خصائص السنتر لوك الخاص بالكليو الفول أوبشن

**عمرو عمارة** · 05-11-2008 12:14 PM

السلام عليكم

أنا حبيت أشارك معاكم بعض الخصائص المميزة للسنتر لوك الخاص بالكليو الفول أوبشن والي إكتشفته على مدار سنة ونصف من قيادة العربية والتي لم أجدها في أي سيارة أخرى في فئتها أو أعلى ( على حد علمي )

طبعاً أول حاجة لازم تعرفوها إن نظام السنتر ده متوصل بالـECU الخاص بالعريبة

الخصائص :

1- مع تشغيل السيارة وبداية السير تقفل جميع أبواب السيارة أوتوماتيكياً مع الشنطة عند الوصول لسرعة 10كم تقريباً ولن تُقفل في حالة وجود باب مفتوح أو شنطة السيارة مفتوحة.....يمكنك إلغاء هذه الخاصية بالضغط على زر السنتر الرئيسي من 5 لـ10 ثواني

2- عند الوقوف بالسيارة يمكنك فتح سنتر جميع الأبواب عند الخروج بفتح مقبد باب السواق أو الجانب له ( بشروط )

3- في أثناء السير يمكنك فتح بابك فقط وذلك بفتح المقبد يتم رفع اللوك الخاص ببابك فقط وعند القفل ينزل لوحده أيضاً

4- طيب على سبيل المثال واحد صاحبك ركب معاك من أول ما دورت العربية ونزل في وسط الطريق....والعربية وافقة قام فاتح الباب بتاعه....السنتر بتاع العربية كله بيفتح بما فيهم الشنطة ولما تتحرك تاني وتعدي الـ10كم السنتر كله يقفل تاني

5-خده بالكوا بقى عشان الحتة الي جاية دي عايزة تركيز شوية ....... طيب إفتراضاً وإنت ماشي حبيت تقف لواحد يركب معاك في الطريق وده بيحصل معاية كتير......أول ما تقف بتفتح السنتر كله من زر الفتح أمام الفتيس....الراجل ركب...الأبواب كلها قفلت تاني.....بعد ما وصلته لما جه ينزل ويفتح الباب بتاعه.....اللوك بتاع بابه فقط هو الي فتح وهو فقط الي قفل لما جيت تتحرك تاني......وصلت ولا لأ!!؟؟.....يعني كمبوطر العربية ( على رأي طارق ) بيفهم حالة فتح الباب الي جانبك من السكون أو بعد الحركة وبذلك بيدي الأوامر لأي سنتر يفتح

6- لو قدر الله وعملت حادثة السنتر كله بيفتح أوتوماتيك

عيوب النظام : من وجهة نظري موضوع إن الشنطة متوصلة مع السنتر والأبواب ده شىء مش ظريف لأني سعات بيبقى معاية بضاعة أو شنط وممكن أقعد في العربية أسخن شوية فلازم مانساش أفقل السنتر عشان ممكن حرامي يفتح بسرعة وينهب أي حاجة

ملوحظة أخيرة عايز أقولها خاصة بكاسيت السيارة الأصلي:...الكاسيت بيعلى ويوطى أوتوماتيكياً مع تخطي سرعة معينة أو النزول عنها ( نسبة من مستوى الصوت الي إنت عليه ) يعني مثلاً إنت عامل مستوى الصوت على 11 ولما تكون ماشي على 100كم/س مثلاً تلاقي صوت الكاسيت علي بدرجة بسيطة ملوحوظة من غير ما يغير في المستوي الي إنت ظبطه عليه ويرجع يوطى تاني أول ما سرعتك تقل

أي خصائص تانية إنتوا شايفنها ياريت تضفوها

تحياتي يا وحووووووووش

**Ramy_Tantawi** · 05-11-2008 12:28 PM

100 / 100 يا عمووور جزاكم الله خير يا باشا وربنا يكرمك كده وتفضل تكتشف وتشرح في خصائص وامكانيات كليوتك العزيزه ان شاء الله .

تحياتي يا باشا.

**أبو عبدالله** · 05-11-2008 01:36 PM

كلام جميل يا عمرو
وفعلا هو موضوع السنتر ده مميز في الكليو اونا كان مكان المفتاح بتاعه مش ظرف بالمره
ولكن هو امكانياته جميله
وعلى فكره في اجهزة انذار بس مش اللي متداولة في السوق
يعني سعرها اعلىشويه من اللي موجوده في السوق بيبقى فيها الأمكانيات دي
بس انت عارف السوق بيسترخص

نقطه بس موضوع السنتر والشنطة
أظن والله اعلم انه غالبا في كل الهاتشباك كده يا عمرو واكيد انت عارف ان السيريون كده برضه
يمكن علشان العربيه في الأساس هاتشباك فنفس التصميم ولم يعدل لكونها سيدان يعني
دي وجهة نظر ممكن

وربنا يباركلك يا عمرو

**Eslam_A** · 05-11-2008 01:47 PM

طريقة شرح رائعة الف شكر علي الموضوع الجميل والمعلومات المفيدة

بس للاسف انا مفيش عندي اي ميزة من المميزات دي في عربيتي مع انها فول اوبشن 1400 بس موديل 2001

