هل فيه في موديلات 2004 عربيات نزلت بفتحه سقف؟
عرض للطباعة
هل فيه في موديلات 2004 عربيات نزلت بفتحه سقف؟
فى ناس معاها قبل 2004 كمان و بفتحة سقف
تقريبا كان موديل 2000 او 2002
هى نزلت متنفضة من شوية كماليات زى فتحة السقف و مثبت السرعة و ال gps و الكراسى الميمورى بسخانتها و كل دا فى كتالوج العربية و لقيت واحد مزود كل دا ماعدا ال gps
يعنى لو تقصد هو حافر السقف ......لأ
انا قصدي على موديلات 2004 و ما بعدها هل نزلت بفتحه سقف فابريكا ؟؟
لا جديد ؟؟
طيب انت بتدور على حاجة بفتحة سقف فى السنين دى
و لا ادامك حاجة فعلا و شاكك فيها
متهيالى والله اعلم شفت حاجة زى كدة موديل 2006
بسأل عشان العربيه ديه معجب بيها و ناوي عليها بأذن الله بس نفسي اركبها بفتحه سقف عشان كده بستفسر
لو نويت يبقى ان شاء الله لازم تكون حالة
شوف العربية انت الاول و افحصها الفحص الظاهرى العادى
سمكرة و بوية جاهزين و لا فيها شغل
حالة الكاوتش
حالة الصالون ...قماش و لا جلد...الباكتات و الجرايد على العتب و الابواب
الكماليات شغالة و لا لأ (مرايات ضم-و تعتيمو الفوجات-المالتى فانكشن-السى دى و الكاسيت و حساس النور-التكييف-انوار الصالون و ووحدات الرفع)
العربية ماشية بسلاسة و لا فى نتشات فى جميع الغيارات و يا سلام لو snow mode و تطلع على التانى
لف الدركسيون يمين و شمال و انت ماشى و شوف الكبالن
العربية مكفية و لا السوست قوية والمساعدين تمام و لا العربية بتلعب
الكشافات شغالة و لا لأ
العدادات شغالة و لا لأ
اماكن ربط الكشافات سليمة و لا متكسرة (مش شرط لانه ممكن يكون مغير بكشاف جديد)
فى نسخة واحدة من المفتاح الريموت و لا اتنين (تمن النسخة الريموت 600 جنيه و فى التوكيل ب900 ) و بشتغلو مع كل الابوبا و الشنطة " آور نوت"
العربية متهانة و لا محترمة بشكل عام
الخ
عجبك الموضوع يبقى كدة 50 % من الشغل خلص
لازم كشف الكمبيوتر يبقى ببرنامج البيجو و الستروين (بيجوبلانت- ليكزيا-واحد تالت نش فاكره)مش اى ورشة بتاعة كله وبرنامج لكله ...ممكن تطلع عل التوكيل فى غمرة ب 270 جنيه و تطلب منه يعرف لك العربية ممكن يكون اتلعب فى العداد و لا لأ ...لان حتى المرسيدس بقو يلعبو فيه
و بالتوفيق ان شاء الله
هو ايه الفرق فى الكماليات بين موديلات 2003 و 2004-2006 ؟؟
الف شكر يافندم
انا الناهرده شوفت واحده 2006 وعجبتنى بصراحه
الاعلان ده اللى حضرتك منزله اتصلت بيه الناهرده برضه و كلمته - حسيت انه تاجر
لأنه فى الاول لما قولتله اعدى اشوف العربيه امتى قالى فى اى وقت بس اتصل قبلها بساعه !!!
