لو عرضت عربيتي الألنترا للبيع بعد الحادثة هتجيب كام والأفضل أصلح ولا أبيع

السلام عليكم يا رجالة ... أنا في حيرة جامدة جداً :11: ....

http://imagizer.imageshack.us/v2/280...673/nULxUq.jpg

انا مش عارف أصلح عربيتي بعد ماعملت الحادثة ولا أبيعها على كدة وأستعوض ربنا وبقالي 8 أيام بسمع في كلام الناس لما دماغي ولعت :I_angr1[1]: اللي يقولي أطلع بورسعيد واللي يقولي صلح واللي يقول حرفيين واللي يقولي بيع وانا مش عارف ياجماعة أعمل أيه ياريت لو حد يقدر يقولي أعمل أيه خاصة أن العربية لسة هبقى بدفع في أقساطها لمدة سنتين جايين وهي حالتها ممتازة بمشي بيها خفيف أوي وكنت مدلعها أحلى دلع بس نصيب وقضاء الله لا أعتراض عليه والحمد لله على نعمته أني طلعت أنا واللي معايا سليم ....


هي اخدت خبطة في الأمام بجنبها الشمال الجير بوكس عاوز يتغير والآيرباج أتفتحت ومحتاجه مقص ومساعد والجنوط قدام أتعوجت ومحتاجة أكصدام و كبوت ومحتاجة طبعاً نظام التبريد لكن الموتور والكمبريسور سلام الحمد لله متلمسوش

طيب مش تفهمنا الاول وعلى حسب برده الحادثة عشان محدش فاهم حاجة

أنا رأيي صلحها بس عند حد معروف وشغله متجرب ونضيف المشكلة ان حضرتك في الإسكندرية فممكن تلاقي ان عدد الاعضاء اللي ممكن يفيدوك في مراكز ممكن تصلحها قليل لو في القاهرة متهيألي مركز نايل موتورز حايكون انسب حل بعد ما شوفنا شغلهم الممتاز في كذا عربية ده المركز اللي انا اعرفه انا صحيح ماتعاملتش معاهم بشكل مباشر بس من كلام وصور الاعضاء هم ناس محترفين فعلا فحضرتك شوف لو في امكانية لنقلها للقاهرة ( انا عارف انها حاتبقي مكلفة ) بس متهيألي المجال أوسع عن إسكندرية وممكن حضرتك تبعت صورها لأستاذ كريم منير وهو حايقولك رأيه لو عندك النية .
طبعا الكلام ده كله يتوقف علي الناحية النفسية هل حضرتك حتكون قابلها بعد التصليح ولا قفلت منها ولو صلحتها مش حاتبقي مرتاح معاها لو كده يبقي اكيد بيعها لان مصاريف الاصلاح مش حاتكون قليلة

اقتباس:

---

المشاركة الأصلية كتبت بواسطة molham

طيب مش تفهمنا الاول وعلى حسب برده الحادثة عشان محدش فاهم حاجة

---

تمام عدلت وكتبت فكرة عن الحادثة للي حابب يفهم أكتر وشكراً لحضرتك .

صلحها افضل من بيعها

اقتباس:

---

المشاركة الأصلية كتبت بواسطة ashturbo

تمام عدلت وكتبت فكرة عن الحادثة للي حابب يفهم أكتر وشكراً لحضرتك .

---

افضل حاجه انك تصلحها و تبيعها بعد كده
لان من غير تصليح مش هتجيبلك فلوس
و اعمل برضو مقارنه شوف تمن التصليح كام و لما تبيع تجيب كام
و لما تبيعها كده تجيب كام

من شكل الحادث رأي تصلح

هاتتصلح و هاترجع زي الفل
بس وديها لصنايعي كويس و شغله معروف سواء سمكرة او دوكو

حضرتك بتقول عليها اقساط يبقى صلحها افضل

توكل علي الله وصلحها
خساره بيعها

صلحها أفضل

لازم تدخلها التوكيل الاول اعملها مقايسه عشان تعرف حالتها بالظبط ومبلغ الإصلاح بالكامل
في نفس الوقت تنزل الحرفيين تشوف ليها أنصاص ولا وشوف حتحتاج من الانصاص ايه وبكام

صلحها وامشي بيها وسنه بالكتير وتنسي انها اتخبطت اساسا حرام العربيه لسه جديدة ولو بيعتها هاتخسر كتير
بس اهم حاجه وديها لحد نضيف حتى لو هاتدفع بزيادة

