الدولاب انزل حاجه لقيت علبه الماوس وفاتورته والضمان لسه لاخر السنه باين
الماوس مشتريه من 2012 وعدي سنتين وشويه بستعمله :-)
خدته نزلته وكان يوم اجازه اول يناير
وديتهلم قالي سيبه واستلمه مني فعلا بالعلبه والفاتوره
كلمتهم بعد اسبوعين قالي لسه مجاش رد الوكيل
كام يوم وكلموني ليك امر استبدال بنفس مبلغ الماوس
مكنتش مصدق نفسي
روحت ونقيت ماوس مايكروسوفت عشان مكنش فيه لوجتيك وكان ضمانه سنه واحده بس تبدء من النهارده
سالته في لوجتيك قالي في فرع تاني
قولتله عايزه حولي الفاتوره علي هناك
ورحت خد الماوس من هناك وكان فيه فرق موديل 16 جنيه دفعتهم
علما باني لو كنت خدت الميكروسوفت كنت هاخد فرق فلوس بعد السنين دي :-)
مكنتش مصدق نفسي اني في مصر بجد
وضمان الماوس ابتدي من النهارده 3 سنين تانين مش استكمال ضمان
ايشي خيال يا ناس وتحياتي لكمييوتر شوب وادارته

https://scontent-a-cdg.xx.fbcdn.net/...9b&oe=5527AC80

https://scontent-a-cdg.xx.fbcdn.net/...7f&oe=552D0EFB

بجد !!!!!!!!!!!!!!!!!!!!!!!!!!1

الاحترام له ناسه

هو سواء كمبيوتر شوب أو راديوشاك فالأتنين هايلين في خدمة ما بعد البيع و دي حاجة نادرة الوجود في مصر, بس في المقابل أسعارهم أعلى شوية و مفيش تنوع في الموديلات المتوفرة..

تجربه فريده جدا فعلا ، لان المعتاد مع التوكيلات في مصر العكس تماما ، وكلنا عندنا تجارب مأساويه مع منتجات باظت في الضمان ويكون الرد المعتاد ده سوء استخدام يا استاذ مش عيب في المنتج

ناس محترمه ويستحقوا الاشاده والدعايه المجانيه :-) لانهم فعلا نموذج محترم ونادر في مصر للأسف

كومبيوتر وموبايل شوب وراديو شاك من افضل الشركات في مصر في خدمة العملاء وخدمات ما بعد البيع
وعلى الرغم انهم اغلى شوية من برة بس حاجاتهم مضمونة جدا ومش ملعوب فيها تماما خاصة الموبايلات

من الشركات المحترمه اللي بتحاول تحافظ علي اسمها و يا رب يكملوا كده. انا حصلت معايا مواقف مشابهه مع راديو شاك ووايت ويل و ايديال استاندرد . في أمل ان شاء الله :)

توكيل ECS الخاص بالهاردات و منتجات Kingston و Samsung و Seagate بيتعامل بنفس الطريقه برضه و تجربتي معاهم دايما مرضيه جدا جدا ...

نفس الكلام ينطبق علي توكيل Gamma الخاص بمنتجات Gigabyte برضه فوق المحترم غيرولي كارت شاشه قبل كده و زودولي سنه في الضمان بتاعه مساواه بباقي المنتجات اللي هم وكيلها و علي الرغم من اللي معايا كان ضمان سنتين بس خلوهم تلاته علشان يبقي زيه زي باقي منتجاتهم اللي في السوق ...

كويس ان فى لسه حد محترم كدا...الواحد فقد مصدقية محلات كتير من بتوع البيع والشراء

سواء كمبيوتر شوب أو راديو شاك الاتنين قمة في الاحترام عن تجارب برده وفعلا هما أغلى من برة أحيانا بس في مقابل راحة البال
أنا كنت حكيت تجربة ليا عن شراء راوتر من محل تحت السلم في سوق العصر ومعرفتش أرجعه بعد ٣ أيام بس من الشراء علشان اكتشفت فيه عيب مش بيقرا السرعة كاملة ولحد دلوقتي مقدم شكوى في حماية المستهلك لكن في المقابل كنت اشتريت أكسس بوينت من راديو شاك ورجعته بعدها بكام يوم علشان معرفتش أستبه وفعلا رجعهولي واسترديت فلوسي كاملة ولا شافوا الأكسس ولا فتحوه أصلا ولا عرفوا المشكلة إيه بالضبط !
على فكرة يا كيمو أنا أحسن ماوس اشتريته في حياتي هو لوجيتيك m310 قريب أوي من اللي انت حاطط صورته ده بس للأسف دورت عليه هنا ملقيتوش لأني كنت شاريه من أمازون من فترة طويلة والسكرول بدأ يعلق عند الضغط عليه بس وبالرغم من إني اشتريت ماوسات بالعبيط أغلبها ميكروسوفت وآخرها واحد تمنه ٣٤٠ جنيه ! إلا إني مستريحتش في ماوس غير لوجيتيك ده وإن شاء الله ناوي أشتري واحد تاني من أمازون برده

