الموضوع: تجاره الفوركس

بعد إذن الإداره انا حابب اعيد فتح الموضوع علشان نحذر ناس كتير من خساره ماديه ممكن يقعو فيها

بص يا سيدي الموضوع ده كبير و مش سهل مليان مخاطر, مغري بسبب التلوين الي بيعملوه له فالدعايه

دي مهنه مش سهله و علشان تنجح فيها حتحتاج تدرس و تشتغل فيها سنين زيها زي أي مهنه محترمه (الطيار مثلا بيحتاج تدريب 10000 ساعه قبل ما يطير لوحده) و هكذا (مفيش حد حيعلمك تنجح فيها إزاي لازم تعلم نفسك)

نتكلم بالإحصاء 90% من المضاربين بيخسرو 5% مش بيكسبو ولا بيخسرو و 5% بيكسبو (الأرقام دي مصدرها كانت كلام أكبر شركات الفوركس من حيث عدد العملاء, ممكن تضور عالنت عن معدلات ربح و خسارة مضاربين الفوركس)

مضارب ناجح كان عامل بوست على موقع مالي مشهور (مش شركة فوركس) و قال ان المضارب الناجح زي نجم روك الي العالم كله يعرفه و الي بيخسر زي مغني أي كلام صغير محدش يعرف عنه حاجه, في ما معناه لازم تبذل مجهود كبير علشان نتجج زي نجم الروك, تخيل انت بقه

المضاربه بتحتاج مهارات سيكلوجيه عشان تسيطر على نفسك و تصرفاتك فالسوق و مهارات إداره ماليه عشان متضيعش راس مالك و مهارات فنيه فتحليل السوق و تحديد انسب وقت و سعر للمضاربه و غيره - انت محتاج دراسه طويله و مخلصه عشان تنجح

لو ربنا كرمك بعد سنين مجهود و بقيت تعرف تضارب و تكسب حتحتاج مبلغ مش صغير علشان الأرباح تبقى أرقام مناسبه و موضوع الليفريدج (البروكر بيخليك تضارب بأضعاف فلوسك بس طبعا لو خسرت بتخسر أضعاف بردو) مش بيبقى بالشكل الحلو الي الإعلانات بتعمله هوا بإختصار حتعمل ليفريدج في حدود ضيقه قوي غير كده يبقى انت لسه مش فاهم حاجه فالسوق ده (زبون يعني) و حتخسر

كم الدعايه و تسهيلات فتح الحساب و الوعود بالثروه كل ده كلام فارغ و بروباجاندا علشان تعمل إيداع كمبتدأ و طبعا تبقى من ال90% الي بيخسرو

تاني كم الدعايه ده ملون و مزين كل تفصيله عشان يجر الناس إنها تعمل إيداعات, في ناس بتحسب انها فاهمه و بتكسب فعليا لمده و بعد كده تبدأ تخسر بدون توقف (حظ المبتدئين)

أعتقد ده يوضح شويه الموضوع و أنا موجود لأي إستفسار