**عمرو عمارة** · 05-11-2008 02:01 PM

المشاركة الأصلية كتبت بواسطة Eslam_A

طريقة شرح رائعة الف شكر علي الموضوع الجميل والمعلومات المفيدة

بس للاسف انا مفيش عندي اي ميزة من المميزات دي في عربيتي مع انها فول اوبشن 1400 بس موديل 2001

إسلام باشا إنت عربيتك الفوانيس الشكل القديم؟؟.....لو الشكل القديم بتكون موديل MK2 PH1 وده منزلش فيها الأوبشنز بتاعت السنتر أعلاه

الشكل الجديد إسمه MK2 PH2

**akmal_hamdi** · 05-11-2008 02:44 PM

تمام يا عمرو انا عربيتى فول اوبشن بس انا كنت عارف الحاجات دى علشان قرأت الكتالوج جيداً عند الشراء بس شكرا لعرضك علشان فى ناس كتير متعرفش الحاجات دى

**farahat** · 06-11-2008 12:10 AM

عرض رائع يا عمرو باشا و تحليل ظريف جداً لمميزات السنتر في الرينو
و يا ريت لو تأذن لي اني أضيف بعض المعلومات المتواضعة إلي عندي إلى موضوعك
العربيات الرينو فيها وحدة كمبيوتر تسمى Body controller (أو كمبيوتر جسم السيارة ) ، و دي وظفتها التحكم في كل خصائص الصالون و الإضاءة و الأبواب و المرايات .. عموماً ، و في الميجان فيها نفس الخصائص إلي حضرتك قلت عليها برضه بس بيزيد عليها شويت خصائص أخرى ذي :
- ممكن تخلي مفتاح واحد فقط هو إلي يفتح العربية كلها من المفتاحين بتوعها ، و المفتاح التاني مش بيفتح كل العربية و لكن يفتح باب السائق فقط (ميزة مهمة عشان لو هتسيب المفتاح في الجراج ولا حاجة )
-السنتر بيقفل الابواب و الشنطة و كمان تنك البنزين
- بعد ما العربية تقف في نهاية مشوار و تبطل ممكن تفتح و تقفل الزجاج الكهربا عادي لكن أول ما تفتح باب السواق ماينفعش تلعب تاني في الزجاج ، مش بس كدة ، ده بيفصل الكهربة عن كل أجزاء السيارة و يطفي النور تلقائي و الكاسيت (عشان لو نسيت أي حاجة شغالة ماتنيمش البطارية )
- خاصية التتبع (follow me home ) يعني انك تنور نور السيارة الأمامي لمدة من تلاتين ثانية إلى دقيقتين عشان ينور ليك الشارع لحد ما توصل البيت و بعدين يطفي تلقائي .
- في حالة الحوادث لا قدر الله برضه بيفتح الابواب و يقفل الشنطة و التنك عشان مفيش حاجة تتسرق و كمان بيشغل فلاشر التنبيه تلقائي عشان الناس تاخد بالها
- و طبعاً هو إلي بيتحكم في المرايات الكهربة و في قفلها و فتحها و رفع الزجاج بعد ما تقفل العربية
- غلق السنتر أوتوماتيك لو فتحت السنتر بالريموت و مفتحتش باب لمدة عشرين ثانية عشان يأمن العربييه تاني لو كنت فتحت بالغلط

أكيد دي مش كل حاجة في البودي كونترولر عشان مفيش ادامي منوال دلوقتي بس دي الحاجات إلي جت على بالي ، و حبيت اربطها بالمعلومات الجميلة إلي حضرتك قلتها
و أرجو من سعادتك يا عمرو باشا متكنش زعلت مني عشان اقحمت نفسي و معلوماتي على موضوعك ، و تقبل تحياتي لشخصك الكريم

**Sharky** · 06-11-2008 12:22 AM

كالعادة يا عمرو شرح رائع لخصائص الكليو الأخت الصغرى للميجان
إللى بتتميز بالعديد من الأوبشن غير موجود فى سيارات فئتها كعادة رينو فى سياراتها دائما

فرحات باشا إضافاتك متميزة دائما و تزيد الموضوع جمالا

**Michael_Lanos** · 06-11-2008 12:44 AM

حلو ، حلو خالص

**عمرو عمارة** · 06-11-2008 10:35 AM

فرحات باشا عيب عليك....!!!!.....تستأذن إيه وأزعل إيه....!!! يا كبير الموضوع موضوعك وإنت أستاذنا الكبير في الإلكترونيات

على فكرة يا باشا أنا جربت موضوع الـTest Mode عندي في الكليو ونجحت زي ما إنت قولتلي بضبط.....بس الأنوار كلها مانورتش زي الميجان كده

الموضوع: خصائص السنتر لوك الخاص بالكليو الفول أوبشن

LinkBack

أدوات الموضوع

عرض

خصائص السنتر لوك الخاص بالكليو الفول أوبشن - انشر الموضوع فى :

-

-

-

-

-

-

المواضيع المتشابهه

مشكلة في السنتر لوك الخاص بالفيرنا

فين الفول أوبشن يا جماعة؟؟؟؟؟؟؟؟؟؟؟؟

اللوجان الفول أوبشن

هل السيفك الفول أوبشن فيها فتحة سقف؟؟؟

كاسيت الياريس الفول أوبشن الأوتوماتيك

الكلمات الدلالية لهذا الموضوع

المفضلات

المفضلات

ضوابط المشاركة