لسه حاصلي كوقف مشابة مع t-p
اشتريت راوتر 3g مشتغلش
قولتلهم عاوز ابدله قالولي اخبط دماغك في الحيطه و ملكش حاجه عندنا و الضمان الي مكتوب علي العلبة ده حته استيكر ببريزه

هى الناس مستغربة ليه
الضمان بفلوس ومتعوض تمنه فى القطعه لو حاجه ب 15 ابيع ب 20 ولو باظت انا مأمن نفسى ولو مابظتش فشوف انا كسبت كام 5 من كام واحد
الكلام ده متجلى جدا فى فاتورة شراء العربيات الزيرو الضمان بمبلغ لوحده

ايوه العادي في مصر بتدفع حق الضمان ومبتاخدش حاجه

ابو اسر
معلومه سمعتها كتير مش متاكد من مصدرها
ان لوجتيك الي بيصممو الماوسات بتاعتهم دكاتره عظام وجراحات يد
عشان كدة بيراعو اقصى اجهاد على الايد بيحصل من الامساك بالماوس ساعات طويله

اقتباس:

---

المشاركة الأصلية كتبت بواسطة karim_monir

ايوه العادي في مصر بتدفع حق الضمان ومبتاخدش حاجه

ابو اسر
معلومه سمعتها كتير مش متاكد من مصدرها
ان لوجتيك الي بيصممو الماوسات بتاعتهم دكاتره عظام وجراحات يد
عشان كدة بيراعو اقصى اجهاد على الايد بيحصل من الامساك بالماوس ساعات طويله

---

ممكن تكون صحيحة لأن فعلا ماوساتهم تحس فيها براحة وتناسق مع الإيد
أما ميكروسوفت فأكيد اللي بيصمملهم الماوسات بتاعتهم دكتور بيطري لأني جربت يمكن أكتر من ٥ أو ٦ ماوسات من عندهم كبير وصغير رخيص وغالي بسلك وبدون ولا واحد منهم ريحني على الرغم من الكواليتي العالية والشكل الفخم والسعر المرتفع لكن فعلا مستريحتش في ولا واحد !

بكام يا استاذ كريم الماوس ده ؟

اقتباس:

---

المشاركة الأصلية كتبت بواسطة karim_monir

ايوه العادي في مصر بتدفع حق الضمان ومبتاخدش حاجه

---

اى مكان محترم معروف انه اغلى من السوق بمراحل واللى معاه هيشترى وبالتالى فيه ضمان محترم.

أستاذ كريم .. بالرغم من تعجبى الشديد لوجود هذا النموذج من إحترام حقوق المستهلك فى مصر فى ظل ثقافة الشعار القائل "البضاعة المباعة لا ترد ولا تستبدل" إلا أننى أندهش أكثر لغباء معظم التوكيلات والتجار - إلا قليل منهم - لعدم تبنيهم سياسة رضاء العميل التام ، وحقه فى إرجاع وإستبدال السلعة لأى سبب .. طبعاً دعك من تلك القصاصة الورقية الموضوعة ببرواز فى مدخل معظم المحال المتضمنة حق المشترى فى إستبدال السلعة فى خلال 14 يوم من تاريخ الشراء لأنها موضوعة فقط بقوة القانون ، لأن عند التطبيق يجد البائع مليون مبرر وسبب لرفض رد أو إستبدال السلعة من باب الفهلوة والضحك على الزبون "وإللى مش عاجبه يضرب دماغه فى الحيط" ، مع أن ذلك قمة الغباء وقصر النظر .. لأننى شخصياً ممكن أدخل المحل مرة واحدة ولا أكررها بسبب رفضه قبول رد السلعة لوجود عيب فيها ورفضه رد الثمن وفى أحسن الأحوال يطلب شراء أى سلعة أخرى بنفس القيمة حتى وإن كنت فى غير حاجة لها . نفس سياسة البائع المتجول "بيع وإجرى" .