شكيت بصراحه لان لو واحد عادى حيقولى تعالى من الساعه كذا لكذا بعد معاد الشغل
هو شك بسيط بس حطيته جنب شك تانى ان مش معقول عربيه بقالها 10 سنين و عامله 47000 كم فقط الا لو كانت مرفوعه او ملعوب فى عدادها
فعلشان اتأكد قومت عملت بحث بالميل اللى مكتوب فى الاعلان و لاقيته منزل اكتر من عربيه مستعمله و برضه بعدد كيلوهات قليل لايتناسب مع موديل العربيه
و بالتالى اعتقد انه تاجر و حترف لعب فى العدادات لاكتر من ماركه:10D5C8w1107:
اتمنى انى ماكونشى ظالمه و يحسنله بيعها لو ماكنشى فيها غش
بالمناسبه - العربيه اللى شوفتها و عجبتنى كان غطاء سره الكاوتش الامامى (اللى عليه رسمه اسد بيجو) كانت واقعه - مش كده المفروض يدخل تراب على بلى العجل و لا مش فارقه ؟
سؤال كمان معلشى : بفرض ان صاحب العربيه كان عنده نسخه ثالثه من المفتاح و مخبى فى العربيه GPS Tracker ايه اللى يمنع انه يجي و ياخد العربيه تانى و انا مش حاسس ؟؟ هل فيه طريقه انى اعطل اى نسخه من المفتايح غير اللى معايا (طبعا انتو عارفين ان المفتاح مشفر)
فعلا الكيلو متر دا لو حقيقى مش اقل من 20 باكو زيادة
و استغربت برضه من موضوع 8 ايرباج !!! شكله مش عارف العربية
مش عارف موضوع اللوجو دا
بس موضوع ال gps دا لوحطيته فى دماغك مش هتشترى عربية و ما يعملش كدة الا حرامى مش واحد صاحب عربية
خلاص ---اعمله انت كمان tracker و لا يفل الحديد الا الحديد----هو ياخدها و انت تجيبها ههههههه
انا لسه جايب العربيه من الجيزه لغايه تحت البيت فى القاهره الجديده
و كنت مرعوب فى الاول لإن اول مره فى حياتى اسوق اوتوماتيك
الحاجه الوحيده اللى لاحظتها هى ان الدريكسون بيحدف شمال حاجه بسيطه - هل ده عيب فى الباور و لا عاوزه ظبط زوايا و خلاص ؟
و مش عارف ازاى افتح تانك البنزين - انا لاقيت الدراع بتاعه و بشده لفوق و مابيفتحشى معايا
و انا عاوز اركبلها انذار - هل اركبلها عند اى حد بتاع انذارات و لا لازم فى مركز معتمد ؟؟؟
و سؤال كمان هل يمكن استبدال الكاسيت باى كاسيت اخر موجود فى السوق
و اسف على الاطاله
مبروك يا استاذ خالد و ربنا يبارك لك فيها و يديك خيرها و يكفيك شرها
عايز اعرف انطباعك عنها في القياده و المحرك ال2000 و الثبات و الفرامل و الخ
الله يبارك فيك يافندم
شوف علشان ابقى منصف انا لغايه دلوقتى انا سوقتها فى مشوار واحد طويل من الجيزه لغايه القاهره الجديده على الدائرى الساعه 12 باليل لما جبتها و دى على فكره اول مره اسوق اوتوماتيك فى حياتى و اقصى سرعه امبارح جبتها كانت 120 و كانت ثابته جدا و كان ممكن تجيب اكتر بسهوله
هى سحبها ممتاز و تسارعها حلو اوى لغايه ال100 فوق الميه معدل التسارع بيقل شويه بس برضه المستوى مقبول
بالنسبه للفرامل كانت كويسه معايا طول المشوار لكن الناهرده الصبح شديت بيها شويه حولين البيت و اتفائجت بمطب فدوست فرامل جامد - هى وقفت كويس بس لما دوست فرامل للاخر حسيت بخشونه فى الفرمله معرفشى ان كانت هى كده و لا فيها مشكله
انا اللى قارفنى فيها بصراحه هو الكاسيت بتاعها و الطاره بتاعتها حاسس انها صغيره - انا متعود على حجم الطاره بتاعت 504
ألف مبروك يا باشا ربنا يديك خيرها و يكفيك شرها
هى ال2006 اللى عجبتك ؟
أضبط الزوايا و اتاكد من ضغط الكاوتش متساوى للجانبين
لازم تعمل حسابك فى 1500 نقل ملكية +800 ضربة سنويا + 500 تغيير زيت فتيس + سير كاتينة (300 او 550 او 1100) حسب حالة البلى و طلمبة المياه لان تروسها مع سير الكاتينة و الحاجة دى بالذات لازم اصلى طبعا +160 2 جركن مياه مبردة (توتال او موبيل) بعد ما تتاكد من عدم وجود تسريب فى دورة المياه + 250 فلاتر الهوا و البنزين و البوجيهات سرفس كامل يعنى ودى اغلى سرفس و ضرورى لاى عربية مشتراة حديثا الا لو اتاكدت من صاحب العربية من الحاجات دى و الافضل تغيرها (عن تجربة)
