يوم الاتنين 3 نوفمبر بداء مشروع تسقيط الموتور ال1600 فى عربية ايهاب بوب
العربية جاية اصلا من ايطاليا و هى جوليت كوبية و فيها موتور 1350 سى سى 75 حصان... طبعا موتور مريض بكل الامراض المزمنة و المستعصية و ملوش اى لزمة
اتقابلت انا و ايهاب يوم الاتنين و رحنا لعبدة و بداءنا الاتفاق... اتجهنا بعد كدة على ابو هاشم و اتفقنا على المكنة بفتيسها و جنبين امامى عشان تعدبلة الفرامل ( اللانوس ال 1350 فيها نفس فرامل ال 1500 اللى هى مريضة اكتر من الموتور ال 1350)
و بعد الاتفاق على الماكينة اتجهنا الى الورشة و شيلنا الموتور ال 1350 و فضينا الحوض و جهزناه لاستقبال ال 1600
امبارح جبنا الماكينة ال 1600 و ركبنا عليها ضفيرة العربية الاصلية و غيرنا سير الكاتينة و البوجيهات و سلوك البوجيهات الخ الخ... و الحمد لله كلة ركب تمام... احتاجنا بس نطول سلك حساس الشكمان لان الحساس فى الجنب اليمين من الفرن و المكنة ال 1350 حساسها فى الشمال
بعد كدة ربنا كرمنا و سقطنا المكنة فى الحوض و نزلت مسطرة بدون اى مشاكل و الحمد لله بس الساعة كانت بقت 12 بليل و الكل جاب جاز من الشغل فا قررنا نكمل النهاردة باذن الله و كدة يبقى فاضل توصيلات الفاكيوم و تركيب الرادياتير و البطارية و الحاجات الفكة اللى حوالين الموتور
ربنا يكرم و ييسر لينا الحال و ندور المكنة النهاردة باذن الله عشان نتطمن على المكنة و نعرف اخبارها ايه.... انتظروا باقى التقارير ان شاء الله
الدعوة مفتوحة للى عايز يجيى يبص بصة (يبص بس... محدش حيسوق )
MMamdouh
المفضلات