فكرتنى حكايتك بحكاية قديمة من زماااان حدثت لصديق لى عندما كان فى زيارة للسويد فى ضيافة صديق له متزوج ومقيم هناك .


فى يوم من الأيام خرج مع صديقه وزوجة صديقه فى جولة للتسوق بدأت بالمرور على أحد المحلات حيث رغبت زوجة صديقه فى إعادة بنطلون جينز للمحل وهى مستاءة جداً لظهور عيب صغير فى النسيج لم يظهر عند الشراء ولكنه ظهر بعد إستعمال ولبس وغسيل لمدة 6 شهور !! نعم .. ستة شهووووور !! ولاحظ مرة أخرى أن البنطلون جينز .. أى أنه بطبيعته بنطلون خدمة شاقة وبهدلة!!
تأكد فى نفس صديقى عند دخوله المحل أنه سيشهد خناقة سيضطر معها للتدخل السريع للدفاع طبعاً عن صديقه وزوجته .. إلا أنه وقف مذهولاً وهو يشاهد مدير المحل يتقدم بكل كلمات الإعتذار وطلب الصفح عن هذا الخطأ الغيرمقصود وطلب بدون تردد وبمنتهى الأدب من السيدة أن تختار أى شىء بالمحل كبديل عن البنطلون إن رغبت ولكنها لم تجد مايناسبها فطلبت إعطائها كوبون بقيمة البنطلون المرتجع لتعود فى أى وقت للمحل حين ورود ماتريده !!


إنتهت قصة البنطلون الجينز المستعمل لمدة ستة شهور ، ومع إنبهار وإندهاش صديقى بما رآه بعينيه لأول مرة فى حياته أعجب ببنطلون فى نفس المحل وقرر شراؤه وأخذ يقلب البنطلون بعينه بكل حرص حتى يتلافى وجود أى عيب فهو عائد إلى مصر ويستحيل إعادة البنطلون .
لاحظ مدير المحل تفحص صديقى للبنطلون فطلب من صديقى بمنتهى الأدب ألا يتردد فى العودة للمحل لرده فى حالة عدم رضائه .. فرد صديقى أن ذلك غير ممكن حيث أنه غير مقيم بالسويد وسيعود إلى مصر قريباً فرد مدير المحل بلهجة جادة لا تخلو من الإندهاش : "ولماذا غير ممكن ؟! تستطيع فى أى وقت أن ترسله لنا بطرد بريدى وسنرسل لك بديله فوراً لعنوانك مع تحملنا كل المصروفات" .


إندهشت وللا لسه ؟؟!!


على فكرة .. حدثت وقائع تلك القصة أواخر ثمانينيات القرن الماضى !!
تخيل معى مدى رضاء زبائن ذلك المحل وإرتباطهم به والدعاية التى حصل عليها طوال السنين الماضية .. والثمن بنطلون .

اقتباس:

---

المشاركة الأصلية كتبت بواسطة heeshooheeshoo

أستاذ كريم .. بالرغم من تعجبى الشديد لوجود هذا النموذج من إحترام حقوق المستهلك فى مصر فى ظل ثقافة الشعار القائل "البضاعة المباعة لا ترد ولا تستبدل" إلا أننى أندهش أكثر لغباء معظم التوكيلات والتجار - إلا قليل منهم - لعدم تبنيهم سياسة رضاء العميل التام ، وحقه فى إرجاع وإستبدال السلعة لأى سبب .. طبعاً دعك من تلك القصاصة الورقية الموضوعة ببرواز فى مدخل معظم المحال المتضمنة حق المشترى فى إستبدال السلعة فى خلال 14 يوم من تاريخ الشراء لأنها موضوعة فقط بقوة القانون ، لأن عند التطبيق يجد البائع مليون مبرر وسبب لرفض رد أو إستبدال السلعة من باب الفهلوة والضحك على الزبون "وإللى مش عاجبه يضرب دماغه فى الحيط" ، مع أن ذلك قمة الغباء وقصر النظر .. لأننى شخصياً ممكن أدخل المحل مرة واحدة ولا أكررها بسبب رفضه قبول رد السلعة لوجود عيب فيها ورفضه رد الثمن وفى أحسن الأحوال يطلب شراء أى سلعة أخرى بنفس القيمة حتى وإن كنت فى غير حاجة لها . نفس سياسة البائع المتجول "بيع وإجرى" .


فكرتنى حكايتك بحكاية قديمة من زماااان حدثت لصديق لى عندما كان فى زيارة للسويد فى ضيافة صديق له متزوج ومقيم هناك .


