كنت عملت فيزا انترنت للبنك العربي الافريقي وبعد ما عملتها اكتشفت ان في مواقع كتير بترفضها والسبب مجهول للبنك وبتوع البنك يقولولي ارجع للموقع وبتوع الموقع يقلولي ارجع للبنك فقررت اني اخليها اشحن بيها موبينيل فقط "الوحيده اللي اشتغلت معاها " وقولت ادور علي حاجه تانيه
روحت البنك الاهلي المصري وكان عندي فكره مسبقه وقولت افتح حساب جاري بدون فوائد "هروبا من الفوائد الربويه " وافتكرت اعلان اوم اطمن علي فلوسك
الحد الدني لعمل الحساب 500 جنيه مصري
مصاريف فتحه 25
مصاريف اصدار بطاقه خصم "ديبيت" 25 جنيه
مصاريف ربع سنويه 30 جنيه
وتوكلت علي الله وفتحته وقولت ما اقوم اتطمن علي فلوسي
الموظف عمل الحساب واداني رقم الحساب وقالي حط نقديه فيه بقي وتعالي بعد عشر ايام استلم الفيزا
وفعلا بعد عشر ايام استلمت الفيزا اللي طلعت مش فيزا طلعت ماستر كارد وقولت للموظف اني عايز استخدمها علي النت كتبلي طلب وقالي بعد 48 ساعه تقدر تستخدمها علي النت وكتبلي طلب تاني علشان اشترك في خدمة الاهلي نت اللي عن طريقها تعرف تفاصيل حسابك من علي الانترنت
وبالفعل بعد 48 ساعه حاولت استخدمها لكن فشلت المحاوله واتصلت بخدمة العملاء قالولي لازم تعمل سكيور كود للبطاقه ادخل اعمله وقابلتني مشكله كبيره علشان اعمل السكيور كود ده كل مره يجي في خطوة ادخال الاسم وتاريخ انتهاء البطاقه واخر 6 ارقام من البطاقه الشخصيه ويقولي البيانات غير دقيقه واعد المحاوله اتصلت بالبنك اكتر من مره ويقلولي قدمنا طلب وبعد ساعتين هاتنجح ولكن برضو فشلت لحد ما ربنا الهمني لحل بسيط اني في الخطوة اللي قبلها اللي بيطلب مني البريد الالكتروني بتاعي اسيبها فاضيه وما اكتبش الايميل بتاعي وفعلا مشيت بعدها تمام وعملت السكيور كود وده رقم بيطلبه منك الموقع اللي بتشتري منه او بتدفع فاتورتك منه وده للامان ودي ميزه الصراحه جميله جدا واشتغت معايا علي النت تمام واول ما دفعت الفاتوره لقيت رساله علي الموبايل بقيمة العمليه
المفاجأه الحلوه بقي ان ماكينات البنك الاهلي ممكن تعمل ايداع عن طريقها ودي وفرت معايا كتير اوي لان الفرع بيبيقي زحمه دايما انما عن طريق الماكينه بعمل ايداع في دقيقه واحده
مميزات البطاقه اللي شوفتها لحد الان
السكيور كود
رساله الموبايل بعد كل عمليه
انتشار ماكينات البنك الاهلي
الايداع عن طريق الماكينه
ما فيش اي عموله للبنك عند السحب النقدي او المشتريات
في عرض كاش باك 5% علي قيمة مشترياتك بحد اقصي 100 جنيه في خلال مدة العرض يعني تعمل مشتريات ب 2000 جنيه بما فيهم اي تعامل علي النت زي دفع الفواتير
العيوب
شكل البطاقه تعبان وطريقه كتابه الاسم والارقام بكتابه ممكن تتمسح مع الوقت
خدمة العملا بيكونو حافظين مش فاهمين وتقريبا معظم البنوك كده

فاضل بقي خدمة الاهلي فون كاش دي ما ردتش اشترك فيها الصراحه هي الي الان مجانيه بس هاتبقي بفلوس تقريبا 10 جنيه في الشهر
سألت الموظف لو اشتريت اي حاجه بالدولار في اي عموله هاتنضاف عليا قالي لا هو تحويل المبلغ بسعر الصرف بس