العربية فيها إيمولايزر مش عارف انت عايز حاجة صوتية لو فى محاولة سرقة ؟
لو فى مشكلة فى العربية فى حاجة معينة اسأل المالك
التسارع من0-100 فى حوالة 10 ثوانى
العزم بتاع العربية ما شاء الله حوالى 190 نيوتن.متر (فى كتالوج الفتيس 210) عند 4500 لفة فى الدقيقة .....يعنى ايه؟.....يعنى العربية مش بتشحط على السرعات العالية زى ماركات مشهورة اوى بطلعتها و بعد كدة بتجيب جاز...لان مفيش عزم كبير عند عدد اللفات العالى او لو العربية محملة ...و بالمناسبة المقياس الحقيقى لقوة العربية هو العزم مش عدد الاحصنة
الخشونة اللى لقيتها فى الفرامل دى ممكن يكون ال abs اشتغل -- و هوبيشتغل فى حالة الكبح المفاجىء بغض النظر عن السرعة اللى انت ماشى عليها و برضه فى الملفات و صوته بيبقى عامل زى التكتكة و تلاقى الفرامل خشنة فى رجلك
ومالو الكاسيت بتاعها ؟ و ايه اخبار الفتيس هل فىه مشكلة عند اى نقلة او اى وضع للغيارات
كل دى مصاريف - ياخراب بيتك يا خالد :eyecancer::eyecancer:
هى فعلا موديل 2006 - بس رخامتها انها عامله 178 الف كيلو بس حسب كلام صاحبها انه كان معتنى بيها و انا فعلا تأكدت ان مافيهاش مشاكل الموديل ده المشهوره
هو بصراحه قالى انه لسه عامل صيانه شامله من 8000 كيلو و لسه مغير الريداتير بخراطيمه
بس بصراحه مش واثق فى كلامه و للاحتياط حطلع بيها على مركز احمد عماره اللى فى القطاميه و حعمل سيرفس من اول و جديد افضل (مش اللى عند الفسطاط)
بالنسبه للانذار انا فعلا عاوز حاجه صوتيه بالاضافه الى الليد علشان اخوك كتير بيطلع البيت و لما اطلع افتكر هل قفلت العربيه و لا لاء
بالنسبه لتانك البنزين سألت صاحبها قالى انى بشد الدراع و بعد كده بدوس على الغطاء من قدام فيفتح - انا كل شويه اسأله فى حجات عبيطه و شكلى فلاح اوى قصاده
هو بالظبط كده التكتكه و الفرامل كانت خشنه بعد الفرمله المفاجئه - يعنى طلعت حاجه طبيعيه مش بقولك فلاح
بالنسبه للكاسيت فانا مسترخمه علشان مافيهوش USB و غير ان التحكم بتاعه لسه مش عارفه كويس انا متعود على كاسيت Sony حاطه فى 504
الفتيس كويس اوى و مافيش نتشه عند الغيارات
المشكال اللى اكتشفتها لغايه دلوقتى حجات عبيطه زى ان الدركسيون بيحدف شمال حاجه بسيطه و فيه صفاره خفيفه اوى بتظهر عند سرعه 20 تقريبا فقط و بتختفى بعد كده
ههههههههههه
دا انا حتى ما رضيتش اقولك ترخص تلات سنين مرة واحدة
وبعدين انت خلاص اتعودت على ال 2000 سى سى
خلاص مش لازم تعملهم كلهم مرة واحدة خليها قطاعى
هى بتدى اشارات ضوئية ساعة لما بتقفل وفيها خاصية follow me اللى انا مش عارف اشغلها لغاية دلوقتى !!! محسوبك فلاح برضه .........و منوفى !!! :waaaht:
المبرد انا غيرته و ياريت تتاكد انه نوعية نضيفة
لو كان الفرنساوى ابو 1700 جنيه يبقى الراجل دا فعلا كان معتنى بالعربية حق الاعتناء
لو كان ابو 900 مممممممم ماشى
لو كان ابو 650 الكورى فدا شغل كورى
اما كان ابو 400 جنيه الصينى فانت اشتريت الجيلى
و اسال مركز الخدمة و هو يعرفه
انت عندك فى الشنطة من ورة على الشمال مكان ل 6 اسطوانات بالنسبة للكاسيت
بس يا باشا عايزين تقرير مطول شوية
و ربنا يبارك لك فيها
الله يبارك فيكم
بعد كده تقرير ايه بس اللى بتقولو عليه
انا لو عملت تقرير حسواء سمعة العربيه دى
يعنى الناهرده مثلا - كنت فى عين شمس و راجع تانى على القاهره الجديده
فنزلت من العربيه بعد ماطفتها و الاولاد كالمعتاد نطو على كرسى السواق و عاشو اللحظه
رجعت و اول لما ادور ابص الاقى الكشافين اللى قدام و النور الصغير منورين لوحدهم كده و دراع النور على على الوضع 0 اللى المفروض طافى فيه كل النور