فى يوم من الأيام خرج مع صديقه وزوجة صديقه فى جولة للتسوق بدأت بالمرور على أحد المحلات حيث رغبت زوجة صديقه فى إعادة بنطلون جينز للمحل وهى مستاءة جداً لظهور عيب صغير فى النسيج لم يظهر عند الشراء ولكنه ظهر بعد إستعمال ولبس وغسيل لمدة 6 شهور !! نعم .. ستة شهووووور !! ولاحظ مرة أخرى أن البنطلون جينز .. أى أنه بطبيعته بنطلون خدمة شاقة وبهدلة!!
تأكد فى نفس صديقى عند دخوله المحل أنه سيشهد خناقة سيضطر معها للتدخل السريع للدفاع طبعاً عن صديقه وزوجته .. إلا أنه وقف مذهولاً وهو يشاهد مدير المحل يتقدم بكل كلمات الإعتذار وطلب الصفح عن هذا الخطأ الغيرمقصود وطلب بدون تردد وبمنتهى الأدب من السيدة أن تختار أى شىء بالمحل كبديل عن البنطلون إن رغبت ولكنها لم تجد مايناسبها فطلبت إعطائها كوبون بقيمة البنطلون المرتجع لتعود فى أى وقت للمحل حين ورود ماتريده !!


إنتهت قصة البنطلون الجينز المستعمل لمدة ستة شهور ، ومع إنبهار وإندهاش صديقى بما رآه بعينيه لأول مرة فى حياته أعجب ببنطلون فى نفس المحل وقرر شراؤه وأخذ يقلب البنطلون بعينه بكل حرص حتى يتلافى وجود أى عيب فهو عائد إلى مصر ويستحيل إعادة البنطلون .
لاحظ مدير المحل تفحص صديقى للبنطلون فطلب من صديقى بمنتهى الأدب ألا يتردد فى العودة للمحل لرده فى حالة عدم رضائه .. فرد صديقى أن ذلك غير ممكن حيث أنه غير مقيم بالسويد وسيعود إلى مصر قريباً فرد مدير المحل بلهجة جادة لا تخلو من الإندهاش : "ولماذا غير ممكن ؟! تستطيع فى أى وقت أن ترسله لنا بطرد بريدى وسنرسل لك بديله فوراً لعنوانك مع تحملنا كل المصروفات" .


إندهشت وللا لسه ؟؟!!


على فكرة .. حدثت وقائع تلك القصة أواخر ثمانينيات القرن الماضى !!
تخيل معى مدى رضاء زبائن ذلك المحل وإرتباطهم به والدعاية التى حصل عليها طوال السنين الماضية .. والثمن بنطلون .

---

السلام عليكم

بعد قراءة التعليق الخاص بحضرتك أدركت لماذا يصنف شعب السويد من ضمن أسعد شعوب الأرض

و في نفس الوقت إنتابني الحزن علي ما يعانيه المصريين من معامله لا تليق :beatdeadhorse5:

و أعتقد أن ما قام به أ.كريم و غيره من الأعضاء من ذكر للتجارب الجيده مع الأماكن المميزه في خدمه عملائها هو وسيله جيده قد تدفع هؤلاء لمواصله الخدمه الجيده و غيرهم لتحسين مستوي الخدمه

جزاكم الله خيرا

والله شئ محترم منهم جدا
اهم شئ الضمان حقيقي مش ورقة

كتير جدا سعره :shyy::U_thin1[1]:

متفكرنيش بالسويد لاني بتعامل مع موردين في السويد ضمن 15 مورد علي مستوى العالم منهم دول اوربيه عظمى زي المانيا وفرنسا
اقد اقولك السويد حاجه تانيه غير كل دول :-)


ابو اسر
انا فوق العشر سنين مبستعملش غير لوجتيك ماوسات وفعلا مريحين جدا جدا
الماوس القديم ب 169 والجديد ب 185 جنيه
وماوسات اللوجتيك بقت قليله في السوق قوي ومنصحكش تجيب مايكروسوفت فعلا كله هجص

http://www.game-debate.com/mouse/mo_...tech%20M-BT96A
وأنا بقرأ الموضوع بانبهار شديد ..ببص على الماوس استعمال الخارج اللي أنا شاريه ب 15 جنيه أشوف ماركته إيه ... لقيته لوجيت ده اللي انتم بتتكلمو عليه هو هو اللي فوق ده ... عينيه دمعت من كتر السعادة والاندهاش ... ده أنا هاروح للراجل النهارده أشتري كمان اثنين ثلاثة