النهاردة كنت بعمل صيانة ال5000 للسيراتو بأبو رواش
وطبعا كنت مكلمهم قبلها وواخد ميعاد الساعة 10.30 النهاردة
المهم وصلت التوكيل على الساعة 10.45 صباحا
وأديتلهم كتيب الضمان والرخصة والمفتاح
وقعدوا يسجلوا فى بيانات العربية ما يقرب من نصف ساعة
وقلت للمهندس ملاحظاتى وكان أهمها وجود حدفة يمين فى العربية من يوم إستلامها (كنت مكسل أروح لهم علشانها)
ورحت صالة الأنتظار والبوفيه المتواضع كما فى الصور




وجه عامل قاللى إن السيارة خلصت فطلعت وخليت المهندس يثبت لى الصيانة فى كتيب الضمان وقاللى ظبطنا الزوايا والعربية تمام .
رحت الخزنة ودفعت 130 جنيه تمن الزيت والفلتر .
طلعت أجرب العربية لقيت نفس الحدفة اليمين موجودة فرجعت التوكيل تانى وخليت المهندس يجربها معايا - هو لاحظ الحدفة بس قاللى إن دة ميل طريق
فقلتله العربية ماشى بيها 5000 كيلو كلها طرق مايلة ؟؟؟!!!
ورجعنا التوكيل ودخلها على ظبط الزوايا تانى وجربتها لقيت الحدفة اليمين موجودة برضه .
رجعتهاله ودخلها الورشة تانى بس أنا كنت خلاص إتخنقت .
طلعت العربية جربتها لقيت الحدفة بقت شمال !!!!
رجعت له وخليته يجربها هو وجربها وأعترف إنها بتحدف شمال فعلا !!!
قلت له يا باشمهندس واضح إن دة عيب كاوتش .
وهو أعترف إن دة عيب كاوتش فعلا بس بعد عذاب وقاللى إنه يتغير فى الضمان .
وعمل report بكدة فعلا و خدته منه وقاللى تروح بيه توكيل هانكوك
أخذت الreport ورحت بيه لمدير الضمان ومدير الصيانة وقالولى هم هيكشفوا على الكاوتش ولو محتاج تغيير هيغيروه !!!
طبعا لسه هحدد ميعاد مع توكيل هانكوك ويا عالم هيغيروه واللا لأ ؟؟؟
- غسيل العربية أى كلام
- حاسس إن العربية بقت مخنوقة شوية مش عارف ليه بس أنا كنت زهقت خلاص .
أنا تقييمى للتوكيل بصراحة 7 على 10 بالكتير