لا ياباشا صلحا طبعا البيع دلوقتي مش في صالحك خالص

صلحها بنضافة على قد ما تقدر , و ممكن تلاقي نفسك مكمل بيها

هاتتعب في تصليحها
لكن في المقابل اللي هاتصرفه عليها اقل كتير جدا من الخسارة اللي هاتخسرها لو بعتها بحالتها دي

لو انت فاضى و عندك وقت تقف فيه على راس كل صنايعى هيمد ايده فيها يبقى صلحها و بيعها على طول بعد التصليح، اما لو مشغول و مش هتقدر تتابعها (تفضى نفسك ليها شهر على الاقل) يبقى تبيعها على حالتها كده على طول ، صدقنى لو حسبت الفرق بين الامرين مش هتلاقى الفرق كبير و تعتبر انك اشتريت وقتك و ريحت دماغك.
و فى الاخر لازم تبيعها و ده رايى لانها عمرها ما هترجع زى الاول ابدا و هتفضل العربيه دايما موصومة بوصمة عار اللى هيه( دى رشه دواخل يا بيه أو دى مغيرة نص)

متشكر على كل الأراء الجميلة دي بجد حاسس أن أخواتي بينصحوني ربنا يكرمك جميعاً ويبعد عنكم شر الحوادث ...

أنا عملت مقايسة للعربية هتتكلف تصليح حوالي 30 ألف جنيه قطع غيار (أستعمال خارج) ومصنعيات (عند صنايعية بريمو) مابين جير بوكس اللي هو أغلى حاجة هتتغير - ودة للأسف واخد خبطة من تحت كسرت الفارغة بتاعته - وعاوزة مقص ومساعد وأكصدام أمامي ونظام تبريد وكبوت الماكنة متلمستش الحمد لله ولا هي ولا الكومبريسور والمدادات أتعوجت وجنوط امامية عاوزة تتغير لانها اتعوجت وكدة كل اللي فيها لو فكرت أبيعها هتعمل كام عالوضع دي هي كانت ماشية 40 الف كيلو تاني فئة ايه بي اس واتنين ايرباج - الله يرحمها - تمن الفئة دي دلوقتي 162 الف تقريباً بعد خصم الاستعمال وخصم الحادث العربية هتعمل كام .

صلحها ومتبيعهاش
هى العربيه هيترش فيها حاجه فى الدواخل؟؟؟
كل الى بتقول عليه لو مفيش رش فى الحوض يبقى العربيه هتفضل بحالتها بعد تغيير التالف ان شاء الله

قدر الله وماشاء فعل , وفداك اى حاجة طالما انت طلعت سليم

من وجهة نظرى اللى يتم كالاتى :

1- لو الفتيس نفسة سليم , يبقى تدور على فارغة فقط او فتيس بايظ وتاخد منة الفارغة بتاعتة دة هيوفر عليك كتير

2- مقص ومساعد وجنطين امامى استيراد هتوفر معاك جامد

3- تشترى ربع امامى كامل من غير رفارف بنفس لون السيارة هيوفر معاك فى الرش هيوفر معاك جداا بردة عن ماهتشترى كل حاجة لوحدها

بس كدة , دية الحاجات اللى انت كاتبها , وان شاء الله مش هتعمل 10 الاف جنية او بالكتير 13 الف

وتروح توديها لسمكرى محترم وطالما العربية مافيش فيها زراجين او فيها لحامات خلاص الموضوع منتهى , هيكون سهل فقط فك وتركيب وظبط وشكرا على كدة

فتيسك جديد غير الجزء المكسور فقط والموضوع كله هايتلم زي ما الأخ الفاضل كتب في المشاركه اعلاه

من وجهة نظرى الحادث بسيط جدا كل المشكلة ف الفتيس ومش الفتيس كله الفارغة نفسها انا اعرف ناس لاحمة فارغة الفتيس بس مش عارف ده هينفع عندك ولا لأ ، المهم قبل كل شىء حمد الله على سلامتك وهتخسر كتير كتير جدا لو بعتها على حالتها انا شايفها حادثة بسيطة والموضوع يتلم

انا شايف ان معظم العربية سليم والشغل الي قدام لو سمكري شاطر هيعرف يظبط وش العربية
الفكره في امكانيات حضرتك المادية لان اكيد سعر الفتيس ودورة التبريد والكابوت والاكصدام والرفرف والفوانيس ومصنعية سمكري وبوهيجية يعني حضرتك بتتكلم في 13-15 ألف تقريبا
لو معاك اتوكل علي الله