المهم فضلت تقريبا نص ساعه اشتم فى العيال و اجرب كل احتمالات الدراع ده و فشلت تماما انى اعرف ارجعها زى الاول
لما غلبت اتصلت بصاحبها و سألته - قالى عيال شغلو ال Auto lighting و قالى طريقه انى اطفى الموضوع ده - و اخيرا فهمت حكايه حساسات النور دى
طبعا المشوار كله اخدته شتيمه فى شركة بيجو و الفزلكه بتاعتهم :36_1_34[1]::36_1_34[1]:
حاجه تانيه برضه فى نفس الطلعه كنت راكن و مستنى المدام فى العربيه و شايل زياد افندى على حجرى و هو داس على حاجه فلاقيت الشاشه كتبتلى Economic mode activated !!!!!! و انا مش عارف ايه هو ده ولا حتى الواد داس على ايه
بالمناسبه هو ايه فايده زراير 1 و * و S اللى موجودين جنب الفتيس دول ؟
هههههه ربنا يبارك لك في زياد افندي
على قد خبرتي المتواضه حرد على اوضاع الفتيس ديه
* بيخلي العجل بيلفش على الفاضي على الاراضي المبتله او التلج عشان الزحلقه يعني بيقلل العزم في الطلعه
1 العكس بيزود العزم و بيخلي العربيه ملائمه اكتر لشد او جر حاجه وراها او خروج من موقف غرز مثلا فبيعلى الغزم و بيمنع النقل للغيارات العاليه
s اللي هوا سبورت مود بيأخر النقل و يحرق على الغيارات للشد او الجري " اموت انا " هههههههههه
بالمناسبه
انا لاحظت الناهرده انى لو كابس بنزين جامد بتحصل نتشه خفيفه فى الغيارات
لكن لو كابس بنزين بشكل متوسط النتشه دى مش بتبقى موجوده و مش بتعرف انها نقلت اصلا غير من rpm- هل ده عيب و لا ده عادى ؟؟
و دراع المطر برضه فى وضع اوتوماتيك يشغل المساحات اول ما المياه تقع عليها !
عندك برضه اللكنبة الورانية ليها مقبضين حمر ممكن تقلبها و تفتح الريسبشن على المطبخ....قصدى يعنى الصالون على الشنطة
و فيه مكان دخول على الشنطة من داخل الصالون
وضع 1 يبقى أعلى غيار توصل له العربية الاول و دا اعلى عزم علشان فى مطلع تمنعها تجيب التانى و تقدر تكمل
وضع 2 يبقى أعلى غيار التانى ووضع 3 يبقى اعلى غيار الثالث و دا مفيد فى حالة العواصف علشان لو مشيت على الرابع فى عاصفة العربية هتحلق بعيدا و برضه لو العربية جابت فتيس
ال * دا للقيادة على الارض الزلقة
الS للقيادة الرياضية
بس ايه Economic mode activated دى ؟
اكتشفت اخيرا ايه Economic mode activated
كنت امبارح قاعد فى العربيه مستنى المدام اللى طلعت عند اختها - الست هانم سابتنى ملطوع فى العربيه ساعه و تلت تقريبا
كنت فى خلال الفتره دى عامل المفتاح على اول تكه و مشغل الراديو
بعد مده على الوضع ده لاقيت الرساله دى Economy mode activated طلعلتى تانى
و بعد كده الراديو فصل
و المره دى متأكد ان زياد مادسشى على حاجه لانى كان نايم
فإستنتاجى ان ده نظام للحفاظ على البطاريه و بيفصل اى حاجه متوصله عليها بعد مده زمنيه طويله لحسن تكون ناسيها و لا حاجه
معاك الكتالوج بتعاها ياخالد ؟؟
الكتالوج الاصلى بتاعها مش معايا
لكن دورت على النت و جبت كتالوج بتاع موديل 2002 و ماشى الحال
رفعتهولك تانى اهه
406 handbook - Download - 4shared
الجيربوكس اخبارة ايه اخبار الرزعه اللى فى الجيربوكس مع الطلعة و بين الغيارات
على فكرة دة عيب شائع فى ال 406 و دة عيب من المصنع و احتار فى الاطبا
انما كعربية فى المجمل ممتازه
شنبر بسيطوة ان شاء الله الموضوع مش صعب و ياخدلة يومين شغل لو حاجتك جاهزة عن ميكانيكى بيفهم
انما الاسعار مش هقدر افيدك لكن حاجاتها غالية شويتين و دة عادى فى الفرنساوى
انا و انا بقرى فى الكتالوج لاقيت فيها نافيجاتور بس بيشتغل بالريموت
و طبعا انا مش معايا الريموت بتاعها
هل اساسا العربيات اللى نزلت مصر كان فيها النافيجاتور ده ؟؟ وهل ممكن اشترى الريموت ده لوحده و منين و بكام ؟